5-સ્ટાર સેફ્ટી સાથે ₹7.59 લાખની આ SUV એ મચાવી ધૂમ, ફીચર્સના દમ પર બની નંબર-1
ભારતીય બજારમાં સ્કોડાની કારો પ્રત્યેનો ક્રેઝ સતત વધી રહ્યો છે. માર્ચ 2026ના સેલ્સ રિપોર્ટ અનુસાર, સ્કોડાની નવી કોમ્પેક્ટ SUV ‘કાઈલાક’ (Skoda Kylaq) એ વેચાણની બાબતમાં મેદાન મારી લીધું છે. આ કારે કંપનીના અન્ય તમામ મોડલ્સને પાછળ છોડીને પ્રથમ સ્થાન હાંસલ કર્યું છે.
સ્કોડા કાઈલાકનું વેચાણ અને બજારમાં સ્થિતિ
માર્ચ 2026માં સ્કોડા કાઈલાકે કુલ 4,670 યુનિટ્સનું વેચાણ નોંધાવ્યું છે. જોકે, રસપ્રદ વાત એ છે કે માર્ચ 2025માં આ આંકડો 5,327 યુનિટ હતો, એટલે કે વાર્ષિક ધોરણે વેચાણમાં 12%નો ઘટાડો જોવા મળ્યો છે. તેમ છતાં, કંપનીના લાઇનઅપમાં તે સૌથી વધુ વેચાતી કાર રહી છે.
કુશાક અને કોડિઆકનું શાનદાર પ્રદર્શન
વેચાણની યાદીમાં બીજા નંબરે સ્કોડા કુશાક રહી છે, જેણે 2,307 યુનિટ્સ સાથે વાર્ષિક ધોરણે 157%નો અધધ ઉછાળો નોંધાવ્યો છે. ત્રીજા સ્થાને સ્કોડા સ્લેવિયા (887 યુનિટ) રહી, જેમાં 25%નો ઘટાડો જોવા મળ્યો હતો. જ્યારે પ્રીમિયમ SUV સ્કોડા કોડિઆક ચોથા નંબરે રહી, જેણે માત્ર 64 યુનિટ વેચ્યા હોવા છતાં 393%ની જબરદસ્ત વાર્ષિક વૃદ્ધિ દર્શાવી છે.
પ્રીમિયમ ડિઝાઇન અને આકર્ષક લુક
સ્કોડા કાઈલાકની ડિઝાઇન તેને અન્ય કારોથી અલગ પાડે છે. આ SUVમાં બોડી-કલર્ડ ORVMs, આધુનિક LED હેડલાઇટ્સ અને DRLs, 16-ઇંચના વ્હીલ્સ અને બ્લેક-આઉટ B-પિલર જેવા પ્રીમિયમ ફીચર્સ આપવામાં આવ્યા છે. તેની શરૂઆતની એક્સ-શોરૂમ કિંમત માત્ર ₹7.59 લાખ રાખવામાં આવી છે, જે તેને મધ્યમ વર્ગ માટે આકર્ષક બનાવે છે.
દમદાર એન્જિન અને સુરક્ષા (Safety First)
કાઈલાકની સૌથી મોટી તાકાત તેની 5-સ્ટાર સેફ્ટી રેટિંગ છે. એન્જિનની વાત કરીએ તો, તેમાં 1.0L 3-સિલિન્ડર ટર્બો પેટ્રોલ એન્જિન છે, જે 114 bhp પાવર અને 178 Nm ટોર્ક જનરેટ કરે છે. ગ્રાહકોને તેમાં 6-સ્પીડ મેન્યુઅલ અથવા ઓટોમેટિક ગિયરબોક્સનો વિકલ્પ મળે છે.
કોની સાથે છે સ્પર્ધા?
ભારતીય માર્કેટમાં સ્કોડા કાઈલાકનો સીધો મુકાબલો ટાટા નેક્સન (Tata Nexon), મારુતિ બ્રેઝા (Maruti Brezza), કિયા સોનેટ (Kia Sonet) અને મહિન્દ્રા XUV 3XO જેવી દિગ્ગજ ગાડીઓ સાથે છે. પોતાની મજબૂત સેફ્ટી અને સ્કોડાની ભરોસાપાત્ર એન્જિન ક્વોલિટીને કારણે તે આ સેગમેન્ટમાં નંબર-1 બની રહી છે.
