RESEARCH: યુવાનોમાં પેટનું કેન્સર 1.5%ના દરે વધી રહ્યું છે

કેન્સર જેવી ગંભીર બીમારી કોઈ પણ ઉંમરે થાય તે જોખમકારક જ ગણાય છે. પરંતુ યુવાવસ્થામાં થતું પેટનું કેન્સર વધારે જોખમકારક સાબિત થાય છે. ‘જર્નલ સર્જરી’ નામની મેડિક્લ જર્નલમાં પ્રકાશિત થયેલાં એક રિસર્ચમાં આ વાત સામે આવી છે. પેટનું કેન્સર અન્ય કેન્સર કરતાં જિનેટિક રીતે અલગ તરી આવે છે. પેટનાં કેન્સર પર કીમોથેરપીની અસર જવા મળતી નથી. રિસર્ચમાં સામેલ કો ઓથર ડો. ટ્રેવિઝ અનુસાર પેટનાં કેન્સરની બીમારી એક ગંભીર સ્થિતિ છે. કારણકે તે ઝડપથી ફેલાઈને જીવન ટૂંકાવી દે છે. આ કેન્સરનાં લક્ષણોની ઓછી જાણકારીને લીધે તે છેલ્લાં સ્ટેજમાં જ ડિટેકટ કરી શકાય છે. યુવાનોમાં આ કેન્સર થાય ત્યારે કેન્સરની સ્થિતિ ગંભીર બની ચૂકી હોય છે. તેથી કેન્સરની સારવારની નહિવત અસર જોવા મળે છે. આ રિસર્ચમાં વર્ષ 1973થી 2005ના કેન્સર દર્દીઓનો ડેટા એકત્રિત કરવામાં આવ્યો છે. 75 હજારથી વધારે લોકોના રિપોર્ટના અભ્યાસમાં સામે આવ્યું કે વૃદ્ધાવસ્થામાં થતાં પેટનાં કેન્સરના કેસોમાં 2%નો ઘટાડો આવ્યો હતો જ્યારે યુવાનોમાં 1.5% ના દરે આ કેન્સર વધી રહ્યું હતું. વર્ષ 2013 પછી યુવાનોમાં પેટનાં કેન્સરનું પ્રમાણ વધારે જોવા મળ્યું હતું. વર્લ્ડ હેલ્થ ઓર્ગેનાઇઝેશનના રિપોર્ટ અનુસાર વર્ષ 2018માં મૃત્યુ માટે જવાબદાર કારણોમાંથી બીજું કારણ પેટનું કેન્સર છે. કેન્સરથી થતાં મૃત્યુમાં ત્રીજા નંબરે પેટનું કેન્સર છે.