ભારતીય ટીમનો દિગ્ગજ ખેલાડી મહેન્દ્રસિંહ ધોની રવિવારે જમ્મૂ-કાશ્મીરના બારામૂલા સ્થિત કુંજરમાં ચિનાર ક્રિકેટ પ્રીમીયર લીગમાં ચીફ ગેસ્ટ બનીને પહોંચ્યો. આ કાર્યક્રમ ભારતીય સેના તરફથી આયોજિત કરવામાં આવ્યો હતો. ટીમ ઈન્ડિયાના પૂર્વ કેપ્ટનને જોવા માટે ઘણા લોકો ભેગાં થયા હતા, પણ ત્યારે જ ત્યાં શાહિદ આફ્રિદીના નારા બોલાવા લાગ્યા.
વિચિત્ર પરિસ્થિતિમાં મૂકાયો ધોની
ધોની સૈન્યમાં ઓનરરીમાં લેફ્ટનન્ટ કર્નલના પદ પર છે. આ દરમિયાન તેને એક વિચિત્ર સ્થિતિમાંથી પસાર થવું પડ્યું જ્યારે તેને જોવા માટે ઉમડેલી ભીડે આફ્રિદી-આફ્રિદીના નારા લગાવ્યા. આફ્રિદી પાકિસ્તાનનો પૂર્વ કેપ્ટન રહી ચૂક્યો છે અને તે કાશ્મીરમાં ખૂબ જ લોકપ્રિય છે. કાશ્મીરના લોકલ મીડિયાએ આ મુ્દ્દાને જોરશોરથી ઉઠાવ્યો અને આ ઘટનાનો વીડિયો વાયરલ થઈ રહ્યો છે. સ્થાનિક મીડિયા રિપોર્ટ્સ આવ્યા બાદ આ ઘટનાનો વીડિયો વાયરલ થઈ રહ્યો છે. આ જ કાર્યક્રમમાં ધોનીએ ભારત-પાકિસ્તાન ક્રિકેટ વિશે પણ પોતાના વિચારો રજૂ કર્યા હતા. તેણે કહ્યુ કે, ભારત-પાકિસ્તાન વચ્ચે ક્રિકેટ માત્ર એક રમત ન રહેતા ઘણું બધું બની જાય છે અને આ અંગે સરકારે જ નિર્ણય લેવો જોઈએ. ધોની છેલ્લા એક સપ્તાહથી કાશ્મીરમાં છે. આ દરમિયાન તે શ્રીનગર એક સ્કૂલમાં પણ બાળકો સાથે સમય વિતાવતો જોવા મળ્યો હતો. ત્યારબાદ તેણે બારામુલા જિલ્લાના ઉભરતા ક્રિકેટરો સાથે મુલાકાત કરી તેમને ફિટનેસની સલાહ આપી હતી.