ધોલેરા SIRમાં ઈન્ફ્રાસ્ટ્રક્ચર અને કનેક્ટિવિટીની ક્રાંતિ: એરપોર્ટ, એક્સપ્રેસવે અને સેમી હાઈ-સ્પીડ રેલની સ્થળ સમીક્ષા
વડાપ્રધાન નરેન્દ્રભાઈ મોદીના દૂરઅંદેશી વિઝનથી ગુજરાતમાં અનેકવિધ ક્ષેત્રે વૈશ્વિક કક્ષાના ફ્લેગશીપ પ્રોજેક્ટ્સ આકાર લઈ રહ્યા છે. આ વિકાસકાર્યો માત્ર કાગળ પર કે સમીક્ષા બેઠકો સુધી સીમિત ન રહેતા, સમયમર્યાદામાં અને ઉચ્ચ ગુણવત્તા સાથે પૂર્ણ થાય તે માટે રાજ્યના મુખ્યમંત્રી ભૂપેન્દ્ર પટેલે એક વિશેષ અને નવતર અભિગમ અપનાવ્યો છે. મુખ્યમંત્રી પોતે વિવિધ પ્રકલ્પોના નિર્માણ સ્થળે પહોંચીને પ્રગતિનું પ્રત્યક્ષ નિરીક્ષણ કરી રહ્યા છે. આ જ શ્રેણીના ભાગરૂપે તેમણે ધોલેરા સ્પેશિયલ ઇન્વેસ્ટમેન્ટ રિજિયન (DSIR) અને લોથલ ખાતે ચાલી રહેલા મહત્વપૂર્ણ ઈન્ફ્રાસ્ટ્રક્ચર પ્રોજેક્ટ્સની રૂબરૂ મુલાકાત લઈને વિગતવાર સમીક્ષા કરી હતી.
ધોલેરા: ભારતના પ્રથમ ‘સેમિકોન સિટી’ તરીકે ઉભરતું વૈશ્વિક કેન્દ્ર
ધોલેરા SIR આજે વૈશ્વિક રોકાણકારો માટે આકર્ષણનું કેન્દ્ર બની રહ્યું છે. સેમિકન્ડક્ટર ક્ષેત્રે ભારતને આત્મનિર્ભર બનાવવાના વડાપ્રધાનના સંકલ્પને સાકાર કરવામાં ધોલેરા મહત્વની ભૂમિકા ભજવી રહ્યું છે.
મુખ્યમંત્રીએ તેમની મુલાકાત દરમિયાન દેશની પ્રથમ અને અત્યંત મહત્વકાંક્ષી એવી ટાટા ઇલેક્ટ્રોનિક્સ સેમિકન્ડક્ટર ફેબ્રિકેશન ફેસિલિટીના નિર્માણ કાર્યનું પ્રત્યક્ષ નિરીક્ષણ કર્યું હતું. આ સુવિધા માત્ર સેમિકન્ડક્ટરના ઉત્પાદન પૂરતી સીમિત નથી, પરંતુ તે સહાયક ઉદ્યોગો, સંલગ્ન ટેકનોલોજી કંપનીઓ અને હજારો કુશળ યુવાનો માટે રોજગારીની નવી તકો ઊભી કરનારી એક વિશાળ ઈકોસિસ્ટમનું નિર્માણ કરશે.
સામાજિક અને શહેરી ઈન્ફ્રાસ્ટ્રક્ચરનો વ્યાપક વિકાસ
કોઈપણ ઔદ્યોગિક વિસ્તારને સફળ બનાવવા માટે માત્ર કારખાનાઓ પુરતા નથી, પરંતુ ત્યાં કાર્યરત થનારા લોકો અને તેમના પરિવાર માટે સક્ષમ સામાજિક ઈન્ફ્રાસ્ટ્રક્ચર હોવું તેટલું જ જરૂરી છે. મુખ્યમંત્રીએ ધોલેરાના એક્ટિવેશન એરિયામાં નિર્માણાધિન વિવિધ સામાજિક અને નાગરિક સુવિધાઓની સાઈટ વિઝિટ કરી હતી.
મુખ્યમંત્રીએ નિહાળેલા મુખ્ય સામાજિક પ્રકલ્પો:
આરોગ્ય સુવિધા: નાગરિકો અને કામદારોની સ્વાસ્થ્ય સુરક્ષા માટે નિર્માણધીન ૨૦૦ બેડની મલ્ટી-સ્પેશિયાલિટી હોસ્પિટલ.
શિક્ષણ અને સુવિધાઓ: એકીકૃત શિક્ષણ પ્રદાન કરતી ઈન્ટિગ્રેટેડ સ્કૂલ, ફાયર સ્ટેશન, અને ૪૨ રૂમનું અદ્યતન ગેસ્ટ હાઉસ.
રહેઠાણ અને મનોરંજન: ૬૦૦ લોકોની ક્ષમતા ધરાવતી વિશાળ ફૂડ કોર્ટ, ૫૦ ટેન્ટ ધરાવતી ટેન્ટ સિટી, હોટેલ્સ તેમજ રહેણાંક અને વ્યાપારી પ્રોજેક્ટ્સ.
પર્યાવરણીય સંતુલન: ‘ડ્રમ પ્લાન્ટેશન’ ટેકનિકની સરાહના
ઉદ્યોગોના વિકાસ સાથે પર્યાવરણની જાળવણી એ ગુજરાત સરકારની પ્રાથમિકતા રહી છે. ધોલેરા ખાતે વન વિભાગ અને સદભાવના ટ્રસ્ટના સંયુક્ત સહયોગથી ૫૩ હેક્ટર ગ્રીન સ્પેસમાં ૧.૧૧ લાખથી વધુ રોપાઓ વાવવાની કામગીરી ચાલુ છે.
અહીં વૃક્ષોના ઊંચા જીવંત દર (Survival Rate) માટે ખાસ અપનાવવામાં આવેલી ‘ડ્રમ પ્લાન્ટેશન’ ટેકનિકનું મુખ્યમંત્રીએ ખાસ મૂલ્યાંકન કર્યું હતું. પર્યાવરણ સંતુલન સાથેના ઔદ્યોગિક વિકાસની આ નેમની તેમણે હૃદયપૂર્વક સરાહના કરી હતી.
કનેક્ટિવિટી ક્ષેત્રે ક્રાંતિકારી પ્રગતિ
ગતિશીલ કનેક્ટિવિટી એ ધોલેરાની સર્વોચ્ચ શક્તિ છે. સમીક્ષા બેઠક દરમિયાન ધોલેરા ઇન્ડસ્ટ્રિયલ સિટી ડેવલપમેન્ટ લિમિટેડ (DICDL)ના મેનેજિંગ ડિરેક્ટર ડૉ. કુલદીપ આર્યએ વિસ્તૃત પ્રેઝન્ટેશન રજૂ કર્યું હતું, જેમાં ધોલેરાના કનેક્ટિવિટી મોડલ્સની પ્રગતિ દર્શાવવામાં આવી હતી:
રોડ કનેક્ટિવિટી: અમદાવાદ-ધોલેરા એક્સપ્રેસવે હવે કાર્યરત થઈ ગયો છે, જેનાથી માર્ગ વ્યવહાર ઝડપી બન્યો છે.
એર કનેક્ટિવિટી: ધોલેરા ઇન્ટરનેશનલ એરપોર્ટ પર તાજેતરમાં જ કેલિબ્રેશન ફ્લાઇટનું સફળ લેન્ડિંગ થયું છે. આ એરપોર્ટ વર્ષ ૨૦૨૬ના અંત સુધીમાં કાર્યરત થવાની અપેક્ષા છે, જે ધોલેરાને વૈશ્વિક ફ્લાઇટ્સ સાથે જોડશે.
રેલ કનેક્ટિવિટી: માલસામાનની હેરફેર માટે ૨૩ કિમી લાંબી ‘ભીમનાથ-ધોલેરા લોજિસ્ટિક હબ ન્યૂ લાઇન’ વિકસાવવામાં આવી રહી છે.
સેમી હાઇ-સ્પીડ રેલ: ₹૨૦,૬૬૭ કરોડના અંદાજિત ખર્ચે ૧૩૪ કિમી લાંબી ‘અમદાવાદ-ધોલેરા સેમી હાઇ-સ્પીડ ડબલ લાઇન’ પ્રોજેક્ટને મંજૂરી આપવામાં આવી છે. આ લાઇન અમદાવાદ, ધોલેરા SIR, એરપોર્ટ અને લોથલ વચ્ચે હાઇ-સ્પીડ વાહનવ્યવહારની સુવિધા પૂરી પાડશે.
ઉચ્ચ સ્તરીય અધિકારીઓની ઉપસ્થિતિ
આ સ્થળ સમીક્ષા દરમિયાન રાજ્યના વરિષ્ઠ વહીવટી અધિકારીઓ મુખ્યમંત્રી સાથે જોડાયા હતા. જેમાં મુખ્ય સચિવ મનોજ કુમાર દાસ, મુખ્યમંત્રીના મુખ્ય સલાહકાર ડૉ. હસમુખ અઢિયા, સલાહકાર એસ. એસ. રાઠોર, અધિક અગ્ર સચિવ વિક્રાંત પાંડે, વિજ્ઞાન અને ટેકનોલોજી સચિવ પી. ભારતી, ગુજરાત સ્ટેટ ઇલેક્ટ્રોનિક્સ મિશનના મિશન ડાયરેક્ટર નેહા કુમારી, જિલ્લા વિકાસ અધિકારી વિદેહ ખરે, રેન્જ આઇજી રાઘવેન્દ્ર વત્સ, જિલ્લા પોલીસ વડા ઓમપ્રકાશ જાટ તેમજ ટાટા ઇલેક્ટ્રોનિક્સના સીઈઓ અને એમડી ડૉ. રણધીર ઠાકુર ઉપસ્થિત રહ્યા હતા.
