અમેરિકાને ચીનની ચેતવણી: ઈરાન પર હુમલો કર્યો તો સપ્લાય બંધ
ચીને અમેરિકાને સ્પષ્ટ શબ્દોમાં કહ્યું છે કે જો તે ઈરાન પર લશ્કરી હુમલો કરશે, તો ચીન તરત જ અમેરિકાને કરવામાં આવતી રેર મેટલની નિકાસ રોકી દેશે. ચીન રેર અર્થ મેટલ્સનો દુનિયાનો સૌથી મોટો ઉત્પાદક છે અને અમેરિકા તેની જરૂરિયાતનું લગભગ 90 ટકા રેર મેટલ ચીન પાસેથી જ ખરીદે છે. નિષ્ણાતોના મતે, જો ચીન આ સપ્લાય રોકી દે, તો માત્ર 48 કલાકમાં અમેરિકાનો સંરક્ષણ ઉદ્યોગ ઠપ્પ થઈ શકે છે.
શા માટે રેર મેટલ અમેરિકી સેના માટે કરોડરજ્જુ સમાન છે?
રેર મેટલ વગર આધુનિક યુદ્ધના હથિયારો બનાવવા લગભગ અશક્ય છે. અમેરિકી સેનાના અત્યંત આધુનિક F-35 ફાઈટર જેટ્સ, મિસાઈલ ગાઈડન્સ સિસ્ટમ, રડાર અને સેન્સર બનાવવામાં આ ધાતુઓનો પુષ્કળ ઉપયોગ થાય છે. આ ઉપરાંત, હાઈ-ટેક ઈલેક્ટ્રોનિક ચિપ્સ બનાવવા માટે પણ તે અનિવાર્ય છે. યુએસ આર્મીના રિપોર્ટ અનુસાર, તેમના કુલ સૈન્ય ઉત્પાદન ખર્ચનો 5 ટકા હિસ્સો રેર મેટલ પર આધારિત છે.
ચીન અને ઈરાન વચ્ચેની મોટી હથિયાર ડીલ
માત્ર આર્થિક ધમકી જ નહીં, પરંતુ ચીન હવે ઈરાનને સૈન્ય રીતે પણ મજબૂત કરી રહ્યું છે. અહેવાલો મુજબ, ચીન ઈરાનને CM-302 સુપરસોનિક એન્ટી-શિપ મિસાઈલો વેચવાની તૈયારી કરી રહ્યું છે. આ મિસાઈલો 290 કિમીની રેન્જ ધરાવે છે અને તે દુનિયાના શ્રેષ્ઠ એન્ટી-શિપ મિસાઈલોમાંની એક ગણાય છે. આ મિસાઈલ અમેરિકી એરક્રાફ્ટ કેરિયર કે વિનાશક યુદ્ધજહાજોને પલકવારમાં ડૂબાડી શકે છે, જે મધ્ય પૂર્વમાં અમેરિકી બેઝ માટે મોટો ખતરો છે.
ઈરાન ચીન માટે આટલું મહત્વનું કેમ છે?
ચીન માટે ઈરાન તેની ઉર્જા સુરક્ષાનો મુખ્ય સ્તંભ છે. ચીન દરરોજ ઈરાન પાસેથી આશરે 18 લાખ બેરલ તેલ ખરીદે છે, જે ઈરાનની કુલ તેલ નિકાસના 80 ટકા જેટલું થાય છે. આ સિવાય, જો અમેરિકા અને ઈરાન વચ્ચે યુદ્ધ થાય તો ‘હોર્મુઝની સામુદ્રધુની’ (Strait of Hormuz) બ્લોક થઈ શકે છે. ચીનનો મોટાભાગનો દરિયાઈ વેપાર આ રસ્તેથી થાય છે, તેથી ઈરાનની સુરક્ષા ચીનના આર્થિક હિતો માટે અત્યંત જરૂરી છે.
