રશિયા સાથે સંભવિત યુદ્ધ એ મારી ‘મુખ્ય ચિંતા’: ફ્રેન્ચ સૈન્ય પ્રમુખે વ્યક્ત કર્યો મોટો ડર
ફ્રાન્સના ટોચના જનરલ અને ચીફ ઓફ ડિફેન્સ સ્ટાફ જનરલ ફેબિયન મેન્ડોને ગુરુવારે સંસદમાં એક અત્યંત ગંભીર ચેતવણી આપી છે. તેમણે જણાવ્યું કે આગામી કેટલાક વર્ષોમાં રશિયા સાથે સીધું યુદ્ધ થવાની શક્યતા તેમની સૌથી મોટી ચિંતાનો વિષય છે. આ સાથે જ તેમણે દેશના સંરક્ષણ બજેટમાં ધરખમ વધારો કરવાની જરૂરિયાત પર ભાર મૂક્યો હતો.
સંરક્ષણ બજેટમાં મોટો વધારો કરવાની તૈયારી
ફ્રાન્સની સંસદના નીચલા ગૃહમાં સંરક્ષણ સમિતિ સમક્ષ બોલતા જનરલ મેન્ડોને વર્ષ 2024 થી 2030 માટેના સૈન્ય પ્રોગ્રામિંગ ડ્રાફ્ટ કાયદાની રજૂઆત કરી હતી. આ ડ્રાફ્ટ મુજબ, ફ્રાન્સ સરકારે અગાઉ નક્કી કરેલા 413 અબજ યુરોમાં વધુ 36 અબજ યુરો ઉમેરવાનો પ્રસ્તાવ મૂક્યો છે. સૈન્ય સજ્જતા વધારવા માટે આ રોકાણ અત્યંત નિર્ણાયક હોવાનું તેમણે જણાવ્યું હતું.
રશિયાની વધતી શક્તિ અને યુદ્ધનું જોખમ
જનરલ મેન્ડોને ઈન્ટેલિજન્સ રિપોર્ટ્સનો હવાલો આપતા જણાવ્યું કે રશિયાની સૈન્ય શક્તિ 2030 સુધીમાં અનેકગણી વધી જશે. તેમના અંદાજ મુજબ:
- સૈન્ય સંખ્યા: રશિયન સૈન્યની સંખ્યા 1.3 મિલિયનથી વધીને 1.9 મિલિયન થવાની શક્યતા છે.
- ટેન્ક અને શસ્ત્રો: રશિયા પાસે ભારે ટેન્કોની સંખ્યા 4,000 થી વધીને 7,000 થઈ શકે છે.
- નૌકાદળ: રશિયન નેવીમાં યુદ્ધ જહાજોની સંખ્યા 230 થી 240 ની આસપાસ પહોંચી શકે છે.
તેમણે સ્પષ્ટ શબ્દોમાં કહ્યું કે, “યુરોપ ખંડ પર રશિયન જોખમ સતત તોળાઈ રહ્યું છે અને ખુલ્લા યુદ્ધની શક્યતા એ સૈન્ય સજ્જતાની દ્રષ્ટિએ મારી પ્રાથમિક ચિંતા છે.”
અમેરિકા પર ભરોસો રાખવો હવે મુશ્કેલ
ફ્રેન્ચ જનરલે અમેરિકાના બદલાતા વલણ અંગે પણ મહત્વની ટિપ્પણી કરી હતી. તેમણે કહ્યું કે યુરોપની સુરક્ષા માટે અમેરિકા જે રીતે કટિબદ્ધ હતું, હવે તેના પર પહેલા જેવો વિશ્વાસ રાખી શકાય તેમ નથી. જોકે તેમણે અમેરિકી સૈન્ય અધિકારીઓ સાથેના સંવાદને સારો ગણાવ્યો હતો, પરંતુ સાથે જ એ પણ સ્પષ્ટ કર્યું કે ફ્રાન્સે હવે પોતાની સુરક્ષા માટે પોતે જ મજબૂત થવું પડશે.
“આ સમય જાગૃત થવાનો છે, ગભરાવાનો નહીં”
જનરલ મેન્ડોને અગાઉ નવેમ્બર મહિનામાં વિવાદાસ્પદ નિવેદન આપ્યું હતું કે ફ્રાન્સે રશિયાના જોખમ સામે પોતાના સંતાનો (સૈનિકો) ગુમાવવા માટે તૈયાર રહેવું જોઈએ, જેની ઘણી ટીકા થઈ હતી. જોકે, આ વખતે તેમણે નરમ સૂરમાં કહ્યું કે, “આપણે ભય ફેલાવવાનો નથી, પરંતુ માત્ર જાગૃતિ લાવવાની છે કારણ કે આપણે જોખમી સમયગાળામાં જીવી રહ્યા છીએ અને આ સંરક્ષણ રોકાણ આપણા નાગરિકોની સુરક્ષા માટે અનિવાર્ય છે.”
મધ્ય પૂર્વ, એશિયા અને આફ્રિકામાં વધતા આતંકવાદી જોખમો અને બળના બેફામ ઉપયોગને ધ્યાનમાં રાખીને પણ ફ્રાન્સ પોતાની સૈન્ય શક્તિ વધારવા પર ભાર મૂકી રહ્યું છે.
