એશિયા કપઃ છેલ્લી અને ઔપચારિક મેચમાં ભારતનો જોરદાર વિજય, કોહલીએ ત્રણ વર્ષ બાદ ફટકારી સદી

2022 એશિયા કપના સુપર-ફોર રાઉન્ડમાં પાકિસ્તાન શ્રીલંકા સામે હારી ગયું અને ગઈકાલે પાકિસ્તાને અફઘાનિસ્તાનને રોમાંચક મુકાબલામાં હરાવ્યું તે પછી ભારતની એશિયા કપની સફરનો અંત આવ્યો. આજે ડિફેન્ડિંગ ચેમ્પિયન ભારતે એશિયા કપમાં પોતાની સત્તાવાર મેચ રમી જેમાં અફઘાનિસ્તાનને 101 રને હરાવ્યું. આ મેચ બંને ટીમો માટે મહત્વની નહોતી. જોકે, આ મેચમાં કોહલીએ 1021 દિવસ બાદ આંતરરાષ્ટ્રીય સદી ફટકારીને ત્રણ વર્ષના દુષ્કાળનો અંત લાવી દીધો હતો. કિંગ કોહલીએ તેની છેલ્લી આંતરરાષ્ટ્રીય સદી 23 નવેમ્બર 2019ના રોજ કોલકાતાના ઈડન ગાર્ડન્સ મેદાન પર બાંગ્લાદેશ સામેની ટેસ્ટ મેચમાં બનાવી હતી. આ સદી બાદ વિરાટ કોહલીના બેટમાંથી એક પણ સદી નીકળી નથી. ટી20 ઈન્ટરનેશનલમાં કિંગ કોહલીની આ પ્રથમ સદી છે. વિરાટ કોહલીએ 84મી ઈન્ટરનેશનલ ઈનિંગમાં આ સદી ફટકારી છે. આ સાથે જ બોલિંગમાં ભુવનેશ્વરે શાનદાર બોલિંગ કરીને ચાર ઓવરમાં મેડન સાથે માત્ર ચાર રન આપીને 5 વિકેટ ઝડપી હતી.

કિંગ કોહલીનો ‘આઈ એમ બેક’ શો
મેચની વાત કરીએ તો ટીમ ઈન્ડિયાએ અફઘાનિસ્તાનને 213 રનનો ટાર્ગેટ આપ્યો હતો, પરંતુ તે માત્ર 111 રન જ બનાવી શકી હતી. પ્રથમ બેટિંગ કરતા ભારતે વિરાટ કોહલીની શાનદાર સદી અને કેએલ રાહુલની અડધી સદીની મદદથી 20 ઓવરમાં બે વિકેટે 212 રન બનાવ્યા હતા. વિરાટ કોહલી અને કેએલ રાહુલે પ્રથમ વિકેટ માટે 119 રનની ભાગીદારી કરી હતી. કેએલ રાહુલ 41 બોલમાં 62 રન બનાવીને પેવેલિયન પરત ફર્યો હતો. વિરાટ કોહલી 61 બોલમાં 12 ચોગ્ગા અને છ છગ્ગાની મદદથી 122 રન બનાવીને અણનમ રહ્યો હતો. પંતે 16 બોલમાં 20 રન બનાવ્યા હતા.
જવાબમાં અફઘાનિસ્તાનની ટીમ 20 ઓવરમાં આઠ વિકેટે 111 રન જ બનાવી શકી હતી. અફઘાનિસ્તાન તરફથી ઈબ્રાહિમ ઝદરાને અણનમ 64 રન બનાવ્યા હતા. મુજીબ ઉર રહેમાને 18 અને રાશિદ ખાને 15 રન બનાવ્યા હતા. આ સિવાય અન્ય કોઈ બેટ્સમેન ડબલ ફિગરને પણ સ્પર્શી શક્યો નહોતો. ભારત તરફથી ભુવનેશ્વર કુમારના ફાયફર ઉપરાંત અર્શદીપ સિંહ, રવિચંદ્રન અશ્વિન અને દીપક હુડાને એક-એક સફળતા મળી હતી. તેણે 122 રનની અણનમ ઇનિંગ રમી હતી. આ મેચમાં રાહુલે ટીમ ઈન્ડિયાની કમાન સંભાળી હતી જ્યારે રોહિત શર્મા ટીમમાં નહોતો. સુપર-4 રાઉન્ડમાં ટીમ ઈન્ડિયા બે પોઈન્ટ સાથે ત્રીજા સ્થાને રહી હતી. તે જ સમયે, અફઘાનિસ્તાન એક પણ મેચ જીતી શક્યું ન હતું અને ચોથા સ્થાને રહ્યું હતું. ભારત હવે વર્લ્ડ કપ પ્રેક્ટિસના ભાગરૂપે ઓસ્ટ્રેલિયા અને દક્ષિણ આફ્રિકા જેવી મજબૂત ટીમો સાથે ઘરઆંગણે ત્રણ મેચની T20I શ્રેણી રમશે.