શ્રેયસ અય્યરે કેપ્ટનશીપ પર મૌન તોડ્યું, જણાવ્યું શા માટે ઋષભ પંત કરે છે આગેવાની

નવી દિલ્હી: 22 સપ્ટેમ્બર, બુધવારે રાત્રે રમાયેલી મેચમાં દિલ્હી કેપિટલ્સની ટીમ સનરાઇઝર્સ હૈદરાબાદને 8 વિકેટે હરાવવામાં સફળ રહી હતી. ચાર મહિના બાદ દિલ્હી કેપિટલ્સની ટીમમાં પરત ફરતા શ્રેયસ અય્યરે 47 રનની અણનમ ઇનિંગ રમી હતી. સફળ પુનરાગમન બાદ શ્રેયસ અય્યરે દિલ્હી કેપિટલ્સની કેપ્ટનશીપ ગુમાવવા પર પોતાનું મૌન તોડ્યું છે. અય્યરે જોકે પંતની કેપ્ટન્સીની પ્રશંસા કરી હતી.

અય્યરનું કહેવું છે કે તે ટીમ મેનેજમેન્ટના નિર્ણયનું સન્માન કરે છે. પૂર્વ કેપ્ટને કહ્યું કે, ઋષભ પંત શ્રેષ્ઠ રીતે ટીમનું નેતૃત્વ કરી રહ્યો છે. આ સીઝનની શરૂઆતથી, ઋષભ પંતે દિલ્હી કેપિટલ્સની ટીમને ખૂબ સારી રીતે સંભાળી છે. મારો ઉદ્દેશ ટીમને જીત અપાવવાનો છે.

અય્યરે પંતને કેપ્ટન તરીકે રાખવાનું કારણ પણ જણાવ્યું હતું. તેમણે કહ્યું, “પંતનું કામ સારું રહ્યું છે અને તેથી ટીમ મેનેજમેન્ટ વતી ઋષભ પંતને સમગ્ર સિઝન માટે ટીમની કમાન સોંપવામાં આવી છે. કેપ્ટનશિપ બાબતે, હું ટીમ મેનેજમેન્ટના આ નિર્ણયનો પૂરો આદર કરું છું.

અય્યર એક સફળ કેપ્ટન રહ્યો છે

તમને જણાવી દઈએ કે 2018 માં ગૌતમ ગંભીરે મધ્ય સિઝનમાં જ દિલ્હી કેપિટલ્સની કેપ્ટનશીપ છોડવાનો નિર્ણય કર્યો હતો. આ પછી દિલ્હી કેપિટલ્સ દ્વારા અય્યરને તેમના કેપ્ટન તરીકે નિયુક્ત કરવામાં આવ્યો. અય્યરની કેપ્ટનશીપ હેઠળ દિલ્હી કેપિટલ્સનું પ્રદર્શન સતત સુધર્યું હતું. 2019 માં, ટીમ પ્લેઓફમાં સ્થાન મેળવવામાં સફળ રહી, જ્યારે 2020 માં એક પગલું આગળ વધીને, ટીમ પ્રથમ વખત ફાઇનલમાં પહોંચી.

પરંતુ આ વર્ષે ઈંગ્લેન્ડ સામે રમાયેલી મર્યાદિત ઓવરની શ્રેણીમાં અય્યરના ખભામાં ઈજા થઈ હતી. આ કારણે અય્યરે ચાર મહિના સુધી ટીમથી દૂર રહેવું પડ્યું અને દિલ્હી કેપિટલ્સે ઋષભ પંતને કેપ્ટન તરીકે નિયુક્ત કર્યો. પોઇન્ટ ટેબલમાં દિલ્હી કેપિટલ્સ નંબર વન હોવાથી, અય્યરને બદલે પંતને કેપ્ટન તરીકે જાળવી રાખવામાં આવ્યો હતો.