Jagannath Ratha Yatra 2025 હાથ-પગ વગરની આ અનોખી પ્રતિમા પાછળ શું છે પૌરાણિક રહસ્યો? જાણો રથયાત્રા પહેલા ભગવાનના સ્વરૂપની કથા
Jagannath Ratha Yatra 2025 પુરીની પ્રખ્યાત જગન્નાથ રથયાત્રા 27 જૂન 2025થી ભવ્ય રીતે શરૂ થવા જઈ રહી છે. દરેક વર્ષે લાખો ભક્તો ભગવાન જગન્નાથના દર્શન કરવા માટે અહીં એકત્રિત થાય છે. ભગવાનનું સ્વરૂપ અદ્વિતીય છે – મોટા નેત્રો, હાથ-પગ વગરની મૂર્તિ અને ભક્તિભાવથી ભરેલું વાતાવરણ. પણ અનેક શ્રદ્ધાળુઓના મનમાં એક જ પ્રશ્ન ઊભો થાય છે – શા માટે ભગવાન જગન્નાથની મૂર્તિ અધૂરી છે?
વિશ્વકર્માની શરત અને અધૂરી મૂર્તિની દંતકથા
પૌરાણિક કથા અનુસાર, પુરીના રાજા ઇન્દ્રદ્યુમ્ને ભગવાન જગન્નાથના સ્વપ્ન દર્શન કર્યા બાદ લાકડાની મૂર્તિઓ બનાવવા ભગવાન વિશ્વકર્માને આમંત્રણ આપ્યું. વિશ્વકર્માએ શરત મુકી કે તેઓ એકાંતમાં બંધ દરવાજા પાછળ મૂર્તિ બનાવશે અને કોઈએ અંદર ઝાંખી કરવી નહીં.
રાજાએ શરત માની, પણ ઉત્સુકતાવશ, કામ ચાલતું હતું ત્યારે રાજાએ દરવાજો ખોલી દીધો. વિશ્વકર્મા વિઘ્નથી નારાજ થઈને અદૃશ્ય થઈ ગયા અને મૂર્તિઓ અધૂરી રહી ગઈ – તેમના હાથ અને પગ પૂરા ન થઈ શક્યા.
મોટી આંખોનું રહસ્ય
ભગવાન જગન્નાથ, બલરામ અને સુભદ્રા એક પ્રસંગે રોહિણી દ્વારા કૃષ્ણના વૃંદાવનનાં પ્રસંગો સાંભળતા ઊંડા ભાવસભર થઈ ગયા. તેમની આંખો ભાવવેશમાં વિશાળ થઈ ગઈ. નારદ ઋષિએ આ દ્રશ્ય જોઈને ઇચ્છા વ્યક્ત કરી કે ભગવાનના ભક્તો હંમેશા તેમને આ સ્વરૂપમાં જોવા પામે. ભગવાને આ સ્વરૂપ કાયમી સ્વીકારી લીધું.
