મુંબઈ : શાહિદ કપૂર અને કિયારા અડવાણી સ્ટારર ફિલ્મ ‘કબીર સિંહ’ 21 જૂને થિયેટરમાં રિલીઝ થઈ છે. આ ફિલ્મ સાઉથના સુપરસ્ટાર વિજય દેવરકોંડાની હિટ ફિલ્મ ‘અર્જુન રેડ્ડી’ની રિમેક છે. મૂળ તેલુગુ ફિલ્મ અને આ હિન્દી ફિલ્મને સંદીપ વાંગા રેડ્ડીએ ડિરેક્ટ કરી છે. ફિલ્મના સ્ટાર કાસ્ટમાં અર્જુન વાજબા, કામિની કૌશલ, સુરેશ ઓબેરોયનો પણ સમાવેશ થાય છે.
ફિલ્મની સ્ટોરી
કબીર સિંહ (શાહિદ કપૂર)નશાની હાલતમાં ઘરથી નીકળીને બરબાદ થવાની અણીએ પહોંચી ચૂકેલો એક એક્સપર્ટ સર્જન છે. સૌપ્રથમ સ્ટોરી ફ્લેશબેકમાં જાય છે, જ્યાં ખબર પડે છે કે કબીર ગુસ્સા પર કાબૂ ન મેળવી શકનાર એક મેડિકલ સ્ટુડન્ટ છે. જોકે, તે ટોપર હોવા સાથે ફૂટબોલ ચેમ્પિયન પણ છે. તે કોલેજ છોડવાનો જ હોય છે કે તેની જિંદગી હંમેશ માટે બદલાઈ જાય છે. તેને કોલેજ કેમ્પસમાં પ્રીતિ સિક્કા (કિયારા અડવાણી) જેવી 19 વર્ષની માસૂમ, સુંદર, સિમ્પલ છોકરી દેખાય છે. પહેલી નજરમાં પ્રેમમાં પડનારો કબીર આખી કોલેજને કહી દે છે કે પ્રીતિ તેની છે અને તેની તરફ આંખ ઉઠાવીને જોનારાની આંખો તે ફોડી નાખશે. હવે કબીર મેડિકલ કોલેજમાં પ્રીતિનો પડછાયો બની પોતે સર્જન બને છે અને પ્રીતિને ડોક્ટર બનવામાં તેની મદદ કરી. પરંતુ ત્યારે જ સ્થિતિ એવી બની જાય છે કે રૂઢિવાદી પરિવારના પ્રેશર અને કબીરના ગુસ્સાના કારણે પ્રીતિના લગ્ન બીજે ક્યાંક કરી દેવામાં આવે છે. આ બાદ કબીર સેલ્ફ ડિસ્ટ્રક્શનની તમામ હદો પાર કરતો જાય છે જે કોઈ સામાન્ય છોકરો ક્યારેય ન કરતો હોય. આ ફિલ્મને 5માંથી 3.5 રેટિંગ મળે છે અને જો તમે ઇન્ટેન્સ લવસ્ટોરી જોવાના શોખીન હો તો આ ફિલ્મ તમારે જરૂર જોવી જોઈએ.
એક્ટિંગ
શાહિદ કપૂરે કબીર સિંહના પાત્રમાં દમદાર એક્ટિંગ કરી છે. ફિલ્મમાં કિયારા ખૂબ જ સુંદર લાગી રહી છે અને તેણે ઓછા ડાયલોગ અને સ્ક્રીન સ્પેસ મળવા છતાં આંખોથી એક્ટિંગ કરી છે. ફિલ્મમાં મિત્ર શિવાના રૂપમાં સોહમ મજૂમદારની ભૂમિકા મનોરંજન સાથે દિલને સ્પર્શી જાય છે. અર્જન બાજવા, સુરેશ ઓબેરોય અને નિકિતા દત્તાએ પોતાના પાત્રો સાથે પૂરતો ન્યાય કર્યો છે. દાદીના રૂપમાં સીનિયર એક્ટ્રેસ કામિની કૌશલની એક્ટિંગ પણ દમદાર છે.