વાયર ફ્રી સિટી અભિયાન સાથે ગ્રામ્ય વિસ્તારોમાં MVCC કંડકટરથી વીજ અકસ્માત અને વિક્ષેપમાં ઘટાડો
ગુજરાત સરકારના ‘વાયર ફ્રી સિટી’ અભિયાન હેઠળ શહેરોમાં વીજ લાઈનો અંડરગ્રાઉન્ડ કરવામાં આવી રહી છે. જોકે, ગ્રામ્ય, દરિયાકાંઠા અને જંગલ વિસ્તારોમાં અંડરગ્રાઉન્ડ લાઈનો નાખવી આર્થિક અને તાંત્રિક રીતે પડકારજનક હોવાથી GUVNL દ્વારા એક નવી ટેકનોલોજી વિકસાવવામાં આવી છે. આ વિસ્તારોમાં સતત અને ગુણવત્તાયુક્ત વીજળી મળી રહે તે માટે MVCC (Medium Voltage Covered Conductor) ટેકનોલોજીનો ઉપયોગ શરૂ કરાયો છે. આ ટેકનોલોજીમાં જૂના ખુલ્લા એલ્યુમિનિયમ વાયરોને બદલે ખાસ પ્રકારના ઇન્સ્યુલેટેડ (પડવાળા) વાયરો લગાવવામાં આવે છે, જે વીજ પુરવઠાને વધુ સુરક્ષિત બનાવે છે.
વીજ અકસ્માત અને સ્પાર્કિંગની સમસ્યામાંથી મુક્તિ
ગ્રામ્ય અને જંગલ વિસ્તારોમાં વીજ લાઈનો ઘણીવાર મોટા વૃક્ષોની નજીકથી પસાર થતી હોય છે. વાવાઝોડા કે પવન દરમિયાન વૃક્ષની ડાળીઓ વાયર સાથે ઘસાય ત્યારે સ્પાર્કિંગ થવાથી વીજળી ગુલ થઈ જતી અથવા આગ લાગવાના બનાવો બનતા હતા. તેવી જ રીતે દરિયાકાંઠાના વિસ્તારોમાં તેજ પવનને કારણે ખુલ્લા વાયરો એકબીજા સાથે અથડાતા અને શોર્ટ સર્કિટ થતું હતું. પરંતુ MVCC વાયરો પર મજબૂત ઇન્સ્યુલેશન કવર હોવાને કારણે હવે ડાળીઓ અડવાથી કે વાયરો ભેગા થવાથી સ્પાર્કિંગ થતું નથી, જેનાથી વીજ અકસ્માતોમાં મોટો ઘટાડો થયો છે.
દરિયાકાંઠાના ભેજ અને કાટ સામે રક્ષણ
ખુલ્લા એલ્યુમિનિયમ વાયરોમાં દરિયાકાંઠાની ખારાશ અને ઔદ્યોગિક વિસ્તારોના કેમિકલયુક્ત વાતાવરણને કારણે કાટ લાગવાની મોટી સમસ્યા રહેતી હતી. આ કાટને કારણે વાયરો નબળા પડીને તૂટી જતા હતા. MVCC ટેકનોલોજીના વાયરો ઇન્સ્યુલેટેડ હોવાથી તેના પર બહારના વાતાવરણની અસર થતી નથી અને કાટ લાગવાની શક્યતા રહેતી નથી. આ નવી સિસ્ટમથી વીજ લાઈનોનું આયુષ્ય વધ્યું છે અને વારંવાર આવતા વીજ ફોલ્ટની સમસ્યાનું કાયમી નિરાકરણ આવ્યું છે.
DGVCL દ્વારા દક્ષિણ ગુજરાતમાં વ્યાપક અમલીકરણ અને ભાવિ લક્ષ્ય
દક્ષિણ ગુજરાત વીજ કંપની લિમિટેડ (DGVCL) આ ટેકનોલોજી અપનાવવામાં અગ્રેસર રહી છે. વર્ષ 2023 થી જાન્યુઆરી 2026 સુધીમાં કંપનીએ કુલ 5,000 કિલોમીટરથી વધુ લાંબી જૂની લાઈનોને MVCC વાયરોમાં ફેરવી દીધી છે. દક્ષિણ ગુજરાતના તમામ ગ્રામ્ય અને દરિયાકાંઠાના રહેણાંક ફીડરોને આ ટેકનોલોજી હેઠળ આવરી લેવાનું લક્ષ્ય છે. આ અભિયાનથી ગ્રાહકોને વધુ સુરક્ષિત અને વિશ્વસનીય વીજળી મળી રહી છે, જે ડિજિટલ યુગમાં ગ્રામીણ વિકાસ માટે ખૂબ જ મહત્વની સાબિત થશે.
