Rain Alert 4 રાજ્યોમાં રેડ એલર્ટ, હિમાચલમાં ભૂસ્ખલન
Rain Alert ભારે વરસાદના કારણે દેશના ઘણા રાજ્યોમાં જીવન અસામાન્ય બન્યું છે. ભારતીય હવામાન વિભાગ (IMD) દ્વારા રાજસ્થાન, કેરળ અને કર્ણાટકના કેટલાક વિસ્તારોમાં આજે રેડ એલર્ટ જાહેર કરવામાં આવ્યો છે. બીજી તરફ, મધ્યપ્રદેશ, ઉત્તર પ્રદેશ, તમિલનાડુ, પુડુચેરી અને કર્ણાટકના દરિયાકાંઠાના વિસ્તારોમાં ઓરેન્જ એલર્ટ જાહેર કરવામાં આવ્યો છે.
દેશના અનેક રાજ્યોમાં સતત વરસાદને કારણે નદીઓ ભરાઈ રહી છે અને નીચાણવાળા વિસ્તારોમાં પાણી ભરાવા લાગ્યાં છે. ઉત્તર પ્રદેશના પ્રયાગરાજ અને વારાણસીમાં ગંગા નદીએ ખતરાના નિશાનને અડી છે. બિહારમાં પૂર જેવી સ્થિતિ સર્જાઈ છે.
હિમાચલમાં અચાનક પૂર અને ભૂસ્ખલનની ચેતવણી
હિમાચલ પ્રદેશના સિરમૌરમાં ભારે વરસાદ બાદ NH707 પર ભૂસ્ખલન થયું હતું. રાજ્યના 9 જિલ્લામાં અચાનક પૂરની આગાહી કરાઈ છે. 20 જૂનથી અત્યાર સુધી રાજ્યને અંદાજે 1220 કરોડ રૂપિયાનું નુકસાન થયું છે અને 170થી વધુ રસ્તાઓ બંધ કરવાના પગલા લેવામાં આવ્યા છે.
કેરળમાં ધોધમાર વરસાદ, રેડ એલર્ટ જાહેર
IMD એ 18 જુલાઈના રોજ કેરળના કન્નુર, વાયનાડ અને કાસરગોડમાં રેડ એલર્ટ જાહેર કર્યો છે. મલપ્પુરમ, કોઝિકોડ અને ઇડુક્કી જિલ્લામાં ઓરેન્જ એલર્ટ છે. કન્નુર, વાયનાડ અને કાસરગોડમાં શાળાઓ બંધ રાખવામાં આવી છે.
જમ્મુ-કાશ્મીરમાં અમરનાથ યાત્રા મુલતવી
જમ્મુ અને કાશ્મીરમાં સતત વરસાદ અને ભૂસ્ખલનના કારણે અમરનાથ યાત્રા થોડીક વેળા માટે મુલતવી રાખવામાં આવી છે. બાલતાલ રૂટ પર ભૂસ્ખલનમાં એક મહિલા યાત્રાળુનું મોત થયું છે અને ત્રણ લોકો ઘાયલ થયા છે.
બિહારમાં વીજળી પડવાથી 19 મોત
છેલ્લા 24 કલાકમાં બિહારમાં વીજળી પડવાને કારણે 19 લોકોના મૃત્યુ થયા છે. સૌથી વધુ નાલંદામાં 5 લોકોનાં મોત થયા છે. ઉત્તર પ્રદેશના ચિત્રકૂટમાં ભારે વરસાદને કારણે ધોરણ 1 થી 8 માટે શાળાઓમાં રજા આપવામાં આવી છે.
