ડિમ્પલ કાપડિયાની માતા બેટ્ટી કાપડિયાનું 80 વર્ષની ઉંમરે હિંદુજા હોસ્પિટલમાં શનિવારે (30 નવેમ્બર) નિધન થયું હતું. બીજા દિવસે એટલે કે પહેલી ડિસેમ્બરે બેટ્ટી કાપડિયાના અંતિમ સંસ્કાર કરવામાં આવ્યા હતાં. અંતિમ સંસ્કારમાં અક્ષય કુમાર, ડિમ્પલ કાપડિયા, ટ્વિંકલ ખન્ના, રિંકી ખન્ના સહિતના પરિવારજનો આવ્યા હતાં. અંતિમ સંસ્કારમાં સની દેઓલ પણ આવ્યો હતો. સની દેઓલે અક્ષય કુમારને સાંત્વના આપ્યું હતું. ઉલ્લેખીનીય છે કે બેટ્ટી કાપડિયાના નિધનના સમાચાર મળતાં જ અક્ષય કુમાર, ટ્વિંકલ ખન્ના તથા પરિવારના અન્ય સભ્યો હોસ્પિટલ આવ્યાં હતાં.
ડિમ્પલ-સની દેઓલ વચ્ચે ખાસ સંબંધ
સની દેઓલના સંબંધો ડિમ્પલ કાપડિયા સાથે હોવાનું ચર્ચાય છે. 1982મા ડિમ્પલ કાપડિયા પતિ રાજેશ ખન્નાથી અલગ થઈ હતી. પતિથી અલગ થયા બાદ ડિમ્પલ તથા સની એકબીજાની નિકટ આવ્યાં હતાં. સૂત્રોના મતે, પરિણીત હોવા છતાંય સની દેઓલ તથા ડિમ્પલ લિવ-ઈનમાં રહેતાં હતાં. બંનેએ પોતાના સંબંધો છુપાવવાનો ઘણો જ પ્રયાસ કર્યો હતો. 2017માં સપ્ટેમ્બર મહિનામાં લંડનના એક બસસ્ટેન્ડ પર ડિમ્પલ તથા સની હાથોમાં હાથ નાખીને બેઠાં હતાં અને સોશિયલ મીડિયામાં આ તસવીર ઘણી જ વાયરલ થઈ હતી. ડિમ્પલ કાપડિયાની બહેન સિમ્પલ કાપડિયાનો દીકરો કરન કાપડિયા ‘બ્લેન્ક’થી બોલિવૂડ ડેબ્યૂ કર્યું હતું અને આ ફિલ્મમાં સની દેઓલે મહત્ત્વની ભૂમિકા ભજવી હતી.
હાલમાં જ બેટ્ટી કાપડિયાએ 80મો જન્મદિવસ સેલિબ્રેટ કર્યો હતો
બેટ્ટી કાપડિયાએ હાલમાં જ પરિવાર તથા મિત્રો સાથે 80મો જન્મદિવસ સેલિબ્રેટ કર્યો હતો. ટ્વિંકલ ખન્નાએ નાનીના જન્મદિવસની તસવીરો પણ સોશિયલ મીડિયામાં શૅર કરી હતી.
બેટ્ટી કાપડિયાએ ગુજરાતી વેપારી સાથે લગ્ન કર્યાં હતાં
બેટ્ટી કાપડિયાએ ગુજરાતી વેપારી ચુન્નીભાઈ કાપડિયા સાથે લગ્ન કર્યાં હતાં. તેમને ચાર સંતાનો છે, જેમાં ત્રણ દીકરી તથા એક દીકરો છે. તેમની એક દીકરી સિમ્પલ કાપડિયાનું નિધન થઈ ચૂક્યું છે. આ ઉપરાંત ડિમ્પલ કાપડિયા, રીમ કાપડિયા તથા દીકરો મુન્ના છે.
