રાજ્યમાં વધુ એક વાર વરસાદી માહોલ જામશે
ગુજરાતમાં ફરીથી વરસાદી માહોલ સર્જાય તેવા સંકેતો હવામાન નિષ્ણાત અંબાલાલ પટેલે આપ્યા છે. તેઓએ જણાવ્યું કે જુલાઈના છેલ્લા દિવસોમાં તેમજ ઓગસ્ટના શરૂઆતના દિવસોમાં રાજ્યના વિવિધ વિસ્તારોમાં ભારેથી અતિભારે વરસાદ પડી શકે છે. હાલ ચાર હવામાની સ્થિતિઓ એકસાથે સક્રિય થઈ રહી છે જેના કારણે સમગ્ર ગુજરાતમાં મેઘરાજાની તીવ્ર હાજરી રહેશે.
દોઢ કિલોમીટર ઊંચાઈએ પવનની સ્થિતિ અનુકૂળ
અંબાલાલ પટેલે જણાવ્યું કે દોઢ કિલોમીટર ઊંચાઈએ પવનની દિશા અને ગતિની સ્થિતિ ખૂબ જ અનુકૂળ છે, જે વરસાદ માટે અનુકૂળ માહોલ ઉભો કરે છે. આવતી ૨૯ જુલાઈ સુધીમાં રાજ્યના ઘણા વિસ્તારોમાં ૧૦થી ૧૨ ઇંચ જેટલો વરસાદ પડી શકે છે, ખાસ કરીને મધ્ય અને પૂર્વ ભાગો માટે ભારે ચેતવણી અપાઈ છે.
આ વિસ્તારોમાં ભારે વરસાદની શક્યતાઓ
અંબાલાલ પટેલે જણાવ્યા મુજબ મહીસાગર અને પંચમહાલના વિસ્તારોમાં ભારે થી અતિભારે વરસાદ પડવાની શક્યતાઓ છે. ઉપરાંત મોરબી, લીમડી, ચોટીલા, થાન જેવા સ્થળો અને દક્ષિણ સૌરાષ્ટ્રના વિસ્તારોમાં પણ વરસાદની તીવ્રતા નોંધાશે. પશ્ચિમ સૌરાષ્ટ્રમાં ઝાપટાં પડે તેવી શક્યતા છે જ્યારે દક્ષિણ ગુજરાતમાં પણ ભારે વરસાદની આગાહી છે.
મધ્ય ગુજરાત સહિત અમદાવાદ-ગાંધીનગર પણ ભીંજાશે
મધ્ય ગુજરાતમાં પણ ભારે વરસાદની શક્યતા રહેલી છે. અમદાવાદ અને ગાંધીનગર જેવા વિસ્તારોમાં પણ મેઘરાજા તીવ્ર ધમાકો કરશે. હવામાન નિષ્ણાતે કહ્યું કે ૩૦ જુલાઈ સુધીનો વરસાદ ખેતી માટે ખૂબ ઉપયોગી નહીં ગણાય કારણ કે તે ખેતરોમાં ઉભા પાકને નુકસાન પહોંચાડી શકે છે.
ઓગસ્ટ મહિનામાં પણ ચાલુ રહેશે વરસાદનો દોર
અંબાલાલ પટેલે આગાહી કરી છે કે ઓગસ્ટમાં પણ જુલાઈ જેવી જ સ્થિતિ રહેશે. ૬થી ૧૦ ઓગસ્ટ દરમિયાન દક્ષિણ ગુજરાતમાં ભારે વરસાદ પડશે… ૧૮થી ૨૦ ઓગસ્ટ વચ્ચે જે વરસાદ પડશે તે ખેડૂતો માટે લાભદાયક સાબિત થઈ શકે છે.
પાક અને જીવજંતુ સંબંધિત ચેતવણી
અંબાલાલ પટેલે જણાવ્યું કે ઓગસ્ટના અંતમાં અને સપ્ટેમ્બરના પ્રથમ સપ્તાહમાં પણ કેટલાક વિસ્તારોમાં પર્વતીય અસરથી ભારે વરસાદ પડશે. આ સાથે જ અગાઉ પડેલા વરસાદના કારણે ખેતરમાં રહેલા પાકમાં નુકસાન થવાની શક્યતા છે. ખાસ કરીને ઝેરી જીવજંતુ જોવા મળવાની શક્યતા ઊભી થઈ રહી છે.
હવામાન નિષ્ણાત અંબાલાલ પટેલે આગામી દિવસોમાં વરસાદની દૃઢ આગાહી સાથે ખેડૂતો અને શહેરી વાસીઓને સતર્ક રહેવા સૂચના આપી છે. વરસાદી પાણીનો યોગ્ય ઉપયોગ કરીને ખેતરમાં નુકસાન અટકાવવું હવે જરૂરી બની ગયુ છે.
