Axar Patel: અક્ષર પટેલ બનશે દિલ્હી કેપિટલ્સના નવા કેપ્ટન? IPL 2025 મેગા હરાજી પહેલા મોટો ખુલાસો
Axar Patel IPL 2025 પહેલા દિલ્હી કેપિટલ્સે રિષભ પંતને રિલીઝ કરી દીધો છે. હવે ટીમને નવા કેપ્ટનની તલાશ છે.
Axar Patel:આઇપીએલ 2025ની મેગા હરાજી પહેલા દિલ્હી કેપિટલ્સે કુલ ચાર ખેલાડીઓને રિટેન કર્યા હતા. આ 4 ખેલાડીઓના નામ અક્ષર પટેલ, ટ્રિસ્ટન સ્ટબ્સ, અભિષેક પોરેલ અને કુલદીપ યાદવ છે. હરાજીની તારીખ નજીક આવી રહી છે અને રિષભ પંતની રિલીઝ બાદ સૌથી મોટો સવાલ એ છે કે, દિલ્હીની ફ્રેન્ચાઈઝી કયા ખેલાડીને કેપ્ટન બનાવી શકે છે. હવે એક મીડિયા રિપોર્ટ સામે આવ્યો છે, જેમાં અક્ષર પટેલને દિલ્હીનો કેપ્ટન હોવાનો દાવો કરવામાં આવ્યો છે.
Axar Patel: આગામી સિઝનમાં દિલ્હી કેપિટલ્સની કેપ્ટન્સી સંભાળી શકે છે. યાદ રહે કે આઇપીએલ 2024માં જ્યારે ત્રણ વખત સ્લો ઓવર રેટને કારણે રિષભ પંતને આરસીબી સામેની મેચમાંથી સસ્પેન્ડ કરવામાં આવ્યો હતો, ત્યારે પંતની જગ્યાએ અક્ષર પટેલે દિલ્હીની કેપ્ટન્સી સંભાળી હતી. અક્સર પટેલને આગામી સિઝન માટે 16.5 કરોડમાં રિટેન કરવામાં આવ્યો છે. આથી તે દિલ્હીએ રિટેન કરેલો સૌથી મોંઘો ખેલાડી પણ છે. દિલ્હીની ફ્રેન્ચાઈઝી અક્ષર પર ભરોસો મૂકવા તૈયાર હોવાનો પણ સંકેત છે.
અક્ષર પટેલ બની ગયો છે દિલ્હીનો સ્ટાર
અક્ષર પટેલ 2019થી દિલ્હી કેપિટલ્સ તરફથી રમી રહ્યો છે. તેણે ડીસી ફ્રેન્ચાઇઝીનું પ્રતિનિધિત્વ કરતા કુલ 82 મેચ રમી છે, જેમાં 967 રન અને 62 વિકેટ તેના નામે છે. આઈપીએલમાં તેને સૌથી વધુ સફળતા દિલ્હી તરફથી રમતાં મળી છે. આ પહેલા તેણે પંજાબ કિંગ્સ તરફથી 68 મેચમાં 686 રન બનાવ્યા હતા અને 61 વિકેટ પણ લીધી હતી.
જો અક્ષર પટેલને દિલ્હી કેપિટલ્સની કેપ્ટન્સી મળશે તો તે આઇપીએલમાં દિલ્હીની ટીમની કેપ્ટનશીપ કરનારો ભારત તરફથી સૌપ્રથમ ઓલરાઉન્ડર ખેલાડી બનશે. જેમ્સ હોપ્સ અને જેપી ડયુમિની એ બે ઓલરાઉન્ડર ખેલાડી રહી ચૂક્યા છે જેમણે દિલ્હીની કેપ્ટનશિપ કરી છે પરંતુ હજુ સુધી કોઈ ભારતીય ઓલરાઉન્ડરે કમાલ દેખાડી નથી. વિરેન્દ્ર સેહવાગ, ગૌતમ ગંભીર જેવા બેટ્સમેનો અને ઝહીર ખાન જેવા લેજન્ડરી બોલર પણ ડીસીની જવાબદારી સંભાળી ચૂક્યા છે. પણ અક્ષર ઓલરાઉન્ડર ખેલાડી બનીને અને કેપ્ટનશિપ સંભાળીને ઈતિહાસ રચી શકે છે.
