પંતની વાપસીથી વેસ્ટ ઈન્ડિઝ સિરીઝમાં રાહત – હવે ટીમ ઈન્ડિયાને મળશે મોટી મજબૂતી!
ઋષભ પંત લાંબા સમયથી ટીમ ઈન્ડિયામાંથી બહાર છે. પંતને ઇંગ્લેન્ડના પ્રવાસ દરમિયાન ઈજા થઈ હતી, ત્યારબાદથી તે મેદાનથી દૂર છે. પંત ભારત અને વેસ્ટ ઈન્ડિઝ વચ્ચે રમાઈ રહેલી ટેસ્ટ શ્રેણીનો પણ ભાગ નથી.
ભારત અને વેસ્ટ ઈન્ડિઝ વચ્ચે 2 મેચોની ટેસ્ટ શ્રેણી ચાલી રહી છે, જેમાં ટીમ ઈન્ડિયા પહેલી મેચ જીતીને 1-0થી આગળ છે. હવે 10 ઓક્ટોબરથી દિલ્હીમાં બીજી ટેસ્ટ મેચ રમાશે. આ મેચ પહેલા ટીમ ઈન્ડિયા માટે મોટી ખુશખબરી આવી છે. ટીમમાંથી બહાર ચાલી રહેલા ઋષભ પંતની વાપસી અંગે મોટી માહિતી સામે આવી છે.
એવું માનવામાં આવી રહ્યું છે કે ઋષભ પંત 25 ઓક્ટોબરથી શરૂ થનારી 2025-26 રણજી ટ્રોફીના બીજા રાઉન્ડમાં મેદાન પર વાપસી કરી શકે છે. જ્યારે, તે ટીમ ઈન્ડિયા માટે 14 નવેમ્બરથી સાઉથ આફ્રિકા વિરુદ્ધની બે મેચોની શ્રેણી દરમિયાન ટેસ્ટ ક્રિકેટમાં કમબેક કરી શકે છે.
શું પંતની વાપસી જલ્દી થશે?
માનવામાં આવે છે કે પંત રિહેબિલિટેશનના અંતિમ તબક્કામાં છે અને આ સપ્તાહના અંતે બેંગલુરુ સ્થિત સેન્ટર ઓફ એક્સેલન્સ (COE) માં તેની ફિટનેસનું આકલન કરવામાં આવશે.
ત્રણ અઠવાડિયા કરતાં પણ વધુ સમય પહેલાં તેના પગનો પ્લાસ્ટર હટાવી દેવામાં આવ્યો હતો અને હવે તે કોઈ પણ મુશ્કેલી વિના ચાલી-ફરી રહ્યો છે.
તે મોબિલિટી એક્સરસાઇઝ અને વેઇટ ટ્રેનિંગ દ્વારા પગને મજબૂત બનાવવા પર કામ કરી રહ્યો છે અને તેણે ફરીથી બેટિંગ શરૂ કરી દીધી છે.
જો પંતને મંજૂરી મળી જાય છે, તો તેના દિલ્હી ટીમ સાથે જોડાવાની અપેક્ષા છે, જે 15 ઓક્ટોબરથી હૈદરાબાદ સામે રણજી ટ્રોફીના શરૂઆતના રાઉન્ડમાં રમશે. જોકે, DDCA અનુસાર, પંતનું રમવું થોડું શંકાસ્પદ છે.
ઇંગ્લેન્ડ ટૂર પર ઈજા થઈ હતી
ઉલ્લેખનીય છે કે, ભારત-ઇંગ્લેન્ડની ચોથી ટેસ્ટ મેચમાં ક્રિસ વોક્સના બોલ પર રિવર્સ સ્વીપ માર્યા બાદ પંત મેદાનમાંથી બહાર છે. ઈજાગ્રસ્ત થતાં તેને રિટાયર્ડ હર્ટ થવું પડ્યું હતું, જેના બાદ સ્કેનમાં ફ્રેક્ચરની પુષ્ટિ થઈ હતી. પછીના દિવસે પંત બેટિંગ માટે પરત ફર્યો હતો, પરંતુ વિકેટકીપિંગ કરી શક્યો નહોતો. તે ચાર ટેસ્ટ મેચોમાં બે સદી અને ત્રણ અર્ધસદી સહિત 479 રન બનાવી શક્યો હતો.
પંત હાલમાં ટીમ ઈન્ડિયાનો ભાગ નથી. તેની ગેરહાજરીમાં ભારતે વેસ્ટ ઈન્ડિઝ સામેની ચાલી રહેલી ટેસ્ટ શ્રેણી માટે ધ્રુવ જુરેલ અને એન. જગદીશનને વિકેટકીપર તરીકે પસંદ કર્યા છે. પંત ઓસ્ટ્રેલિયાના પ્રવાસમાં પણ ટીમનો ભાગ નહીં હોય, કારણ કે તેને COE તરફથી રમવા માટે વાપસીનું સર્ટિફિકેટ મળ્યું નથી.
આ સ્થિતિમાં, પંત થોડા સમય માટે દિલ્હીની કેપ્ટનશીપ કરી શકે છે. હાલમાં, ટીમનું નેતૃત્વ લખનઉ સુપર જાયન્ટ્સમાં પંતના IPL ટીમના સાથી આયુષ બદોની કરશે.
