અહેમદ પટેલના પુત્ર ફૈઝલ પટેલે PM મોદીના કર્યા વખાણ, કોંગ્રેસને બતાવ્યો અરીસો
કોંગ્રેસના દિગ્ગજ નેતા અહેમદ પટેલના પુત્ર ફૈઝલ પટેલે વડા પ્રધાન નરેન્દ્ર મોદીની પ્રશંસા કરી છે. આ સાથે તેમણે કોંગ્રેસ પર પણ જોરદાર નિશાન સાધ્યું. તેમણે ઈશારામાં ઘણું કહ્યું છે.
ફૈઝલે પટેલે કહ્યું કે રાહુલ ગાંધી એક મહેનતુ નેતા છે. કોંગ્રેસના અનેક નેતાઓ પ્રતિભાશાળી અને બુદ્ધિશાળી છે. શશી થરૂર, ડીકે શિવકુમાર, રેવંત રેડ્ડી, દીપેન્દ્ર હુડ્ડા અને સચિન પાયલટ જેવા લોકો ખૂબ જ સક્ષમ નેતાઓ છે. તેમને જોઈને લાગે છે કે કોંગ્રેસ સારું કામ કરી રહી છે, પરંતુ પાર્ટીમાં મતભેદ છે.
તેમણે કહ્યું કે મારું માનવું છે કે પાર્ટી ચલાવતા વરિષ્ઠ નેતાઓને યોગ્ય સલાહ આપવામાં આવતી નથી. તેમના સલાહકારો સારું કામ કરી રહ્યા નથી. તેઓ આવતા-જતા રહે છે. વરિષ્ઠ નેતાઓની સલાહ ધ્યાનમાં લેવામાં આવતી નથી.
હું કોંગ્રેસની ઘણી બાબતોને નકારું છું: ફૈઝલ પટેલ
આ દરમિયાન, અહેમદ પટેલના પુત્રએ પીએમ મોદી અને કેન્દ્ર સરકારની પ્રશંસા કરી. તેમણે કહ્યું કે હું કોંગ્રેસનો છું, છતાં પણ હું પાર્ટીની ઘણી બાબતોને નકારું છું.
ફૈઝલ પટેલે કહ્યું કે પાકિસ્તાન સાથે વધતા તણાવ વચ્ચે સશસ્ત્ર દળોએ ખૂબ સારું કામ કર્યું છે. વડા પ્રધાન નરેન્દ્ર મોદીએ મહાન નેતૃત્વ કૌશલ્ય બતાવ્યું છે અને આપણને એક મોટા સંકટમાંથી બહાર કાઢ્યા છે. આ ખૂબ મોટી વાત છે.
ફૈઝલને પીએમ મોદીની આ વાત ગમી
તેમણે વધુમાં કહ્યું કે મને આપણા સશસ્ત્ર દળો પર ગર્વ છે. મને જયશંકરજી પ્રત્યે ખૂબ માન છે. મોદીજી જે રીતે અમલદારોની પસંદગી કરે છે અને તેમને મુખ્યા બનાવે છે અને મંત્રાલયોમાં નિયુક્ત કરે છે તે ખૂબ જ સારી વાત છે.
કોંગ્રેસની નીતિઓ પર પ્રહાર કરતા ફૈઝલે કહ્યું કે કોંગ્રેસની પોતાની દુનિયા છે. તેમને ખબર નથી કે ક્યાં જવું અને ક્યાં નહીં. ભાજપને આ વાતનો ફાયદો મળી રહ્યો છે. ખરાબ નીતિઓને કારણે, બધા રાજકીય પક્ષો ભાજપ સામે ઘૂંટણિયે પડી રહ્યા છે.
