Google Pay Payment: જો તમે પણ વારંવાર ગૂગલ પે (Google Pay) અથવા પેટીએમ (Paytm)થી પેમેન્ટ કરો છો તો આ સમાચાર વાંચીને તમને આંચકો લાગશે. હા, 1 એપ્રિલ, 2023થી UPI ટ્રાન્ઝેક્શન મોંઘું થવા જઈ રહ્યું છે. નેશનલ પેમેન્ટ્સ કોર્પોરેશન ઓફ ઈન્ડિયા (NPCI) દ્વારા યુનિફાઈડ પેમેન્ટ ઈન્ટરફેસ (UPI) પેમેન્ટ સંબંધિત એક સર્ક્યુલર જારી કરવામાં આવ્યો છે. તેમાં 1 એપ્રિલથી UPI દ્વારા મર્ચન્ટ ટ્રાન્જેક્શન પર ‘પ્રીપેડ પેમેન્ટ ઇન્સ્ટ્રુમેન્ટ્સ (PPI)’ ચાર્જ લાદવાની ભલામણ કરવામાં આવી છે. આ ફેરફારથી કરોડો લોકોને અસર થશે.
1.1 ટકા સરચાર્જ લગાવવા સૂચવ્યું
NPCI દ્વારા જારી કરાયેલા સર્ક્યુલરમાં 1 એપ્રિલથી 2,000 રૂપિયાથી વધુના ટ્રાન્જેક્શન પર 1.1 ટકા સરચાર્જ લાદવાનું સૂચન કરવામાં આવ્યું છે. આ ચાર્જ મર્ચન્ટ ટ્રાન્ઝેક્શન એટલે કે વેપારીઓને પેમેન્ટ કરનારા ગ્રાહકોને આપવાનો રહેશે. આપને જણાવી દઈએ કે, વોલેટ અથવા કાર્ડ દ્વારા કરવામાં આવેલ ટ્રાન્ઝેક્શન PPIમાં આવે છે. ઈન્ટરચેન્જ ફી સામાન્ય રીતે કાર્ડની ચૂકવણી સાથે સંકળાયેલી હોય છે. તે ટ્રાન્જેક્શન સ્વીકારવા અને ખર્ચ કવર કરવા લેવા માટે ચાર્જ કરવામાં આવે છે.
ડિજિટલ મોડ દ્વારા કરવામાં આવતું પેમેન્ટ મોંઘુ થઈ જશે
નેશનલ પેમેન્ટ્સ કોર્પોરેશન (NPCI) દ્વારા કહેવામાં આવ્યું હતું કે, તેની સમીક્ષા 30 સપ્ટેમ્બર 2023ના રોજ અથવા તે પહેલા કરવામાં આવશે. NPCIના સર્ક્યુલરના આધારે 1 એપ્રિલથી ગૂગલ પે (Google Pay), ફોન પે (Phone Pay) અને પેટીએમ (Paytm) જેવા ડિજિટલ મોડ દ્વારા કરવામાં આવતા પેમેન્ટ્સ મોંઘા થઈ જશે. જો તમે 2,000 રૂપિયાથી વધુનું ટ્રાન્જેક્શન કરો છો, તો તમારે તેના બદલામાં વધુ રૂપિયા ચૂકવવા પડશે.
આપને જણાવી દઈએ કે, એક રિપોર્ટમાં સામે આવ્યું છે કે 70 ટકા UPI ટ્રાન્ઝેક્શન 2,000 રૂપિયાથી વધુના હોય છે. NPCIના સર્ક્યુલરમાં કહેવામાં આવ્યું છે કે 1 એપ્રિલથી નિયમ લાગુ થયા બાદ 30 સપ્ટેમ્બર 2023 પહેલા તેની સમીક્ષા કરવામાં આવશે.
