અમેરિકન વિદેશ નીતિમાં મોટો ફેરફાર? ઇરાકના રાજદૂત બન્યા ઇન્સ્ટાગ્રામ ઇન્ફ્લુએન્સર અને કેનાબીસ ઉદ્યોગપતિ.
અમેરિકાના રાષ્ટ્રપતિ બન્યા ત્યારથી જ ડોનાલ્ડ ટ્રમ્પ તેમના વિવાદાસ્પદ નિર્ણયોને કારણે ચર્ચામાં રહ્યા છે. હવે તેમણે ગાંજો વેચતા અને તેનો પ્રચાર કરતા એક ઉદ્યોગપતિને ઇરાકના વિશેષ દૂત તરીકે નિયુક્ત કરવાની જાહેરાત કરી છે. વ્હાઇટ હાઉસના જણાવ્યા અનુસાર, રાષ્ટ્રપતિ ટ્રમ્પે મિશિગનના પ્રખ્યાત ઉદ્યોગપતિ માર્ક સવાયા ને ઇરાકના વિશેષ દૂત બનાવ્યા છે. સવાયા ઇન્સ્ટાગ્રામ ઇન્ફ્લુએન્સર પણ છે.
ટ્રમ્પે સવાયાને લઈને એક પોસ્ટ પણ કરી છે. તેમણે સવાયાને સમજદાર ગણાવતા લખ્યું છે કે, “મને આ જાહેરાત કરતાં ખુશી થાય છે કે સવાયા ઇરાક માટે વિશેષ દૂત તરીકે કામ કરશે. માર્કની અમેરિકન સંબંધોની ઊંડી સમજ અને આ ક્ષેત્રમાં તેમના સંપર્કો અમેરિકન લોકોના હિતોને આગળ વધારવામાં મદદ કરશે.”ઇરાક મિડલ ઇસ્ટ (મધ્ય પૂર્વ) નો એક દેશ છે, જે ઈરાન ની નજીક આવેલો છે. હાલમાં ઇરાક અને અમેરિકા વચ્ચે બધું બરાબર ચાલી રહ્યું નથી. આવી સ્થિતિમાં, માર્ક સવાયાની નિમણૂકે વોશિંગ્ટનથી બગદાદ સુધી ખળભળાટ મચાવી દીધો છે.
સવાયા પર ગાંજો વેચવાનો આરોપ
‘ધ ઇન્ડિપેન્ડન્ટ’ (The Independent) એ સવાયા વિશે એક અહેવાલ પ્રકાશિત કર્યો છે. આ અહેવાલમાં કહેવામાં આવ્યું છે કે સવાયા મિશિગનમાં ગાંજો વેચતી દુકાનોની એક શૃંખલા ચલાવે છે. તેઓ ઇન્સ્ટાગ્રામ અને અન્ય પ્લેટફોર્મ દ્વારા તે દુકાનોનું ઘણું પ્રમોશન પણ કરતા રહ્યા છે.
અહેવાલમાં કહેવામાં આવ્યું છે કે સવાયા પોતે ડેટ્રોઇટની પશ્ચિમમાં હેઝલ પાર્ક અને લિયોનોઇસમાં ‘લીફ એન્ડ બડ’ (Leaf and Bud) નામની મારિજુઆના રિટેલ સ્ટોર ચેઇન ના માલિક છે. મિશિગનમાં ગાંજાનું વેચાણ વર્ષ 2018 થી કાયદેસર છે.
સવાયાને અગાઉ સરકારમાં કામ કરવાનો કોઈ અનુભવ નથી. આવી સ્થિતિમાં, તેમને આટલું મોટું પદ કેવી રીતે આપવામાં આવ્યું, તે અંગે પણ સવાલો ઉઠી રહ્યા છે.
ઇરાક-યુએસ સંબંધો બગડી રહ્યા છે
સદ્દામ હુસૈનની હત્યા પછી એટલે કે 2003 થી અમેરિકા ઇરાકની રાજનીતિ પર હાવી રહ્યું છે, પરંતુ તાજેતરના દિવસોમાં બંનેના સંબંધો બગડ્યા છે. આના બે કારણો છે: એક તો ઇરાકની સત્તા હવે અમેરિકન દખલગીરી ઇચ્છતી નથી. બીજું, ઇરાક અમેરિકાને કારણે મધ્ય પૂર્વમાં પોતાની રણનીતિ નક્કી કરી શકતું નથી.
અમેરિકાને આશ્ચર્યચકિત કરવા માટે, તાજેતરમાં ઇરાકે ઈરાન સાથે એક સમજૂતી કરી છે. આ સમજૂતીમાં કહેવામાં આવ્યું છે કે ઈરાન ઇરાકની સીમાની અંદર આવીને પણ કોઈપણ બાહ્ય દુશ્મન પર હુમલો કરી શકે છે. આ કરાર ઇઝરાયેલ અને અમેરિકાને ધ્યાનમાં રાખીને કરવામાં આવ્યો છે.
