બેંગલુરુ શરમસાર: ધોળે દિવસે ભીડ વચ્ચે યુવતીની છેડતી, ઇન્સ્ટાગ્રામ પર વીડિયો વાયરલ થતા લોકોમાં ભારે રોષ.
બેંગલુરુના સૌથી ધમધમતા વિસ્તાર ગણાતા ચર્ચ સ્ટ્રીટમાં જાતીય સતામણીની એક ચોંકાવનારી ઘટના સામે આવી છે. એક યુવતીએ સોશિયલ મીડિયા પર શેર કરેલા વીડિયોમાં જોવા મળે છે કે એક શખ્સ જાહેરમાં પોતાની પેન્ટમાં હાથ નાખીને અશ્લીલ હરકતો કરી રહ્યો છે. આ ઘટના ત્યારે બની જ્યારે આસપાસ સેંકડો લોકોની અવરજવર હતી.
શું છે સમગ્ર મામલો?
પીડિત યુવતીના જણાવ્યા અનુસાર, તે અને તેની બહેનપણી ચર્ચ સ્ટ્રીટમાં હતા ત્યારે આ શખ્સે તેમનો પીછો કર્યો હતો. આશરે ૩૦ મિનિટ સુધી તે તેમની આસપાસ ફરતો રહ્યો અને સતત તાકી રહ્યો હતો. નવાઈની વાત એ છે કે જ્યારે યુવતીએ તેનો વીડિયો ઉતારવાનું શરૂ કર્યું, ત્યારે પણ તે ડરવાને બદલે નિર્લજ્જતાથી તેની હરકતો ચાલુ રાખતો જોવા મળ્યો હતો.
View this post on Instagram
પોલીસ કાર્યવાહી અને FIR:
સોશિયલ મીડિયા પર વીડિયો વાયરલ થયા બાદ બેંગલુરુ પોલીસે તાત્કાલિક નોંધ લીધી છે. પોલીસ તપાસમાં જાણવા મળ્યું છે કે આ શખ્સ આ વિસ્તારમાં અગાઉ પણ આવી અનેક હરકતો કરી ચૂક્યો છે અને અન્ય મહિલાઓએ પણ તેના વિશે ભૂતકાળમાં ફરિયાદો કરી હતી. હાલ આ શખ્સ વિરુદ્ધ FIR દાખલ કરવામાં આવી છે અને કાયદેસરની કાર્યવાહી હાથ ધરાઈ છે.
પીડિતાનો વેધક સવાલ: “સુરક્ષા ક્યાં છે?”
યુવતીએ પોતાની પોસ્ટમાં લખ્યું છે કે, “મને ભીડમાં પણ સંપૂર્ણ અસુરક્ષિત અનુભવ થતો હતો. આપણને હંમેશા આવી ઘટનાઓને નજરઅંદાજ કરવાનું શીખવવામાં આવે છે, પરંતુ ચૂપ રહેવાથી આવા લોકોની હિંમત વધે છે.” તેણે વધુમાં ઉમેર્યું કે મહિલાઓની સુરક્ષા ભીડથી નહીં પણ ગુનેગારમાં રહેલા કાયદાના ડરથી જ સુનિશ્ચિત થઈ શકે છે.
સોશિયલ મીડિયા પર રોષ:
આ વીડિયો વાયરલ થતા જ હજારો લોકોએ પોતાની પ્રતિક્રિયા આપી છે. ઘણા લોકોએ ત્યાં હાજર અન્ય લોકોના મૌન પર સવાલ ઉઠાવ્યા છે કે ધોળે દિવસે આવી હરકત થતી હોવા છતાં કોઈએ પણ દરમિયાનગીરી કેમ ન કરી?
