ઇન્ડોનેશિયાની મસ્જિદમાં જુમ્માની નમાઝ દરમિયાન વિસ્ફોટ, 50થી વધુ ઘાયલ
ઇન્ડોનેશિયાની રાજધાની જકાર્તામાં એક સ્કૂલ મસ્જિદમાં જુમ્માની નમાઝ દરમિયાન થયેલા વિસ્ફોટોમાં 50થી વધુ લોકો ઘાયલ થયા છે, જેમાં 15 વિદ્યાર્થીઓ અને 5 શિક્ષકોનો સમાવેશ થાય છે. આ ઘટના કેલાપા ગેડિંગ સ્થિત નેવી કેમ્પસમાં બની હતી.
ઇન્ડોનેશિયાની રાજધાની જકાર્તામાં આવેલા કેલાપા ગેડિંગ વિસ્તારની એક મસ્જિદમાં શુક્રવારે બપોરે જોરદાર વિસ્ફોટ થયો. રિપોર્ટ્સ અનુસાર, સ્ટેટ સિનિયર હાઇ સ્કૂલ 72 (SMA નેગેરી 72) ની મસ્જિદમાં આ વિસ્ફોટ જુમ્માની નમાઝના સમયે થયા હતા. આ વિસ્ફોટમાં ઓછામાં ઓછા 15 વિદ્યાર્થીઓ અને 5 શિક્ષકો ઘાયલ થયા છે. આ સ્કૂલ નેવી કમ્પાઉન્ડની અંદર આવેલી હોવાથી તરત જ નેવીના જવાનો અને પોલીસ ત્યાં પહોંચી ગયા હતા. વિસ્ફોટ બપોરે લગભગ 12:30 વાગ્યે થયો હતો.
અચાનક થયો જોરદાર વિસ્ફોટ
પ્રત્યક્ષદર્શીઓના જણાવ્યા અનુસાર, મસ્જિદના મુખ્ય હોલની પાછળની બાજુએથી મોટો અવાજ આવ્યો અને ત્યાં ધૂમાડો ફેલાઈ ગયો. નમાજીઓ આમ-તેમ દોડવા લાગ્યા. ગણિતના શિક્ષક બુદિ લક્સનોએ જણાવ્યું, ‘ખુત્બો (પ્રવચન) શરૂ જ થયો હતો કે અચાનક જોરદાર વિસ્ફોટ થયો. રૂમમાં ધૂમાડો ભરાઈ ગયો. બાળકો રડતા-બૂમો પાડતા બહાર ભાગ્યા, કેટલાક પડી ગયા.’
મોટાભાગના ઘાયલોને કાચના ટુકડાઓથી ઈજા થઈ હતી અથવા વિસ્ફોટના અવાજથી કાન પર અસર થઈ હતી. તમામને નજીકની કેલાપા ગેડિંગ ક્લિનિકમાં લઈ જવામાં આવ્યા હતા. તેમની સ્થિતિ ભયમુક્ત છે.
નેવીના જવાનો ઘટનાસ્થળે તૈનાત
વિસ્ફોટ બાદ તરત જ નેવીના જવાનો અને જકાર્તા પોલીસે સમગ્ર વિસ્તારને ઘેરી લીધો. બોમ્બ સ્ક્વોડે મસ્જિદ અને આસપાસના વિસ્તારની સંપૂર્ણ તલાશી લીધી. પોલીસે જણાવ્યું, ‘પ્રાથમિક તપાસમાં વિસ્ફોટનું કારણ સ્પષ્ટ થયું નથી. શોર્ટ સર્કિટ અથવા કોઈ ઇલેક્ટ્રોનિક ડિવાઇસની ખરાબી હોઈ શકે છે. પરંતુ ઘટનાસ્થળેથી શંકાસ્પદ વસ્તુઓ મળી છે, જેમ કે ઘરમાં બનાવેલા બોમ્બ જેવા પાર્ટ્સ, રિમોટ કંટ્રોલ, એરસોફ્ટ ગન અને રિવોલ્વર પ્રકારના હથિયારો.’
ઘટનાની તપાસ ચાલુ
પોલીસે જણાવ્યું કે વિસ્ફોટ સંબંધિત તપાસ ચાલુ છે. તમામ વસ્તુઓની ફોરેન્સિક અને બોમ્બ ડિસ્પોઝલ એક્સપર્ટ્સ દ્વારા તપાસ કરવામાં આવશે. અત્યારે કોઈ પણ પ્રકારનો દાવો કરવો ઉતાવળ ગણાશે. હાલમાં સ્કૂલ બંધ કરી દેવામાં આવી છે અને વિસ્તારમાં કડક પહેરો છે. પોલીસ જલ્દી જ સંપૂર્ણ રિપોર્ટ જાહેર કરશે.
