CR Patil : પાંચ વર્ષની રણનીતિક સફળતા
CR Patil : 20 જુલાઈ, 2025ના રોજ સી.આર. પાટીલે ગુજરાત ભાજપના પ્રદેશ પ્રમુખ તરીકે પાંચ વર્ષ પૂર્ણ કર્યા છે. જોકે પાર્ટીનો પ્રમુખપદનો સાધારણ કાર્યકાળ ત્રણ વર્ષનો હોય છે, પરંતુ સંગઠન પર્વના ભાગરૂપે તેમની મુદત વધારવામાં આવી હતી. આ પાંચ વર્ષ દરમિયાન પાટીલના માર્ગદર્શન હેઠળ ગુજરાત ભાજપે અનેક રાજકીય મંચે ઐતિહાસિક પરિણામો હાંસલ કર્યા છે.
પેજ સમિતિ અને બુથ મજબૂતીકરણની મસ્ત રણનીતિ
પાટીલના નેતૃત્વની શરૂઆત એક નવી યોજના સાથે થઈ—’પેજ સમિતિ’. દરેક પેજ પર કાર્યકરોની ટીમ બનાવવામાં આવી, અને 74 લાખથી વધુ સભ્યોને સક્રિય બનાવવામાં આવ્યા. પાટીલના નેતૃત્વમાં બીજું મોટું પગલું હતું બુથ મેનેજમેન્ટને મજબૂત બનાવવું, જેને કારણે પેટાચૂંટણીઓમાં ભાજપે મજબૂત કામગીરી કરી હતી.
વિધાનસભાની પેટા અને મહાનગરપાલિકા ચૂંટણીમાં જીતનો સિલસિલો
2020માં યોજાયેલી વિધાનસભાની 8 બેઠકોની પેટા ચૂંટણીમાં ભાજપે તમામ બેઠકો મોટી બહુમતીથી જીતી. પછી 2021ની મહાનગરપાલિકાની ચૂંટણીમાં ગાંધીનગર સહિત છ મહાનગરોમાં ભાજપે પ્રચંડ બહુમતી હાંસલ કરી—કેવી કે ગાંધીનગરમાં 44માંથી 41 બેઠકો ભાજપે જીતી.
સ્થાનિક સ્વરાજ્યમાં અવિરત દબદબો
2021ની જિલ્લા પંચાયત, તાલુકા પંચાયત અને નગરપાલિકાની ચૂંટણીમાં ભાજપે લગભગ દરેક જગ્યાએ સ્પષ્ટ બહુમતી મેળવી. 31માંથી 31 જિલ્લા પંચાયતો, 214માંથી 196 તાલુકા પંચાયતો અને 75માંથી 74 નગરપાલિકાઓમાં જીત નોંધાવવી એ પાટીલના નેતૃત્વની અગત્યની સિદ્ધિ રહી.
વન ડે વન ડિસ્ટ્રિક્ટ: વોટ બેઝ મજબૂત કરવાનું આયોજન
2022ની વિધાનસભા ચૂંટણી પહેલાં દરેક જિલ્લામાં એક દિવસ રોકાઈ પાટીલે ‘વન ડે વન ડિસ્ટ્રિક્ટ’ કાર્યક્રમ શરૂ કર્યો. જેમાં માઇનસ બુથો ઓળખી તેમની પુનઃરચના અને આયોજન કરવામાં આવ્યું. પરિણામે 2022ની વિધાનસભા ચૂંટણીમાં ભાજપે 156 બેઠકો જીતીને રેકોર્ડ બનાવ્યો.
લોકસભા ચૂંટણી અને નવા પડકારો
ભાજપે પાટીલના કાર્યકાળ દરમિયાન બે વખત લોકસભાની ચૂંટણીમાં પ્રદર્શન કર્યું. જોકે 2024માં 26માંથી 25 બેઠકો જીતી શક્યું અને 1 બેઠક કોંગ્રેસને મળી. જોકે આમ છતાં, રાષ્ટ્રીય સ્તરે દબદબો કાયમ રહ્યો.
ગુજરાત ભાજપમાં નવા પ્રદેશ પ્રમુખની નિયુક્તિ ક્યારે થશે અને કોણ એ જગ્યા સંભાળશે
તે મુદ્દે હજુ પણ અસંતોષ અને અટકળો ચાલી રહી છે. સી.આર. પાટીલના કાર્યકાળને લીધે પક્ષે ઘણા મહત્વના વિજય નોંધાવ્યા છે, પરંતુ હવે નવા નેતૃત્વ માટે રાહ જોવાઈ રહી છે.
પાર્ટીએ ઘણી બધી રાજ્ય યુનિટ્સના નવા પ્રદેશ પ્રમુખોની જાહેરાત કરી દીધી છે, પરંતુ મોટા અને રાજકીય રીતે મહત્વના રાજ્ય એવા ઉત્તર પ્રદેશ અને ગુજરાતમાં હજુ સુધી આ નિયુક્તિ થવી બાકી છે. સંગઠનની આંતરિક ચૂંટણી પણ પૂરી થઈ ગઈ છે, છતાં રાજકીય નિરીક્ષકોનું માનવું છે કે દિગ્દર્શન સ્તરે કોઈ મોટો ફેરફાર થવાનો હોય તે કારણે નવી નિયુક્તિમાં વિલંબ થઈ રહ્યો છે.
સહકારી ક્ષેત્રમાં પણ પાટીલની ધારદાર ઉપસ્થિતિ
2025માં યોજાયેલી સહકારી ચૂંટણીમાં પણ પાટીલના નેતૃત્વમાં ભાજપે 219 જેટલી સંસ્થાઓમાં વિજય મેળવ્યો. જેમાં દૂધ સંઘ, કૃષિ માર્કેટ યાર્ડ, જિલ્લા સહકારી બેંક અને અન્ય અનેક સહકારી સંગઠનોનો સમાવેશ થાય છે.
