ન્યૂટન ફિલ્મ હવે ઓસ્કારમાં જશે

ફિલ્મ ક્રિટિકસે ફિલ્મ ન્યૂટનને ખૂબ જ વખાણી છે. તો બીજી તરફ ફિલ્મ મેકર અમિત મસુરકરની આ ફિલ્મ રિલીઝ થયાની ગણતરીની જ કલાકોમાં ઓસ્કર માટે નોમિનેશન પણ મેળવી ચુકી છે. આ વર્ષે ભારત તરફથી બેસ્ટ ફોરેન ફિલ્મની કેટેગરીમાં ન્યૂટનની પસંદગી કરવામાં આવી છે. ફિલ્મના લીડ એક્ટર રાજકુમાર રાવે આ વાતની ઘોષણા ટ્વિટ કરી હતી.ફિલ્મ ન્યૂટનની પ્રશંસા સૌ કોઈ કરી રહ્યા છે. અમિતાભ બચ્ચને પણ આ ફિલ્મની પ્રશંસા કરતી ટ્વિટ કરી જણાવ્યું હતુ કે, ‘આ ફિલ્મ આઈ ઓપનર છે’. ફિલ્મ ન્યૂટનમાં રાજકુમાર રાવ ઉપરાંત પંકજ ત્રિપાઠી, સંજય મિશ્રા, અંજલી પાટીલ, રઘુબીર યાદવ પણ મહત્વની ભૂમિકામાં છે. આજે આ ફિલ્મ 350 સ્ક્રીન્સ પર રિલીઝ થઈ છે. ફિલ્મ ન્યૂટનને 4.5ની રેટિંગ આપવામાં આવી છે. ફિલ્મનું ડિરેક્શન ઉત્તમ છે સાથે જ સંવાદ પણ દર્શકોને પ્રભાવિત કરશે. ફિલ્મમાં નકસલી વિસ્તારમાં અસુવિધાઓ વચ્ચે યોજાતા મતદાનના મુદ્દાને રસપ્રદ રીતે રજૂ કરાયો છે. આ વર્ષ ઓસ્કરમાં ભારતની ફિલ્મ ‘ન્યૂટન’ની ટક્કર સ્વીડનની ફિલ્મ ‘ધ સ્કવેર’, જર્મનીની ‘ઇન ધ ફોડ’, કંબોડિયાની ‘ફર્સ્ટ ધે કિલ્ડ માય ફાધર’, પાકિસ્તાનની ‘સાવન’ સાથે થશે. ઓસ્કર એકેડમી એવોર્ડસ 2018 આગામી 4 માર્ચના દિવસે લોસ એન્જલસમાં યોજાશે.