BSE:દેશના અગ્રણી સ્ટોક એક્સચેન્જ BSE એ શુક્રવારે જણાવ્યું હતું કે બેન્કો તરફથી ચૂકવણી મેળવવામાં વિલંબને કારણે 4 જૂને મ્યુચ્યુઅલ ફંડ ખરીદનારા રોકાણકારોને NAV ફાળવવામાં વિલંબ થયો હતો અને તેના તરફથી કોઈ તકનીકી ખામી નહોતી. ઘણા રોકાણકારોએ સોશિયલ મીડિયા પર ફરિયાદ કરી હતી કે તેમને 4 જૂનના રોજ તેમની સ્થિતિને ‘સ્કેર ઑફ’ કરવામાં મુશ્કેલીનો સામનો કરવો પડ્યો હતો.
ઘણા રોકાણકારોએ કટ-ઓફ સમય પહેલા તેમના મ્યુચ્યુઅલ ફંડની ખરીદી કરી હતી પરંતુ તેમને સોંપેલ ‘નેટ એસેટ વેલ્યુ’ (NAV) એ 4 જૂનને બદલે 5 જૂન માટે ફંડનું મૂલ્ય નક્કી કર્યું હતું. જેના કારણે આવા રોકાણકારોને મોટા પાયે આર્થિક નુકસાન સહન કરવું પડ્યું હતું. આના પર BSE એ એક નિવેદનમાં જણાવ્યું હતું કે, “તે સ્પષ્ટ કરવામાં આવે છે કે BSE ક્લિયરિંગ હાઉસ (ICCL) માં 4 જૂને કોઈ તકનીકી ખામી નહોતી. “પ્રથમ દૃષ્ટિએ એવું જણાય છે કે કેટલાક ગ્રાહકો માટે પેમેન્ટ એગ્રીગેટર/બેંક પાસેથી ક્રેડિટ/ચુકવણી વિગતો મેળવવામાં વિલંબ થયો હતો, જેના કારણે NAV ફાળવણીમાં વિલંબ થયો હતો.”
4 જૂનના રોજ, ઘણી બ્રોકિંગ કંપનીઓએ BSEની મ્યુચ્યુઅલ ફંડ ફાળવણી સિસ્ટમમાં અનિયમિતતાનો આક્ષેપ કર્યો હતો. આના કારણે બીજા દિવસે (5 જૂન) ઓર્ડર જારી કરવામાં આવ્યા હતા પરંતુ ત્યાં સુધીમાં ઇક્વિટી બજારોએ તેમની ખોટ અમુક અંશે વસૂલ કરી લીધી હતી. લોકસભા ચૂંટણીના પરિણામોના દિવસે 4 જૂને શેરબજારમાં જોરદાર ઘટાડો થયો હતો, જેમાં રોકાણકારોની 31 લાખ કરોડ રૂપિયાની સંપત્તિ નષ્ટ થઈ હતી. ભાજપને પોતાના દમ પર સ્પષ્ટ બહુમતી ન મળવાને કારણે સેન્સેક્સ 4,390 પોઈન્ટ અથવા છ ટકા ઘટીને 72,079 પોઈન્ટ પર બંધ થયો હતો. આ ચાર વર્ષમાં એક દિવસનો સૌથી મોટો ઘટાડો હતો.
