IPL 2026 ની શરૂઆત પહેલા દિલ્હી કેપિટલ્સે રમી મોટી ચાલ, સપોર્ટ સ્ટાફમાં આ દિગ્ગજ ખેલાડીનો સમાવેશ
ઇન્ડિયન પ્રીમિયર લીગની 19મી સીઝન શરૂ થાય તે પહેલા દિલ્હી કેપિટલ્સે પોતાની ફિલ્ડિંગ મજબૂત કરવા માટે મોટું પગલું ભર્યું છે. ફ્રેન્ચાઈઝીએ આગામી સીઝન માટે આયર્લેન્ડના પૂર્વ આંતરરાષ્ટ્રીય ખેલાડી જ્હોન મૂનીને ટીમના નવા ફિલ્ડિંગ કોચ તરીકે નિયુક્ત કર્યા છે.
દિલ્હી કેપિટલ્સ ગત સીઝનમાં પ્લેઓફની રેસમાં ખૂબ જ નજીક આવીને ચૂકી ગઈ હતી અને પોઈન્ટ ટેબલમાં પાંચમા ક્રમે રહી હતી. આ વખતે ટીમ કોઈ પણ કસર છોડવા માંગતી નથી, તેથી જ મેદાન પર રન બચાવવા અને કેચ પકડવાની ચોકસાઈ વધારવા માટે અનુભવી જ્હોન મૂની પર ભરોસો મૂકવામાં આવ્યો છે.
જ્હોન મૂની સંભાળશે ફિલ્ડિંગ કોચની જવાબદારી
દિલ્હી કેપિટલ્સે સત્તાવાર જાહેરાત કરતા જણાવ્યું છે કે જ્હોન મૂની ટૂંક સમયમાં ટીમ સાથે જોડાઈ જશે. આ સીઝનમાં દિલ્હી કેપિટલ્સનો સપોર્ટ સ્ટાફ ખૂબ જ મજબૂત દેખાઈ રહ્યો છે. હેમંગ બદામી મુખ્ય કોચની ભૂમિકામાં છે, જ્યારે પૂર્વ ભારતીય ઝડપી બોલર મુનાફ પટેલ બોલિંગ કોચ તરીકે સેવા આપી રહ્યા છે. આ ઉપરાંત ઈંગ્લેન્ડના દિગ્ગજ ઈયાન બેલને સહાયક કોચ અને વેણુગોપાલ રાવને ટીમ ડાયરેક્ટર બનાવવામાં આવ્યા છે.
જ્હોન મૂની પાસે કોચિંગનો બહોળો અનુભવ છે. તેમણે ઈંગ્લેન્ડ ક્રિકેટ બોર્ડ (ECB) પાસેથી લેવલ 1, 2 અને 3 ના કોચિંગ સર્ટિફિકેટ પ્રાપ્ત કર્યા છે, જે તેમની વ્યાવસાયિક કુશળતા દર્શાવે છે.
અફઘાનિસ્તાન અને વેસ્ટ ઈન્ડિઝ સાથે કામ કરવાનો અનુભવ
જ્હોન મૂનીના કરિયર પર નજર કરીએ તો, તેમણે આયર્લેન્ડ તરફથી વનડે અને ટી20 ક્રિકેટમાં શાનદાર પ્રદર્શન કર્યું હતું. વર્ષ 2015 માં નિવૃત્તિ લીધા બાદ તેમણે કોચિંગમાં ઝંપલાવ્યું હતું. વર્ષ 2018 થી 2019 દરમિયાન તેઓ અફઘાનિસ્તાન રાષ્ટ્રીય ટીમના ફિલ્ડિંગ કોચ રહ્યા હતા અને ત્યારબાદ વેસ્ટ ઈન્ડિઝની ટીમ સાથે પણ ટૂંકા ગાળા માટે કામ કર્યું હતું.
આઈપીએલમાં આ પ્રથમ વખત છે જ્યારે મૂની કોઈ ટીમ સાથે જોડાશે. દિલ્હી કેપિટલ્સની વાત કરીએ તો, બીસીસીઆઈ દ્વારા જાહેર કરાયેલા પ્રથમ તબક્કાના શિડ્યુલ મુજબ, ટીમ પોતાની પ્રથમ મેચ 1 એપ્રિલના રોજ લખનઉ સુપર જાયન્ટ્સ સામે લખનઉના ઈકાના સ્ટેડિયમમાં રમશે.
