શું રશિયા-યુક્રેન વચ્ચે યુદ્ધ થંભી ગયું? અમેરિકી રાષ્ટ્રપતિ ટ્રમ્પનો સીઝફાયર અંગે મોટો દાવો
યુક્રેનમાં ચાલી રહેલા ભીષણ યુદ્ધ અને કડકડતી ઠંડી વચ્ચે અમેરિકી રાષ્ટ્રપતિ ડોનાલ્ડ ટ્રમ્પે માનવીય ધોરણે રશિયાના રાષ્ટ્રપતિ વ્લાદિમીર પુતિન સામે એક મોટી વિનંતી કરી છે. ટ્રમ્પે દાવો કર્યો છે કે પુતિન યુક્રેન પરના હુમલાઓ એક સપ્તાહ માટે રોકવા સંમત થયા છે.
માનવીય ધોરણે ટ્રમ્પની પહેલ
ગુરુવારે વ્હાઇટ હાઉસમાં આયોજિત કેબિનેટ બેઠક દરમિયાન રાષ્ટ્રપતિ ટ્રમ્પે જણાવ્યું હતું કે, તેમણે વ્યક્તિગત રીતે રાષ્ટ્રપતિ પુતિનને આગ્રહ કર્યો છે કે યુક્રેનની રાજધાની કીવ સહિત અન્ય શહેરો અને કસબાઓ પર ઓછામાં ઓછા એક અઠવાડિયા સુધી હુમલા ન કરવામાં આવે.
આ પહેલ પાછળનું મુખ્ય કારણ યુક્રેનમાં પડી રહેલી અતિશય ઠંડી છે. રશિયા સતત યુક્રેનના વીજળી મથકો અને ઈન્ફ્રાસ્ટ્રક્ચરને નિશાન બનાવી રહ્યું છે, જેના કારણે લાખો લોકો વીજળી વગર ઠંડીમાં ઠુંઠવાઈ રહ્યા છે. ટ્રમ્પના મતે, આ વિરામથી સામાન્ય નાગરિકોને થોડી રાહત મળશે. જોકે, આ અંગે રશિયા તરફથી હજુ સુધી કોઈ સત્તાવાર પુષ્ટિ કરવામાં આવી નથી.
ઝપોરિઝિયામાં ડ્રોન હુમલો: ત્રણના મોત
એક તરફ ટ્રમ્પ શાંતિની વાત કરી રહ્યા છે, ત્યારે બીજી તરફ જમીની હકીકત હજુ પણ ભયાનક છે. ગુરુવારે યુક્રેનિયન સત્તાવાળાઓએ જણાવ્યું હતું કે, દક્ષિણ ઝપોરિઝિયા વિસ્તારમાં રશિયા દ્વારા કરવામાં આવેલા રાત્રિ ડ્રોન હુમલામાં ત્રણ લોકોના મોત થયા છે. આ હુમલામાં એક એપાર્ટમેન્ટ બિલ્ડિંગને ગંભીર નુકસાન થયું હતું અને તેમાં આગ લાગી હતી.
રશિયા મોટા હુમલાની તૈયારીમાં: ઝેલેન્સ્કીની ચેતવણી
યુક્રેનના રાષ્ટ્રપતિ વોલોદિમીર ઝેલેન્સ્કીએ વિશ્વને ચેતવણી આપી છે કે રશિયા વધુ એક મોટા હુમલાની ફિરાકમાં છે. ગુપ્તચર એજન્સીઓના અહેવાલોને ટાંકીને તેમણે કહ્યું કે, રશિયા મોટા પાયે હવાઈ હુમલા કરવા માટે હથિયારો અને સંસાધનો એકઠા કરી રહ્યું છે. નોંધનીય છે કે તાજેતરમાં જ રશિયાએ આશરે 800 ડ્રોન અને મિસાઈલો વડે યુક્રેનના પાવર ગ્રીડને નિશાન બનાવ્યું હતું.
અમેરિકાની મધ્યસ્થતામાં યુદ્ધવિરામ માટે વાતચીત ચાલી રહી હોવાના અહેવાલો વચ્ચે ટ્રમ્પનું આ નિવેદન ઘણું મહત્વનું છે. જો એક અઠવાડિયા માટે પણ હુમલા અટકે છે, તો તે શાંતિની દિશામાં એક મોટું કદમ હોઈ શકે છે. પરંતુ રશિયાના સતત થઈ રહેલા ડ્રોન હુમલાઓ જોતા સ્થિતિ હજુ પણ અત્યંત તણાવપૂર્ણ છે.
