ભાવનગરથી નવી મુંબઈ માટે રોજની બે ફ્લાઇટ શરૂ, ઉદ્યોગ-વ્યાપાર અને પ્રવાસન ક્ષેત્રને મળશે પ્રોત્સાહન
ભાવનગરના આંગણે એર કનેક્ટિવિટી ક્ષેત્રે એક નવું સોપાન ઉમેરાયું છે. ૨૯ માર્ચ ૨૦૨૬ના રોજ ભાવનગર એરપોર્ટ ખાતેથી નવી મુંબઈ માટેની સીધી ફ્લાઇટ સેવાનો ભવ્ય શુભારંભ કરવામાં આવ્યો હતો. કેન્દ્રીય નાગરિક ઉડ્ડયન મંત્રી કે. રામમોહન નાયડુએ આ પ્રથમ ફ્લાઇટને લીલી ઝંડી આપી પ્રસ્થાન કરાવ્યું હતું. વિમાનનું એરપોર્ટ પર વોટર સેલ્યુટ દ્વારા ભવ્ય અભિવાદન કરવામાં આવ્યું હતું. આ પ્રસંગે કેન્દ્રીય રાજ્યમંત્રી નિમુબેન બાંભણિયા અને રાજ્યના કૃષિમંત્રી જીતુભાઈ વાઘાણી સહિતના મહાનુભાવોની ગરિમામય ઉપસ્થિતિ રહી હતી, જેમણે આ સુવિધાને ભાવનગરના વિકાસ માટે ગેમ-ચેન્જર ગણાવી હતી.
દેશ અને દુનિયા સાથે ભાવનગરનું જોડાણ હવે બનશે વધુ સરળ
કેન્દ્રીય મંત્રી કે. રામમોહન નાયડુએ સંબોધનમાં જણાવ્યું હતું કે ભાવનગરથી નવી મુંબઈની આ કનેક્ટિવિટી માત્ર બે શહેરો વચ્ચેનું અંતર ઘટાડવા પૂરતી મર્યાદિત નથી, પરંતુ તે ભાવનગરને દેશ અને દુનિયાના અન્ય મોટા કેન્દ્રો સાથે જોડવાનું કામ કરશે. લાંબા સમયથી ભાવનગરના સાંસદ અને કેન્દ્રીય મંત્રી નિમુબેન બાંભણીયા દ્વારા આ માર્ગ પર ફ્લાઇટ શરૂ કરવા માટે રજૂઆતો કરવામાં આવી રહી હતી, જેનો સુખદ અંત આવ્યો છે. આ નવી હવાઈ સેવાને કારણે મુસાફરોનો સમય બચશે અને ભાવનગરની આર્થિક ગતિવિધિઓને નવું બળ મળશે.
ઈન્ડિગો એરલાઇન્સ દ્વારા દરરોજ સવાર-સાંજ બે ફ્લાઇટનું સંચાલન
આ નવા રૂટ પર ઈન્ડિગો એરલાઇન્સ દ્વારા મુસાફરોની સુવિધા માટે દરરોજ બે ફ્લાઇટ સંચાલિત કરવામાં આવશે. નિર્ધારિત સમયપત્રક મુજબ સવારે ૮:૩૫ કલાકે અને રાત્રે ૮:૫૦ કલાકે ફ્લાઇટ નવી મુંબઈ માટે ઉડાન ભરશે. આ સુવિધા ઉપલબ્ધ થવાથી ભાવનગરના હીરા ઉદ્યોગ, શિપ બ્રેકિંગ ઉદ્યોગ અને પ્રવાસન ક્ષેત્રને સીધો મોટો ફાયદો થવાની અપેક્ષા છે. વ્યાપારીઓ અને પ્રવાસીઓ હવે મુંબઈ પહોંચીને ત્યાંથી અન્ય આંતરરાષ્ટ્રીય ફ્લાઇટ્સ પણ સરળતાથી પકડી શકશે, જે કનેક્ટિવિટીને વધુ મજબૂત બનાવશે.
દિવ્યાંગ મુસાફરોની સહભાગીતા અને વહીવટી તંત્રની ગરિમામય હાજરી
આ પ્રથમ ફ્લાઇટમાં એક પ્રેરણાદાયી દ્રશ્ય જોવા મળ્યું હતું, જેમાં અન્ય મુસાફરોની સાથે ૩૦ જેટલા દિવ્યાંગ મુસાફરોએ પણ ઉત્સાહભેર મુસાફરી કરી હતી. કાર્યક્રમ દરમિયાન જિલ્લા કલેક્ટર ડૉ. મનીષ કુમાર બંસલ, મ્યુનિસિપલ કમિશનર અને એરપોર્ટ ઓથોરિટીના ઉચ્ચ અધિકારીઓ હાજર રહ્યા હતા. કેન્દ્રીય મંત્રી નિમુબેન બાંભણિયાએ આ ક્ષણને ભાવનગર માટે ગૌરવવંતી ગણાવી પ્રધાનમંત્રી નરેન્દ્ર મોદીનો આભાર માન્યો હતો. આ નવી સેવાથી ભાવનગરના નાગરિકોમાં ખુશીની લહેર જોવા મળી છે અને સ્થાનિક અર્થતંત્રને વેગ મળવાની આશા બંધાઈ છે.
