ત્રિપુરાઃ જાણો, કોણ છે BJPના સંભવિત CM કેન્ડિડેટ વિપ્લવ કુમાર દેવ

ત્રિપુરા વિધાનસભા ચૂંટણીનાં પરિણામો ચોંકાવનારાં રહ્યાં છે. ડાબેરીઓનો ગઢ ધડાકાભેર ધ્વસ્ત કરી ભાજપ અહીં પહેલી વાર સરકાર બનાવવા જઈ રહ્યો છે. હવે સવાલ એ છે કે, ભાજપ તરફથી ત્રિપુરામાં મુખ્યમંત્રીની ખુરશી કોને મળશે? ઘણાં નામોની ચર્ચા વચ્ચે જે એક નામ સૌથી ટોચ પર છે, તે છે વિપ્લવ દેવ. તેઓ હાલ ત્રિપુરા ભાજપના અધ્યક્ષ પણ છે. આ વખતે તેઓ બનમાલીપુર (પશ્ચિમ ત્રિપુરા) વિધાનસભા બેઠક પરથી ચૂંટણી મેદાનમાં હતા.
મુખ્યમંત્રીની રેસમાં વિપ્લવ એટલા માટે પણ સૌથી આગળ છે, કારણ કે લૉ-પ્રોફાઇલ રહીને પણ તેઓ તેમનું કામ બખૂબી કરવામાં માહેર મનાય છે. ચૂંટણી પરિણામો દરમિયાન ભાજપ મહાસચિવ રામ માધવ સાથે તેઓ એકમંચ થયા હતા. તેનાથી સંકેત મળે છે કે, ભાજપ હાઈ કમાન્ડ પણ વિપ્લવને મુખ્યમંત્રીની ખુરશી પર બેસાડવાનું લગભગ મન બનાવી ચૂક્યું છે.આ સાથે ત્રિપુરામાં વડાપ્રધાન નરેન્દ્ર મોદી અને ભાજપ અધ્યક્ષ અમિત શાહની રેલીઓ સફળ બનાવવામાં તે ચૂપચાપ પરદા પાછળથી પોતાનું કામ કરતા રહ્યા છે. ઓછું બોલનારા અને પોતાના કામ પર ધ્યાન રાખનારા વિપ્લવની ઓળખ ભાજપમાં સ્પષ્ટવાદી અને કર્મઠ નેતા તરીકેની છે.
1999માં ત્રિપુરા યુનિવર્સિટીમાંથી ગ્રેજ્યુએટ વિપ્લવ સામે એકપણ ગુનાઇત કેસ નથી. બનમાલીપુર (પશ્ચિમી ત્રિપુરા)માં વિપ્લવનો મુકાબલો ઑલ ઇન્ડિયા તૃમણૂલ કોંગ્રેસના કુહેલી દાસ સાથે હતો. વિપ્લવે તેમના ઉમેદવારી ફોર્મ સાથેની એફિડેવિટમાં પોતાની આવક માત્ર 2,99,290 રૂપિયા બતાવી છે. સાફસુથરી છબી ધરાવતા વિપ્લવ કુમાર શરૂઆતના દિવસોથી રાષ્ટ્રીય સ્વયંસેવક સંઘ (આરએસએસ) સાથે જોડાયેલા રહ્યા છે. આરએસએસના વરિષ્ઠ નેતા કે. એન. ગોવિંદાચાર્ય સાથે કામ કરી ચૂકેલા વિપ્લવ લાંબા સમયથી સંગઠનમાં કામ કરી ચૂક્યા છે. 48 વર્ષીય વિપ્લવ વર્ષ 2018માં પહેલી વાર ચૂંટણી લડ્યા છે. વિપ્લવનાં પત્ની બેંકમાં કામ કરે છે અને એફિડેવિટમાં તેમની કુલ આવક 9,01,910 રૂપિયા બતાવવામાં આવી છે.