શહેરના 100 સ્થળોએ મફત ચેકઅપ, 3 માંથી 1 વ્યક્તિ ડાયાબિટીસ અને બ્લડ પ્રેશરનાં જોખમ હેઠળ
અમદાવાદમાં છેલ્લા કેટલાક વર્ષોથી ડાયાબિટીસના કેસમાં સતત વધારો નોંધાઈ રહ્યો છે, અને આ પરિસ્થિતિને વધુ સારી રીતે સમજવા માટે શહેરમાં અનોખી પહેલ હાથ ધરાઈ. સવારના સમયમાં લોકો સૌથી વધુ એકત્ર થતા હોય તેવા લગભગ 100 સ્થળોએ મફત બ્લડ શુગર પરીક્ષણો યોજાયા હતા. આ સ્થળોમાં જાહેર બગીચાઓ, ક્લબો, ક્રીડા મેદાનો અને ખુલ્લી જગ્યાઓનો સમાવેશ કરવામાં આવ્યો હતો. અભિયાનનો મુખ્ય ઉદ્દેશ વહેલી નિદાન પ્રક્રિયાને મજબૂત બનાવવો અને લોકોને તેમની આરોગ્ય સ્થિતિ વિશે તકેદારીપૂર્વક માહિતગાર કરવાનું હતું.
2221માં 644 લોકોને વધેલું શુગર: ગંભીર ચેતવણી
મોટા પાયે યોજાયેલા આ સ્ક્રીનિંગ દરમિયાન કુલ 2221 લોકોનું પરીક્ષણ કરવામાં આવ્યું, જેમાંથી 644 લોકોમાં બ્લડ શુગર સામાન્ય કરતાં ઘણું વધારે જોવા મળ્યું. આ અંદાજે 29% થાય છે, એટલે કે દર ત્રણમાંથી એક વ્યક્તિ ડાયાબિટીસના જોખમ હેઠળ છે. સ્વાસ્થ્ય નિષ્ણાતોના જણાવ્યા અનુસાર, આ આંકડો ખૂબ ગંભીર છે અને જીવનશૈલી, આહાર અને નિયમિત ચેકઅપની તાત્કાલિક જરૂરિયાત દર્શાવે છે. ખાસ કરીને એવા લોકો માટે વધુ ચેતતા રહેવું જરૂરી છે જેને પહેલા ક્યારેય ડાયાબિટીસનો ઈતિહાસ ન હોય છતાં શુગર લેવલ વધી ગયું હોય.
બ્લડ પ્રેશરના કેસ પણ ચોંકાવનારા
સ્ક્રીનિંગ દરમિયાન માત્ર ડાયાબિટીસ જ નહીં પરંતુ હાઇ બ્લડ પ્રેશરના કેસોમાં પણ ઉંચૂ પ્રમાણ જોવા મળ્યુ. 2221માંથી 772 લોકોનું બ્લડ પ્રેશર વધી ગયેલું નોંધાયું, જે લગભગ 35% જેટલું થાય છે. એટલે કે દર ત્રણમાંથી એકથી વધુ વ્યક્તિ હાઈપરટેન્શનના જોખમમાં છે. નિષ્ણાતોનું કહેવું છે કે હાઈપરટેન્શન ઘણીવાર “સાઇલેન્ટ કિલર” તરીકે કાર્ય કરે છે અને સમયસર ખબર નહીં પડે ત્યારે હાર્ટ એટેક, સ્ટ્રોક અને કિડની સંબંધિત ગંભીર સમસ્યાઓ ઉભી થઈ શકે છે.
અમદાવાદમાં વધતી આરોગ્ય સમસ્યાઓ પર ગંભીર ચર્ચા
આ સમગ્ર અભિયાનને અમદાવાદ મેડિકલ એસોસિએશન, અમદાવાદ મ્યુનિસિપલ કોર્પોરેશન, ઇન્ટરનેશનલ ડાયાબિટીસ ફેડરેશન-સાઉથ ઇસ્ટ એશિયા અને અમદાવાદ ફેમિલી ફિઝિશિયન એસોસિએશનના સહકારથી આયોજિત કરવામાં આવ્યું હતું. નિષ્ણાતોનું માનવું છે કે આવા વ્યાપક સ્ક્રીનિંગ શહેરમાં વધતા આરોગ્યના ભારને સમજવા અને સમયસર પગલાં ભરવા માટે અત્યંત જરૂરી છે. નિયમિત ચકાસણી, મિતાહાર, શરીરક્રિયા અને સ્ટ્રેસ મેનેજમેન્ટ જેવી બાબતોને જીવનશૈલીનો ભાગ બનાવવામાં આવે તો આવી બીમારીઓના જોખમમાં મોટી હદે ઘટાડો શક્ય બને.
