મગફળી અને કપાસના મુદ્દે ભારતીય કિસાન સંઘ આક્રમક, CCI ખરીદી કેન્દ્રો શરૂ કરવાની માંગ
રાજ્યમાં હાલ ચાલી રહેલી Minimum Support Price (MSP) ખરીદી પ્રક્રિયા વચ્ચે ખેડૂતોના હિતમાં મહત્વપૂર્ણ મુદ્દાઓ સાથે ભારતીય કિસાન સંઘ (BKS)એ રાજ્ય સરકાર સમક્ષ અપીલ કરી છે. સંઘે જણાવ્યું કે હાલમાં મગફળી, કપાસ સહિતની અનેક કૃષિ ઉપજના બજાર ભાવ MSP કરતાં ઓછા ચાલતાં ખેડૂતો આર્થિક સંકટનો સામનો કરી રહ્યા છે.
મગફળીની ખરીદીમાં ખેડૂતોને હેરાનગતિ
કિસાન સંઘે જણાવ્યું કે સરકાર દ્વારા MSP ખરીદીની શરૂઆત થયેલી હોવા છતાં અનેક ખરીદી કેન્દ્રોએ માવઠા અને ભેજના કારણે મગફળીના બારદાના ભરવામાં મુશ્કેલી જણાવી, ખેડૂતોની ઉપજ સ્વીકારવાનો ઇનકાર કર્યો છે. ઘણા ખેડૂતોને પોતાની ઉપજ પરત લઈ જવાની ફરજ પડી રહી છે, જે તેમની માટે ભારે તકલીફરૂપ છે. સંઘે માગણી કરી છે કે ખરીદી કેન્દ્રો પર જેટલું માપી શકાય તેટલું મગફળીનું ઉત્પાદન સ્વીકારવું જોઈએ, જેથી ખેડૂતોને અનાવશ્યક તકલીફ ન થાય. સાથે જ ટેકાના ભાવે ખરીદીની નીતિમાં થોડી લવચીકતા (flexibility) દાખવવાની પણ માંગણી કરી છે, જેથી ખેડૂતોને ન્યાય મળે.
કપાસના ભાવ ઘટતાં ખેડૂતોમાં રોષ
ભારતીય કિસાન સંઘે કપાસના મુદ્દે પણ ગંભીર ચિંતા વ્યક્ત કરી છે. તાજેતરમાં કેન્દ્ર સરકારે cotton import dutyમાં ઘટાડો કર્યો છે, જેના કારણે સ્થાનિક બજારમાં કપાસના ભાવ MSP કરતાં નીચે આવી ગયા છે. આ પરિસ્થિતિમાં ખેડૂતોને યોગ્ય ભાવ મળે તે માટે Cotton Corporation of India (CCI)ના ખરીદી કેન્દ્રો તાત્કાલિક શરૂ કરાય તેવી સંઘે માગ કરી છે. સંઘે જણાવ્યું કે હાલ ગુજરાતમાં કાપડ મંત્રાલય માટેનો મંત્રી નક્કી ન થવાને કારણે કેટલાક જિલ્લાઓમાં CCIના ખરીદી કેન્દ્રો ખૂલ્યા નથી. અગાઉ કૃષિ મંત્રી રાઘવજીભાઈ પટેલની અધ્યક્ષતામાં થયેલી બેઠકમાં CCI માર્કેટ હરાજીમાં પણ ભાગ લેશે એવો નિર્ણય લેવાયો હતો, જેનું અમલીકરણ તાત્કાલિક થાય તે જરૂરી છે.
વીજળી ટાવર લાઇન પ્રોજેક્ટ સામે ખેડૂતોનો વિરોધ
કચ્છ જિલ્લામાં ચાલી રહેલા Electric Tower Line Project અંગે પણ કિસાન સંઘે નારાજગી વ્યક્ત કરી છે. ખાનગી કંપનીઓ દ્વારા ખેડૂતોની જમીન પર ટાવર થાંભલા ગોઠવાતા વળતર મુદ્દે વિવાદ ઉભો થયો છે. આ મુદ્દે આંદોલન કરતા કેટલાક કાર્યકર્તાઓને પોલીસે ડિટેન કર્યા છે, જે લોકશાહી વિરુદ્ધ પગલું ગણાવાયું છે. સંઘે સ્પષ્ટ ચેતવણી આપી છે કે જો ડિટેન કરાયેલા કાર્યકર્તાઓને તાત્કાલિક મુક્ત ન કરવામાં આવે, તો રાજ્યવ્યાપી આંદોલન શરૂ કરવામાં આવશે, અને તેની સંપૂર્ણ જવાબદારી રાજ્ય સરકારની રહેશે.
“ખેડૂતો માટે અંતિમ શ્વાસ સુધી લડત ચાલુ રહેશે”
ગુજરાત પ્રદેશના મહામંત્રી એ. પી. પટેલએ જણાવ્યું કે ભારતીય કિસાન સંઘ ખેડૂતોના હિત માટે અવિરત લડત આપતું રહેશે. “ખેડૂતોને ન્યાય મળે ત્યાં સુધી અમે રસ્તા પર ઉતરવા માટે તૈયાર છીએ,” એમ તેમણે સ્પષ્ટ કર્યું.
