છેલ્લા કેટલાક દિવસોમાં મોદી સરકારે એલપીજી સિલિન્ડરની કિંમતમાં 300 રૂપિયાનો ઘટાડો કર્યો છે. જ્યારે ઓગસ્ટમાં રૂ. 200નો ઘટાડો કરવામાં આવ્યો હતો, ત્યારે તાજેતરમાં સરકારે ઉજ્જવલાના લાભાર્થીઓને રૂ. 100ની વધારાની સબસિડીની જાહેરાત કરી હતી. હવે સરકારે એલપીજી વિતરકોનું કમિશન ગત વર્ષે મેમાં નક્કી કરાયેલા ₹64.84થી વધારીને ₹73.08 પ્રતિ સિલિન્ડર કર્યું છે.
નિવેદનમાં શું કહ્યું: પેટ્રોલિયમ મંત્રાલયે ઓઇલ માર્કેટિંગ કંપનીઓ (OMCs)ને મોકલેલા પત્રમાં જણાવ્યું હતું કે સરકારે વિતરકોનું કમિશન 14.2 કિલોગ્રામ સિલિન્ડર દીઠ ₹73.08માં સુધાર્યું છે. જેમાં 39.65 રૂપિયાનો એસ્ટાબ્લિશમેન્ટ ચાર્જ અને 33.43 રૂપિયા પ્રતિ સિલિન્ડરનો ડિલિવરી ચાર્જ સામેલ છે.
તે જ સમયે, સરકારે 5 કિલો સિલિન્ડર પર કમિશન વધારીને 36.54 રૂપિયા પ્રતિ 5 કિલો સિલિન્ડર કરી દીધું છે. જેમાં 19.82 રૂપિયાનો એસ્ટાબ્લિશમેન્ટ ચાર્જ અને 16.72 રૂપિયાનો ડિલિવરી ચાર્જ મંજૂર કરવામાં આવ્યો છે. ગયા વર્ષે મે મહિનામાં મંત્રાલયે 14.2 કિલોના ઘરેલુ સિલિન્ડર માટે 64.84 રૂપિયા કમિશન નક્કી કર્યું હતું.
સરકાર એક્શન મોડમાં છે: આ ફેરફાર એવા સમયે આવ્યો છે જ્યારે સરકાર છૂટક ફુગાવા અને આગામી રાજ્યની ચૂંટણીઓને ધ્યાનમાં રાખીને એલપીજીના ભાવને કાબૂમાં લેવાનાં પગલાંની જાહેરાત કરી રહી છે. જણાવી દઈએ કે 4 ઓક્ટોબરે કેન્દ્રીય કેબિનેટે પ્રધાનમંત્રી ઉજ્જવલા યોજના (PMUY) ના લાભાર્થીઓ માટે LPG પર ₹100ની વધારાની સબસિડીને મંજૂરી આપી હતી, જેનાથી 9 કરોડથી વધુ લાભાર્થીઓ માટે કુલ સબસિડી ₹300 થઈ ગઈ હતી.
વધુમાં, ગયા મહિને કેબિનેટે એલપીજીના ભાવમાં સિલિન્ડર દીઠ રૂ. 200નો ઘટાડો કરવાની મંજૂરી આપી હતી. હવે તાજેતરના નિર્ણય પછી, ઉજ્જવલા લાભાર્થીઓએ એલપીજીના સિલિન્ડર દીઠ ₹603 ચૂકવવા પડશે. તે જ સમયે, રાષ્ટ્રીય રાજધાની દિલ્હીમાં સામાન્ય લોકો માટે સિલિન્ડરની કિંમત ₹903 છે.
