6.5 બિલિયન યુએસ ડોલરમાં અંબુજા સિમેન્ટ અને ACCનું સંપાદન પૂર્ણ કર્યાના દિવસો પછી, અબજોપતિ ઉદ્યોગપતિ ગૌતમ અદાણીએ જણાવ્યું હતું કે તેમનું જૂથ સિમેન્ટ ઉત્પાદન ક્ષમતા બમણી કરવાની અને દેશમાં સૌથી નફાકારક ઉત્પાદક બનવાની યોજના ધરાવે છે. તેમણે કહ્યું કે જોરશોરથી આર્થિક વિકાસ અને સરકાર દ્વારા ઈન્ફ્રાસ્ટ્રક્ચરને પ્રોત્સાહન આપવાને કારણે ભારતમાં સિમેન્ટની માંગ અનેકગણી વધશે. આ કારણે માર્જિનમાં પણ નોંધપાત્ર વધારો થશે.
અદાણી ગ્રૂપના સ્થાપક અને ચેરમેને 17 સપ્ટેમ્બરના રોજ અધિગ્રહણ પૂર્ણ થવા પર એક કાર્યક્રમમાં જણાવ્યું હતું કે તેમનું જૂથ એક જ વારમાં દેશની બીજી સૌથી મોટી સિમેન્ટ ઉત્પાદક બની ગયું છે. અદાણી ગ્રૂપે ગયા અઠવાડિયે બે કંપનીઓમાં હોલસિમનો હિસ્સો ખરીદવાની પ્રક્રિયા પૂર્ણ કરી હતી. આ સોદો ચાર મહિનામાં પૂરો થયો.
“આ વ્યવસાયમાં અમારો પ્રવેશ એવા સમયે થયો છે જ્યારે ભારત આધુનિક વિશ્વમાં સૌથી મોટી આર્થિક વૃદ્ધિ માટે તૈયાર છે,” તેમણે કહ્યું. સિમેન્ટ સેક્ટરમાં પ્રવેશવાના કારણો આપતાં અદાણીએ જણાવ્યું હતું કે ભારત વિશ્વમાં સિમેન્ટનો બીજો સૌથી મોટો ઉત્પાદક દેશ છે, પરંતુ તેનો માથાદીઠ વપરાશ ચીનના 1,600 કિલોગ્રામની સરખામણીએ માત્ર 250 કિલો છે. તેમણે કહ્યું કે ભારતમાં સિમેન્ટના વપરાશમાં ભારે વધારો થવાની ધારણા છે.
તમને જણાવી દઈએ કે ગૌતમ અદાણીનો પુત્ર કરણ સિમેન્ટ કંપનીઓની કમાન સંભાળશે. અદાણી ગ્રુપનો બિઝનેસ પોર્ટ અને એનર્જીથી લઈને એરપોર્ટ અને ટેલિકોમ્યુનિકેશન સુધી ફેલાયેલો છે. હવે તેમાં સિમેન્ટ પણ ઉમેરવામાં આવ્યું છે.
