મુકેશ અંબાણી ફરી બન્યા એશિયાના સૌથી અમીર વ્યક્તિ, જાણો ફોર્બ્સની યાદીમાં ગૌતમ અદાણી ક્યાં છે

મુકેશ અંબાણી ફરી એકવાર એશિયાના સૌથી અમીર વ્યક્તિ બની ગયા છે. ‘ફોર્બ્સ’એ મંગળવારે જાહેર કરેલી 2023ના અબજોપતિઓની યાદીમાં આ માહિતી આપી છે. અંબાણીના મુખ્ય હરીફ ગૌતમ અદાણી વૈશ્વિક યાદીમાં 24માં સ્થાને સરકી ગયા છે. અદાણી 24 જાન્યુઆરીએ વિશ્વના ત્રીજા સૌથી ધનિક વ્યક્તિ હતા. તે સમયે તેમની સંપત્તિ 126 અબજ ડોલર હતી.

અમેરિકન શોર્ટ-સેલર હિંડનબર્ગ રિસર્ચના અહેવાલને પગલે તેમની સંપત્તિમાં તીવ્ર ઘટાડો થયો હતો. ફોર્બ્સે જણાવ્યું હતું કે અદાણીની કુલ સંપત્તિ હવે $47.2 બિલિયન છે અને તેઓ અંબાણી પછી બીજા સૌથી ધનિક ભારતીય છે. અંબાણી (65) $83.4 બિલિયનની નેટવર્થ સાથે વિશ્વના 9મા સૌથી ધનિક વ્યક્તિ છે.

ફોર્બ્સે જણાવ્યું હતું કે ગયા વર્ષે, અંબાણીની રિલાયન્સ ઇન્ડસ્ટ્રીઝ $100 બિલિયનથી વધુની આવક મેળવનારી પ્રથમ ભારતીય કંપની બની હતી. તેમનો બિઝનેસ ઓઈલ, ટેલિકોમથી લઈને રિટેલ સુધી ફેલાયેલો છે. ફોર્બ્સ અનુસાર, વિશ્વના 25 સૌથી ધનિક લોકોની કુલ સંપત્તિ $2,100 બિલિયન છે. 2022માં આ આંકડો $2,300 બિલિયન હતો. રિપોર્ટમાં કહેવામાં આવ્યું છે કે ગયા વર્ષે વિશ્વના ટોચના 25 અમીરોમાંથી બે તૃતીયાંશની સંપત્તિમાં ઘટાડો થયો છે.

યાદી અનુસાર શિવ નાદર ત્રીજા સૌથી અમીર ભારતીય છે. સાયરસ પૂનાવાલાને દેશના ચોથા સૌથી અમીર વ્યક્તિનું સ્થાન મળ્યું છે. સ્ટીલ બેરોન લક્ષ્મી મિત્તલ 5મા ક્રમે, ઓપી જિંદાલ ગ્રુપના સાવિત્રી જિંદાલ 6ઠ્ઠા, સન ફાર્માના દિલીપ સંઘવી 7મા અને ડીએમમાર્ટના રાધાકૃષ્ણ દામાણી 8મા ક્રમે છે.