રાજકોટમાં એક હચમચાવે એવી ઘટના સામે આવી છે. શહેરના કોઠારિયા રોડ નજીક આવેલા ઘનશ્યામનગર વિસ્તારમાં રહેતા એક શખ્સે પોતાની માતાને ઝેરી દવા પીવડાવીને પોતે પણ ઝેરી દવા ગટગટાવી લેતા બંનેનાં મોત નીપજ્યાં છે. ઝેરી દવા પીતા પહેલા શખ્સે એક વીડિયો પણ બનાવ્યો હતો, જેમાં તે ‘કોઈ માટે કાંઈ કરી શક્યો નથી મને માફ કરજો’ તેમ કહેતા સંભળાય છે. જો કે, આ વીડિયોમાં કયા કારણથી આવું પગલું ભરી રહ્યો છે તે અંગે ઉલ્લેખ કર્યો નથી. આ મામલે હાલ પોલીસે મૃતક પુત્ર સામે ગુનો નોંધી આપઘાત પાછળનું સાંચુ કારણ જાણવા તપાસ આદરી છે.
આપઘાત પહેલા મૃતકે બનાવ્યો વીડિયો
રાજકોટના કોઠારિયા રોડ નજીક આવેલા ઘનશ્યામનગર ખાતે સિકંદરભાઈ 80 વર્ષની બીમાર માતા અમીનાબેન લિંગડિયા સાથે રહેતા હતા. દરમિયાન સિકંદરભાઈએ માતાને ઝેરી દવા પીવડાવી પોતે પણ ગટગટાવી લેતા બંનેને સારવાર માટે ખસેડાયાં હતાં. જો કે, ટૂંકી સારવાર બાદ બંનેના મોત નીપજ્યાં છે. આ ઘટનાની જાણ ભક્તિનગર પોલીસને થતા પોલીસે તપાસ હાથ ધરી છે. જો કે, પોલીસની પ્રાથમિક તપાસ દરમિયાન જાણવા મળ્યું કે આ પગલું ભરતા પહેલાં મૃતક યુવકે એક વીડિયો બનાવ્યો હતો, જેમાં તે પોતાની બહેનને સંબોધીને બધાંની માફી માગતો નજરે આવે છે.
‘બેન મને માફ કરજે હું બાને પણ સાથે લેતો જાઉં છું’
વીડિયોમાં રડત રડતા મૃતક સિકંદરભાઈ કહે છે કે, રેશ્મા…હું તારો ભાઈ હું જાવ છું બેન મને માફ કરજે હું બાને પણ સાથે લેતો જાઉં છું. અમે મા-દીકરો હવે જીવી શકી એમ નથી. હું કોઈ માટે કાંઈ પણ કરી શક્યો નથી, મને માફ કરજો. મારા બધાંય ભાઈ અને ભત્રીજીઓ હું કોઈની માટે કાંઈ કરી શક્યો નથી. મારી માને મૂકીને હું એકલો જઈ શકું એમ નથી, એનું ધ્યાન કોણ રાખશે? એટલે હું તેમને પણ સાથે લેતો જાવ છું. એ પણ જીવીને શું કરશે હવે? એના વગર હું અને મારા વિના એ જીવી શકીએ એમ નથી.’
આપઘાત પાછળની કારણ અકબંધ
સિકંદરભાઈએ વીડિયોમાં આગળ કહ્યું કે, હું ઝેરી દવા લઇ આવ્યો છું એમને પાઈને હું પણ પી જાઉં છું. ભાભી મને માફ કરજો તમારો દેવર તમારા માટે કાંઈ પણ કરી શક્યો નથી. મારી ભત્રીજીઓ ભાણિયા-ભાણકીઓ અને મારી મા-બહેન માટે કાંઈ કરી શક્યો નથી. હવે દવા માજીને પાઈને હું પણ પીઉં છું મને માફ કરી દેજો.’ જોકે, સિકંદરભાઈએ આ પગલું શા માટે ભર્યું તે અંગે વીડિયોમાં કોઇ ઉલ્લેખ કર્યો નથી. આથી પોલીસે હાલ મૃતક પુત્ર સામે ગુનો નોંધીને આપઘાત પાછળનું સાચું કારણ જાણવા માટે તપાસ હાથ ધરી છે.
