10 મિનિટમાં ડિલિવરીના ચક્કરમાં મળી રહ્યું છે સડાયેલું ખાણું?
આજના ભાગદોડભર્યા જીવનમાં ‘ક્વિક કોમર્સ’ એપ જેવી કે બ્લિંકિટ, ઝેપ્ટો કે અન્ય સર્વિસ આપણા માટે આશીર્વાદ સમાન બની ગઈ છે. સવારની ચા માટે દૂધ હોય કે રાત્રિના ભોજન માટે જરૂરી શાકભાજી કે દહીં, બધું જ માત્ર 10-15 મિનિટમાં ઘરના દરવાજે પહોંચી જાય છે. પરંતુ, શું તમે ક્યારેય વિચાર્યું છે કે આ ઝડપની પાછળ કઈ કિંમત ચૂકવવી પડી શકે છે? તાજેતરમાં બનેલી એક ઘટનાએ સમગ્ર દેશમાં ખળભળાટ મચાવી દીધો છે, જ્યાં બ્લિંકિટ પરથી મંગાવેલું દહીં ખાધા બાદ એક ગ્રાહકની તબિયત ગંભીર રીતે લથડી હતી.
શું બની હતી ઘટના?
ઘટનાની વિગતો એવી છે કે, એક ગ્રાહકે બ્લિંકિટ એપ દ્વારા દહીં ઓર્ડર કર્યું હતું. ઓર્ડર મળ્યા બાદ જેવું તેમણે દહીં ખાવાનું શરૂ કર્યું, થોડી જ વારમાં તેમને પેટમાં અસહ્ય દુખાવો શરૂ થયો. આ સાથે જ તેમને ઉલટી અને ઝાડાની ગંભીર સમસ્યા પણ થઈ. સ્થિતિ એટલી હદે બગડી ગઈ કે તેમને તાત્કાલિક હોસ્પિટલ દોડવું પડ્યું. આ મામલો માત્ર એક વ્યક્તિના સ્વાસ્થ્ય પૂરતો સીમિત ન રહ્યો, પરંતુ તેણે ગ્રાહકોની સુરક્ષા સાથે જોડાયેલા મોટા સવાલો ઊભા કર્યા છે.
પીડિત ગ્રાહકે પોતાની મેડિકલ રિપોર્ટ અને ફરિયાદ સાથે ભારતીય ખાદ્ય સુરક્ષા અને માનક પ્રાધિકરણ (FSSAI) નો સંપર્ક કર્યો. આ ગંભીર ફરિયાદને ધ્યાનમાં લઈને FSSAI એ તાત્કાલિક અસરથી બ્લિંકિટ (Blink Commerce Pvt Ltd) ને નોટિસ ફટકારી છે. 29 મેના રોજ મોકલવામાં આવેલી આ નોટિસમાં કંપનીના સીઈઓ અને ઓપરેશન્સ હેડ પાસેથી આ મામલે લેખિતમાં સ્પષ્ટતા અને સંપૂર્ણ રિપોર્ટ માંગવામાં આવ્યો છે.
માત્ર એક કેસ નથી, સમસ્યા ગંભીર છે
જો તમને એમ લાગતું હોય કે આ એકલદોકલ ઘટના છે, તો તમે ખોટા છો. છેલ્લા કેટલાક સમયથી સોશિયલ મીડિયા પર આવા અનેક કિસ્સાઓ સામે આવી રહ્યા છે, જ્યાં ગ્રાહકો દાવો કરી રહ્યા છે કે તેમને ઓનલાઈન ડિલિવરીમાં સડેલી વસ્તુઓ, એક્સપાયર્ડ પ્રોડક્ટ્સ અથવા ખૂબ જ ખરાબ ગુણવત્તાનો સામાન મળ્યો છે.
આ મહિનાની શરૂઆતમાં જ ખરાબ ગુણવત્તાના ઈંડા વેચવા અંગે બ્લિંકિટ સામે ગ્રાહકોએ ભારે આક્રોશ વ્યક્ત કર્યો હતો. તે સમયે પણ FSSAI એ કંપની પાસેથી જવાબ માંગ્યો હતો. વારંવાર બનતી આ પ્રકારની ઘટનાઓ દર્શાવે છે કે ક્વિક કોમર્સ કંપનીઓની ડિલિવરી ચેઈનમાં ગુણવત્તાની તપાસ (Quality Control) માં મોટી ખામીઓ રહી ગઈ છે. 10 મિનિટમાં ડિલિવરી કરવાના ચક્કરમાં ગ્રાહકોના સ્વાસ્થ્ય સાથે ચેડાં થઈ રહ્યા છે.
જવાબદારીમાંથી કોઈ બચી શકતું નથી
ફૂડ સેફ્ટી કાયદા મુજબ, ઈ-કોમર્સ દ્વારા ખોરાક કે કરિયાણું વેચતી તમામ કંપનીઓ (E-commerce FBOs) ની નૈતિક અને કાયદાકીય જવાબદારી છે કે તેઓ ગ્રાહક સુધી સુરક્ષિત, સ્વચ્છ અને યોગ્ય ગુણવત્તાનો સામાન પહોંચાડે. આ કંપનીઓ પોતાની જવાબદારીમાંથી પલ્લાં ઝાડી શકતી નથી. માત્ર એક ડિલિવરી એપ હોવાના નાતે તેઓ પ્રોડક્ટની ગુણવત્તા માટે જવાબદાર નથી, એવું કહીને તેઓ હવે છટકી શકશે નહીં.
FSSAI ની આ કાર્યવાહી સ્પષ્ટ સંદેશ આપે છે કે જો ગ્રાહકોના સ્વાસ્થ્ય સાથે રમત કરવામાં આવશે, તો નિયમનકારી સંસ્થાઓ ચૂપ બેસશે નહીં. માત્ર બ્લિંકિટ જ નહીં, તાજેતરમાં FSSAI એ IRCTC ને પણ નોટિસ ફટકારી છે. ટ્રેનમાં પીરસવામાં આવતા ભોજનના વાસણો ટ્રેનના ટોયલેટમાં ધોવાતા હોવાનો એક વીડિયો વાયરલ થયા બાદ આ પગલું લેવામાં આવ્યું હતું. આ સાબિત કરે છે કે ફૂડ સેફ્ટીના મામલે હવે તંત્ર વધુ સક્રિય બન્યું છે.
ગ્રાહકો તરીકે આપણે શું કરવું જોઈએ?
આ આખી ઘટનામાંથી આપણે ગ્રાહક તરીકે સતર્ક રહેવાની જરૂર છે:
-
પેકેજિંગ ચેક કરો: જ્યારે પણ કોઈ ક્વિક કોમર્સ એપ પરથી દૂધ, દહીં કે અન્ય પેકેજ્ડ ફૂડ આવે, ત્યારે સૌથી પહેલા તેની એક્સપાયરી ડેટ અને પેકેજિંગ સુરક્ષિત છે કે નહીં તે તપાસો.
-
દૂષિત વસ્તુઓ રિપોર્ટ કરો: જો તમને કોઈ પ્રોડક્ટ શંકાસ્પદ લાગે, તો તેનો ફોટો પાડો, વીડિયો બનાવો અને એપના કસ્ટમર કેરની સાથે સાથે જરૂર પડે તો ગ્રાહક સુરક્ષા મંચ કે FSSAI ને ફરિયાદ કરો.
-
અવાજ ઉઠાવો: સોશિયલ મીડિયા પર તમારી ફરિયાદ મુકો. કંપનીઓ ઘણીવાર ગ્રાહકોના જાહેર આક્રોશ પછી જ જાગે છે.
