અમુલનો લોગો હવે ન્યુઝીલેન્ડ ક્રિકેટ ટીમના ખેલાડીઓની ટિશર્ટ પર જોવા મળશે .

ગાંધીનગર: એશિયાની સૌથી મોટી દૂધની બ્રાન્ડ અને જાણીતી કંપની અમુલનો લોગો હવે ન્યુઝીલેન્ડના ક્રિકેટ ટીમના ખેલાડીઓ ઉપર જોવા મળશે. અમુલને ન્યુઝીલેન્ડના ક્રિકેટ ટીમના અધિકૃત સ્પોન્સર તરીકે જાહેર કરવામાં આવ્યું છે. યુનાઈટેડ કિંગ્ડમ (યુ.કે)માં યોજાનારી એક દિવસીય ક્રિકેટ ટૂર્નામેન્ટ જે આ મહિનાની આખરે રમાનારી છે તેમાં કિવિ ખેલાડીઓની જર્સી ઉપર તેમજ તેમના ક્રિકેટ કીટ્સ ઉપર પણ વાર્ષિક રુ. 27 હજાર કરોડનું ટર્નઓવર ધરાવતી અમુલ બ્રાન્ડનો લોગો જોવા મળશે. “અમે પ્રથમ વખત ન્યુઝીલેન્ડની ક્રિકેટ ટીમની સાથે સંકળાવવાથી ખુબજ ઉત્સાહિત છીએ અને બ્લેકકેપ્સને આવકારીએ છીએ” એવુ આર.એસ. સોઢી, ગુજરાત કોઓપરેટીવ મિલ્ક માર્કેટીંગ ફેડરેશનના મેનેજીંગ ડિરેક્ટરે જણાવ્યું હતું. “એક ખુબજ મજબુત ખેતી અને સહકારી ક્ષેત્રમાંથી આવતા ન્યુઝીલેન્ડની ટીમ અમારી બ્રાન્ડને દર્શાવતી ઉચ્ચ ગુણવત્તા અને મુલ્યો માટે એકદમ પરફેક્ટ છે” એમ સોઢીએ ઉમેર્યું હતું. “અમારી સાથે અમુલ હોવાથી અમે ખુશ છીએ અને આશા રાખે છીએ કે આવનારા સમય માટે ખુબ સારા સંબધોની શરુઆત થઈ છે” એવુ ન્યુઝીલેન્ડના ક્રિકેટ ટીમના કમર્શીયલ ડિરેક્ટર જેમ્સ વેરે જણાવ્યું હતું. આઈસીસી રેન્કીંગ્સ પ્રમાણે ન્યુઝીલેન્ડની ક્રિકેટ ટીમ T-20માં નંબર એક છે જ્યારે એક દિવસીય રમતમાં ભારત પછી એટલે કે 4થા સ્થાને છે. તેઓ ટૂર્નામેન્ટમાં તેમની પહેલી જ વોર્મ અપ મેચ ભારત સામે રમનાર છે.