Economic Survey 2025: ફુગાવામાં રાહતની આશા, ખાદ્ય ચીજવસ્તુઓના ભાવમાં ઘટાડો થવાની શક્યતા
Economic Survey 2025 મુજબ, આગામી દિવસોમાં ફુગાવો નિયંત્રણમાં રહેવાની ધારણા છે, ખાસ કરીને ખાદ્ય ચીજવસ્તુઓના ભાવ ઘટવાની શક્યતા છે. સર્વે મુજબ, શાકભાજીના ભાવમાં ઘટાડો અને ખરીફ પાકના સારા ઉત્પાદનને કારણે નાણાકીય વર્ષ 2024-25ના ચોથા ક્વાર્ટરમાં ખાદ્ય ફુગાવો ઘટવાની ધારણા છે. સર્વેમાં એમ પણ કહેવામાં આવ્યું છે કે રવિ પાકનું સારું ઉત્પાદન નાણાકીય વર્ષ 2025-26માં ખાદ્ય ચીજવસ્તુઓના ફુગાવાને નિયંત્રિત કરશે.
Economic Survey 2025 નાણાકીય વર્ષ 2024-25માં છૂટક ફુગાવાનો દર ચાર વર્ષના નીચલા સ્તર 5.4 ટકા પર લાવવામાં સફળતા મળી છે. જોકે, સર્વેમાં એવી ચેતવણી પણ આપવામાં આવી છે કે ડોલર સામે રૂપિયામાં નબળાઈ, ફુગાવામાં અસ્થિરતા અને વિદેશી રોકાણમાં ઘટાડાને કારણે મેક્રો ઇકોનોમિક સ્થિરતા જોખમમાં છે. વૈશ્વિક અનિશ્ચિતતા પણ એક જોખમ રહેલું છે, જે આગામી મહિનાઓમાં ફુગાવાના સ્તરને અસર કરી શકે છે.
નાણામંત્રી નિર્મલા સીતારમણે સંસદના બંને ગૃહોમાં આ આર્થિક સર્વે રજૂ કર્યો,
જે મુખ્ય આર્થિક સલાહકાર ડૉ. વી. અનંત નાગેશ્વરન દ્વારા તૈયાર કરવામાં આવ્યો હતો. સર્વેમાં એમ પણ કહેવામાં આવ્યું છે કે કન્ઝ્યુમર ફૂડ પ્રાઇસ ઇન્ડેક્સ (CFPI) નાણાકીય વર્ષ 2024-25 ના પ્રથમ નવ મહિના (એપ્રિલ-ડિસેમ્બર) માં 8.4 ટકા પર પહોંચી ગયો છે, જે ગયા વર્ષના સમાન સમયગાળામાં 7.5 ટકા હતો. શાકભાજી અને કઠોળના ભાવમાં વધારાને કારણે ફુગાવાનો દર વધ્યો હતો.
સર્વે મુજબ, નાણાકીય વર્ષ 2025-26માં GDP વૃદ્ધિ દર 6.3 ટકાથી 6.8 ટકાની વચ્ચે રહેવાનો અંદાજ છે. વધુમાં, આર્થિક સર્વેક્ષણમાં ભારત માટે લાંબા ગાળાનો અંદાજ રજૂ કરવામાં આવ્યો છે, જેમાં કહેવામાં આવ્યું છે કે 2047 સુધીમાં વિકસિત ભારત પ્રાપ્ત કરવા માટે આગામી એક થી બે દાયકા સુધી 8 ટકાના દરે આર્થિક વૃદ્ધિ જરૂરી રહેશે.
આર્થિક સર્વેક્ષણ મુજબ, કામદારોના અધિકારોના રક્ષણ માટે હાથ ધરવામાં આવેલા શ્રમ સુધારાઓની સકારાત્મક અસર પડી છે, જેના કારણે રોજગારની તકોમાં વધારો થયો છે. આ સર્વેક્ષણ સરકારની આર્થિક નીતિઓની દિશા અને તેમની સંભવિત અસરો પર વિગતવાર દૃષ્ટિકોણ પ્રદાન કરે છે, જે ભારતીય અર્થતંત્રના વિકાસ માર્ગને સ્થિરતા અને રાહત પ્રદાન કરશે તેવી અપેક્ષા છે.
