ભારત Vs ઓસ્ટ્રેલિયા: ત્રીજી વનડેમાં કેમ નથી રમી રહ્યો નીતીશ કુમાર રેડ્ડી? બીસીસીઆઈએ આપ્યું મોટું અપડેટ
ઓસ્ટ્રેલિયાના કેપ્ટન મિશેલ માર્શે ભારત સામેની ત્રીજી ODI મેચમાં ટોસ જીતીને પહેલા બેટિંગ કરવાનો નિર્ણય લીધો. ભારતીય ટીમે પોતાની પ્લેઇંગ ઇલેવનમાં ૨ મોટા ફેરફાર કર્યા છે.
ભારત અને ઓસ્ટ્રેલિયા વચ્ચે ત્રણ મેચોની ODI સિરીઝની ત્રીજી અને અંતિમ મેચ સિડની ક્રિકેટ ગ્રાઉન્ડ (SCG) ખાતે રમાઈ રહી છે. આ મેચમાં ઓસ્ટ્રેલિયાના કેપ્ટન મિશેલ માર્શે ટોસ જીતીને પહેલા બેટિંગ કરવાનો નિર્ણય લીધો. ટોસની સાથે જ ટીમ ઈન્ડિયા માટે વધુ એક નિરાશાજનક આંકડો જોડાઈ ગયો છે. ભારતે સતત ૧૮મી વખત ODI માં ટોસ હાર્યો છે, જેની શરૂઆત ૨૦૨૩ વર્લ્ડ કપ ફાઇનલથી થઈ હતી.
ભારતીય ટીમમાં ૨ મોટા ફેરફાર
ભારતીય ટીમમાં આ મુકાબલા માટે બે ફેરફાર કરવામાં આવ્યા છે. કુલદીપ યાદવ અને પ્રસિદ્ધ કૃષ્ણાને પ્લેઇંગ ઇલેવનમાં સ્થાન આપવામાં આવ્યું છે, જ્યારે અર્શદીપ સિંહ અને નીતીશ કુમાર રેડ્ડીને બહાર રાખવામાં આવ્યા છે. નીતીશ રેડ્ડીને પ્લેઇંગ ઇલેવનમાંથી બહાર રાખવાનું કારણ પણ સામે આવ્યું છે. રેડ્ડીને તેના ખરાબ ફોર્મને કારણે નહીં પણ ઈજાને કારણે પ્લેઇંગ ઇલેવનમાંથી બહાર રહેવું પડ્યું છે. BCCIએ આ માહિતી આપી છે.
BCCIએ આપ્યું મોટું અપડેટ
સિડની ODIમાં ટોસની તરત જ બાદ BCCIએ નિવેદન જાહેર કરીને કહ્યું કે નીતીશ રેડ્ડીને એડિલેડમાં રમાયેલી બીજી ODI દરમિયાન ડાબા પગની જાંઘ (લેફ્ટ ક્વાડ્રિસેપ્સ) માં ઈજા થઈ હતી. આ જ કારણોસર તે ત્રીજી વનડે માટે ઉપલબ્ધ થઈ શક્યો નહીં. તેમની સ્થિતિ પર BCCIની મેડિકલ ટીમ સતત નજર રાખી રહી છે.
નીતીશ રેડ્ડીની આ ઈજા ટીમ ઈન્ડિયા માટે સારા સમાચાર નથી, કારણ કે ODI સિરીઝ પછી ભારતીય ખેલાડીઓ T20I સિરીઝમાં ઓસ્ટ્રેલિયા સામે ટકરાતા જોવા મળશે. આ સિરીઝ માટે નીતીશ રેડ્ડીને ભારતીય ટીમમાં જગ્યા મળી છે. હવે જોવાનું એ રહેશે કે નીતીશ રેડ્ડી ક્યારે ફિટ થઈને ટીમ ઈન્ડિયામાં વાપસી કરી શકે છે. જણાવી દઈએ કે, ૫ મેચોની T20I સિરીઝ ૨૯ ઓક્ટોબરથી શરૂ થશે, જ્યારે અંતિમ મુકાબલો ૮ નવેમ્બરના રોજ રમાશે.
🚨 Update 🚨
Nitish Kumar R eddy sustained a left quadriceps injury during the second ODI in Adelaide and was subsequently unavailable for selection for the third ODI. The BCCI Medical Team is monitoring him on a daily basis.#TeamIndia | #AUSvIND | @NKReddy07 pic.twitter.com/8vBt1f5e5f
— BCCI (@BCCI) October 25, 2025
બંને ટીમોની પ્લેઇંગ ઇલેવન
ભારતની પ્લેઇંગ ઇલેવન: રોહિત શર્મા, શુભમન ગિલ (કેપ્ટન), વિરાટ કોહલી, શ્રેયસ ઐયર, અક્ષર પટેલ, કેએલ રાહુલ (વિકેટ કીપર), વોશિંગ્ટન સુંદર, હર્ષિત રાણા, કુલદીપ યાદવ, મોહમ્મદ સિરાજ, પ્રસિદ્ધ કૃષ્ણા.
ઓસ્ટ્રેલિયાની પ્લેઇંગ ઇલેવન: મિશેલ માર્શ (કેપ્ટન), ટ્રેવિસ હેડ, મેથ્યુ શોર્ટ, મેટ રેનશો, એલેક્સ કેરી (વિકેટ કીપર), કૂપર કોનોલી, મિશેલ ઓવેન, નાથન એલિસ, મિશેલ સ્ટાર્ક, એડમ ઝમ્પા, જોશ હેઝલવુડ.
