ઘરેલું પુરવઠો વધારવા અને રાંધણ તેલના છૂટક ભાવ ઘટાડવાના પ્રયાસોના ભાગરૂપે કેન્દ્ર સરકારે સોમવારે રિફાઇન્ડ પામ ઓઇલ પરની મૂળભૂત કસ્ટમ ડ્યુટી 17.5 ટકાથી ઘટાડીને 12.5 ટકા કરી હતી. સુધારેલી બેઝિક કસ્ટમ્સ ડ્યુટી (BCD) માર્ચ 2022 ના અંત સુધી લાગુ રહેશે.
વેપારીઓ ડિસેમ્બર 2022 સુધી લાઇસન્સ વિના રિફાઇન્ડ પામ ઓઇલની આયાત કરી શકશે
સરકારે સોમવારે જણાવ્યું હતું કે વેપારીઓને ડિસેમ્બર 2022 સુધી લાઇસન્સ વિના રિફાઇન્ડ પામ ઓઇલની આયાત કરવાની છૂટ આપવામાં આવશે. આ પગલાનો ઉદ્દેશ્ય સ્થાનિક પુરવઠો વધારવા અને રાંધણ તેલના ભાવમાં ઘટાડો કરવાનો છે.
તે જ સમયે, માર્કેટ રેગ્યુલેટરે ક્રૂડ પામ ઓઇલ અને અન્ય કેટલીક કૃષિ કોમોડિટીના નવા ડેરિવેટિવ કોન્ટ્રાક્ટ શરૂ કરવા પર પ્રતિબંધ મૂક્યો છે. આ તમામ પગલાં એવા સમયે લેવામાં આવ્યા છે જ્યારે મોંઘવારી તેની ટોચ પર છે. અગાઉ, જૂનમાં, સરકારે ખાદ્ય તેલના ભાવમાં વધારાને ધ્યાનમાં રાખીને 31 ડિસેમ્બર, 2021 સુધી રિફાઇન્ડ પામ ઓઇલની આયાત પરનો પ્રતિબંધ હટાવી લીધો હતો.
નવા દર આજથી અમલી
સેન્ટ્રલ બોર્ડ ઓફ ઇનડાયરેક્ટ ટેક્સીસ એન્ડ કસ્ટમ્સ (CBIC) એ એક નોટિફિકેશન બહાર પાડ્યું છે, જેમાં જણાવવામાં આવ્યું છે કે રિફાઇન્ડ પામ ઓઇલ અને તેના અપૂર્ણાંક પર BCD 31 માર્ચ, 2022 સુધીમાં 17.5 ટકાથી ઘટાડીને 12.5 ટકા કરવામાં આવ્યું છે. નવા દર મંગળવારથી લાગુ થઈ ગયા છે.
સોલવન્ટ એક્સ્ટ્રેક્ટર્સ એસોસિયેશન ઓફ ઈન્ડિયા (SEA)ના એક્ઝિક્યુટિવ ડિરેક્ટર બી.વી. મહેતાના જણાવ્યા અનુસાર ડ્યૂટીમાં ઘટાડા સાથે રિફાઈન્ડ પામ ઓઈલ અને પામોલિન બંને પરનો અસરકારક ટેક્સ 19.25 ટકાથી ઘટીને 13.75 ટકા થઈ જશે, જેમાં સામાજિક કલ્યાણ સેસનો પણ સમાવેશ થાય છે.
ગ્રાહક બાબતોના મંત્રાલય પાસે ઉપલબ્ધ માહિતી અનુસાર, સોમવારે સીંગતેલનો સરેરાશ છૂટક ભાવ રૂ. 181.48 પ્રતિ કિલો, સરસવનું તેલ રૂ. 187.43 પ્રતિ કિલો, વનસ્પતિ રૂ. 138.5 પ્રતિ કિલો, સોયાબીન તેલ રૂ. 150.78 પ્રતિ કિલો, સૂર્યમુખી તેલ રૂ. 163.18 પ્રતિ કિલોગ્રામ અને પામ તેલ રૂ. 129.94 પ્રતિ કિલો હતું.
ડ્યુટી કટ અંગે મહેતાએ જણાવ્યું હતું કે તેનાથી રિફાઈન્ડ પામ ઓઈલની આયાતમાં વધારો થશે કારણ કે ક્રૂડ પામ ઓઈલ (CPO) સાથેની ડ્યુટી ડિફરન્સિયલ ઘટીને માત્ર 5.5 ટકા થઈ ગઈ છે. CPO પર વર્તમાન અસરકારક ડ્યુટી 8.25 ટકા છે. દિવસની શરૂઆતમાં નાણા પ્રધાન નિર્મલા સીતારમણે લોકસભામાં જણાવ્યું હતું કે, “અમે ખાદ્ય તેલના ભાવ અને કેટલીક આવશ્યક ખાદ્ય ચીજોની સમસ્યા પર ધ્યાન આપીશું.”
ખાદ્ય તેલની કિંમતો ચકાસવા માટે, સરકારે આ વર્ષે ઘણી વખત રિફાઈન્ડ અને ક્રૂડ બંને ખાદ્ય તેલ પરની આયાત ડ્યુટીમાં ઘટાડો કર્યો છે. આયાત ડ્યૂટીમાં છેલ્લો કાપ સરકારે 14 ઓક્ટોબરે કર્યો હતો. મહેતાએ એમ પણ કહ્યું હતું કે ડ્યુટીમાં ઘટાડાથી સ્થાનિક પામ ઓઈલ રિફાઈનરીઓને નુકસાન થશે.
