Asia Cup 2025 દેવજીત સૈકિયાએ એવી તમામ અફવાઓનો ઇનકાર કર્યો કે ભારત એશિયા કપમાંથી બહાર પડશે
Asia Cup 2025 એશિયા કપ 2025ને લઈને દેશભરમાં ચાલી રહેલી ચર્ચાઓ વચ્ચે BCCIએ સ્પષ્ટતા કરી છે કે ભારત ટૂર્નામેન્ટમાં ભાગ લેશે. ભારતીય ક્રિકેટ કંટ્રોલ બોર્ડના સચિવ દેવજીત સૈકિયાએ મિડિયામાં આવેલી એ અફવાઓને સંપૂર્ણપણે ખોટી અને બિનઆધારભૂત ગણાવી છે કે ભારત પુરુષો માટેના એશિયા કપ અને મહિલા ઇમર્જિંગ ટીમ્સ એશિયા કપમાં ભાગ નહીં લે.
દેવજીત સૈકિયાએ કહ્યું, “આજથી આવા ખોટા સમાચાર ફરી રહ્યા છે કે BCCIએ એશિયા કપમાં ભારતીય ટીમને ન મોકલવાનો નિર્ણય કર્યો છે. અમે સ્પષ્ટપણે કહેવું ઈચ્છીએ છીએ કે હાલમાં BCCIએ એવું કોઈ નિર્ણય કર્યો નથી. હકીકતમાં, એશિયા કપ અંગે અત્યાર સુધી કોઈ આંતરિક બેઠક પણ યોજાઈ નથી.”
તેમણે ઉમેર્યું કે, “આ બંને ટૂર્નામેન્ટ એશિયન ક્રિકેટ કાઉન્સિલ (ACC) હેઠળ આવે છે અને તેમની આયોજન બાબતે હજુ સુધી કોઈ અંતિમ નિર્ણય લેવાયો નથી. BCCI હાલ IPL 2025 અને ઇંગ્લેન્ડ સામેની અપકમિંગ સિરીઝ પર કેન્દ્રિત છે.”
એશિયા કપ 2025 ક્યારે અને ક્યાં?
2025માં રમાનાર એશિયા કપ માટે યજમાન દેશનું હજુ ઔપચારિક એલાન થયું નથી, પરંતુ શક્યતા છે કે આ ટૂર્નામેન્ટ સપ્ટેમ્બર-ઓક્ટોબર વચ્ચે યોજાશે. ભાગ લેનાર મુખ્ય 8 ટીમોમાં ભારત, પાકિસ્તાન, શ્રીલંકા, બાંગ્લાદેશ, અફઘાનિસ્તાન, ઓમાન, હોંગકોંગ અને યુએઈનો સમાવેશ થાય છે.
તે જ રીતે, મહિલા ઇમર્જિંગ ટીમ્સ એશિયા કપનું યજમાનપદ શ્રીલંકાને આપવામાં આવ્યું છે. 2023માં પહેલીવાર યોજાયેલી આ ટૂર્નામેન્ટમાં ભારતીય ટીમે ફાઇનલમાં બાંગ્લાદેશને હરાવી ટાઇટલ જીત્યું હતું. 2025 માટેની તૈયારીઓ પણ શરૂ થઈ ગઈ છે.
અફવાઓથી સાવધાન રહો
BCCIએ એકવાર ફરીથી સ્પષ્ટ સંદેશ આપ્યો છે કે ખોટી અફવાઓ પર વિશ્વાસ ન રાખવો જોઈએ. ટીમ ઈન્ડિયા એશિયા કપમાં ભાગ લેશે કે નહીં તે અંગેનો નિર્ણય યોગ્ય સમયે લાવવામાં આવશે અને અધિકૃત સ્ત્રોત દ્વારા જાહેર કરવામાં આવશે.
