Rahul Dravid IPL 2025 જીતની ઉજવણી દરમિયાન થયેલી દુર્ઘટનાએ સમગ્ર શહેરને હચમચાવ્યું, 11 નિર્દોષ લોકોનાં મોત બાદ RCB અને રાજ્ય સરકારે લીધા મહત્વના પગલાં
Rahul Dravid IPL 2025 માં રોયલ ચેલેન્જર્સ બેંગલોર (RCB)ના વિજય પછી ચિન્નાસ્વામી સ્ટેડિયમ બહાર યોજાયેલી ઉજવણીમાં ભાગદોડના કારણે 11 લોકોનાં મોત થયા હતા. આ દુઃખદ ઘટનાને લઈને ભારતીય ક્રિકેટના ભૂતપૂર્વ કેપ્ટન અને પૂર્વ કોચ રાહુલ દ્રવિડે પહેલી વખત જાહેરમાં પોતાનો ભાવુક પ્રતિસાદ આપ્યો છે.
દ્રવિડે જણાવ્યું, “આ ખૂબ જ નિરાશાજનક અને દુઃખદ ઘટના છે. મારી સંપૂર્ણ સંવેદના મૃત્યુ પામેલા લોકોના પરિવારજનો અને ઘાયલ લોકો સાથે છે.” તેઓએ વધુમાં ઉમેર્યું કે, “બેંગલુરુ એક રમતમાં રસ ધરાવતું શહેર છે અને લોકો અહીં માત્ર ક્રિકેટ જ નહીં, કબડ્ડી અને ફૂટબોલ જેવી રમતોને પણ ઊંડો પ્રેમ કરે છે. આ ઘટના ખૂબ જ વ્યથિત કરતી છે.”
RCB એ પોતાના ઈતિહાસમાં પહેલીવાર IPL ટાઇટલ જીતીને શહેરમાં આનંદનો માહોલ સર્જ્યો હતો, પરંતુ ભીડના અયોગ્ય સંચાલનને કારણે ઉજવણી દુર્ઘટનામાં ફેરવાઈ. રોયલ ચેલેન્જર્સના માર્કેટિંગ હેડ નિખિલ સોસાલેની ધરપકડ કરવામાં આવી છે, જ્યારે રાજ્ય સરકારે અનેક પોલીસ અધિકારીઓને સસ્પેન્ડ કર્યા છે.
કર્ણાટક સરકારે શરૂઆતમાં મૃતકોના પરિવારજનોને ₹10 લાખ વળતર આપવાની જાહેરાત કરી હતી, જેને હવે વધારીને ₹25 લાખ કરવામાં આવ્યું છે. RCB ફ્રેન્ચાઇઝીએ પણ દરેક મૃતક માટે ₹10 લાખ સહાય આપવા કહ્યું છે.
