ચીનને ટ્રમ્પનો સંદેશ: ખેડૂતોના સોયાબીન તાત્કાલિક ખરીદો
અમેરિકાના રાષ્ટ્રપતિ ડોનાલ્ડ ટ્રમ્પે ચીનને અમેરિકાથી સોયાબીનની ખરીદી ચાર ગણી વધારવા વિનંતી કરી છે, જેથી બંને દેશો વચ્ચે વધતી જતી વેપાર ખાધ ઓછી થઈ શકે. ટ્રમ્પે તેમના સોશિયલ મીડિયા પ્લેટફોર્મ ‘ટ્રુથ સોશિયલ’ પર લખ્યું,
“ચીન સોયાબીનની અછતનો સામનો કરી રહ્યું છે, જ્યારે અમેરિકન ખેડૂતો ઉત્તમ સોયાબીનનું ઉત્પાદન કરી રહ્યા છે. અમને આશા છે કે ચીન તાત્કાલિક ખરીદી વધારીને સહયોગ કરશે.”
આ નિવેદન એવા સમયે આવ્યું છે જ્યારે અમેરિકા અને ચીન વચ્ચે ઊંચા ટેરિફ પર કામચલાઉ સમાધાન માટેની સમયમર્યાદા મંગળવારે પૂરી થઈ રહી છે. એવા સંકેતો મળી રહ્યા છે કે વ્હાઇટ હાઉસ તણાવ ઘટાડવાનો પ્રયાસ કરી રહ્યું છે.
અમેરિકાના ઉપરાષ્ટ્રપતિ જેડી વાન્સે એક ટીવી ઇન્ટરવ્યુમાં જણાવ્યું હતું કે રાષ્ટ્રપતિ ટ્રમ્પે ચીન દ્વારા રશિયા પાસેથી તેલ ખરીદવાના મુદ્દા પર હજુ સુધી કોઈ નિર્ણય લીધો નથી. તેમના મતે, વોશિંગ્ટન અને બેઇજિંગ વચ્ચેના સંબંધો આ સમયે ખૂબ જ જટિલ તબક્કામાંથી પસાર થઈ રહ્યા છે.
નોંધનીય છે કે આ વર્ષે 2 એપ્રિલે અમેરિકાએ વિશ્વભરના ઘણા દેશો પર ઊંચા ટેરિફ લાદ્યા હતા. તેના જવાબમાં ચીને પણ અમેરિકા પર ટેરિફ વધાર્યો હતો. આ ટકરાવથી વૈશ્વિક બજારમાં મોટો ખળભળાટ મચી ગયો હતો. હવે, કામચલાઉ સમાધાન સમયગાળો પૂરો થયા પછી, વેપાર તણાવ ફરી એકવાર વધવાની ધારણા છે.
