Reliance Disney Merger -મુકેશ અંબાણીની આગેવાની હેઠળની રિલાયન્સે વોલ્ટ ડિઝની સાથે તેના ભારતીય મીડિયા બિઝનેસના વિલીનીકરણ માટે બિન-બંધનકર્તા કરાર પર હસ્તાક્ષર કર્યા છે. ન્યૂઝ એજન્સી રોઈટર્સે ET સૂત્રોને ટાંકીને જણાવ્યું છે કે આ મર્જર ફેબ્રુઆરી 2024 સુધીમાં પૂર્ણ થઈ શકે છે. ભારતીય મીડિયા બિઝનેસમાં આ અત્યાર સુધીનું સૌથી મોટું મર્જર માનવામાં આવે છે.
રિપોર્ટમાં જણાવવામાં આવ્યું છે કે મુકેશ અંબાણીની આગેવાની હેઠળની રિલાયન્સને આ મર્જરમાં 51 ટકા હિસ્સો મળશે. બાકીના 49 ટકા ડિઝનીને મળશે. મર્જરમાં રોકડ અને સ્ટોક સામેલ છે.
ઝી અને સોની વચ્ચે સ્પર્ધા થશે
આ મર્જર પછી RIL અને વોલ્ટ ડિઝની ભારતની સૌથી મોટી મીડિયા કંપની બની જશે. તેની સીધી સ્પર્ધા Zee-Sony, Amazon Prime અને Netflix સાથે થશે. હાલમાં, RIL મીડિયા અને મનોરંજન ક્ષેત્રે Viacom18 સહિત અનેક એપ્સ સાથે હાજર છે. આ મર્જરમાં Jio સિનેમાનો પણ સમાવેશ કરવામાં આવ્યો છે, જેની પાસે IPL ઓનલાઈન પ્રસારણના અધિકારો છે.
1.5 અબજ ડોલર સુધીનું રોકાણ થશે
રિપોર્ટમાં કહેવામાં આવ્યું છે કે આ વર્ષે જાન્યુઆરીની શરૂઆતથી જ ડિઝની તેના ભારતીય બિઝનેસને વેચવા અથવા સંયુક્ત સાહસ માટે ભારતીય ભાગીદારની શોધમાં હતી. ડિઝની પાસે ઘણી ટીવી ચેનલો સાથે હોટસ્ટાર નામનું સ્ટ્રીમિંગ પ્લેટફોર્મ પણ છે. મર્જર પછી બંને પક્ષો મળીને 1 થી 1.5 અબજ ડોલરનું રોકાણ કરી શકે છે.
જાહેરાત આવતા મહિને થઈ શકે છે
મર્જરની જાહેરાત આવતા મહિનાની શરૂઆતમાં થઈ શકે છે. દરખાસ્ત હેઠળ, ડિઝની કોઈપણ રોકડ અને સ્ટોક સ્વેપ ટ્રાન્ઝેક્શન પૂર્ણ થયા પછી ભારતીય કંપનીમાં લઘુમતી હિસ્સો રાખવાનું ચાલુ રાખશે.
