32 વર્ષીય વ્યક્તિ નાનપણથી ડિનરમાં ફ્રેન્ચ ફ્રાઈઝ અને હોટ ડોગ ખાય છે, ડોકટરે કહ્યું-આ કેસ દરેક વ્યક્તિમાં સંભવિત નથી

બેલ્જિયમના રહેવાસી 45 વર્ષીય રૂડી ગિબેલ્સ છેલ્લા 32 વર્ષથી રોજ રાતના ભોજનમાં ફ્રેન્ચ ફ્રાઈઝ અને હોટ ડોગ જ ખાઈ રહ્યા છે. આટલા વર્ષોથી રોજ એકનું એક ડિનર લેવા છતાં આજ સુધી તેમને કોઈ શારીરિક તફલીફ થઈ નથી. જે લોકોનું માનવું છે કે, ફાસ્ટફૂડ ખાવાથી રોગ થાય તેમના માટે રૂડીએ એક યોગ્ય ઉદાહરણ પૂરું પાડ્યું છે. જો કે, આ કેસમાં ડોક્ટર્સનું કહેવું અલગ છે કે, રૂડીને ભલે ફાસ્ટફૂડથી કોઈ નુકસાન ન થાય પણ અન્ય કોઈ સામાન્ય વ્યક્તિનું શરીર પણ આવો જ પ્રતિભાવ આપે તે વાત શક્ય નથી. રૂડીએ કહ્યું કે, ટીનેજમાં મારી માતા મને હેલ્ધી લંચ અને ફળ-શાકભાજી ખાવાનું કહેતા. હું હેલ્ધી લંચ એટલા માટે ખાતો કારણ કે, તેના માપચી મને ડિનરમાં ફ્રેન્ચ ફ્રાઈઝ અને હોટ ડોગ ખાવા મળતું. ધીમે-ધીમે મારી આ આદત મારી પર હાવી થઈ ગઈ. બેલ્જિયમ દેશના ઘણા ન્યૂઝપેપરે રૂડીને ‘ધ અલ્ટીમેટ બેલ્જિયમ’નો અવોર્ડ આપ્યો છે. રૂડીને હવે ડિનરમાં માત્ર ફાસ્ટફૂડ જ જોઈએ છે, તે એની વગર રહી શકતો નથી. રૂડીને આ ટેવ વિશે બેલ્જિયમ દેશની એન્ટવર્પ યુનિવર્સિટીના ચીફ ડાઈટિશિયન માઈકલ સેલ્સે જણાવ્યું કે, રૂડીની આ ટેવમાંથી આપણે સૌને જંક ફૂડ રોજ ખાવાની વાતને ગંભીર ન લેવી જોઈએ. આપણે જાણીએ છીએ કે, ફાસ્ટ ફૂડથી કોલેસ્ટેરોલ, ડાયાબિટીસ અને દિલની બીમારીઓ થવાનું જોખમ ઘણું વધી જાય છે. રૂડીને ફાસ્ટફૂડની કોઈ અસર થઈ નથી તેનો મતલબ એ નથી કે કોઈ બીજાને પણ નહીં થાય. રૂડીનું માનવું છે કે, તેનો કેસ 95 વર્ષની ઉંમરે ઘુમ્રપાન કરનારી દાદીની જેમ છે. જે રીતે દાદીને આટલી ઉંમરે સિગારેટ પીવાથી ફેફસાનું કેન્સર ન થયું તેમ મારી પર પણ જંક ફૂડની કોઈ અસર થઈ રહી નથી.