બ્લેકબેરીનો ધમાકેદાર ફોન 8 જૂને લૉંચ થશે

બ્લેકબેરી એક નવા સ્માર્ટફોનની સાથે આવવાની તૈયારીમાં છે. ગત વર્ષ કંપનીએ KEYOne લૉંચ કર્યો હતો અને હવે કંપની તેનું આગામી વર્ઝન એટલે કે KEY2 લાવવાની તૈયારીમાં છે. રિપોર્ટ પ્રમાણે આ નવો સ્માર્ટફોન 8 જૂને લૉંચ થશે. ચીની માઈક્રો બ્લોગિંગ વેબસાઈટ વીબોના મતે, ચીનમાં તેના માટે ઈવેન્ટ આયોજિત કરવામાં આવશે. કંપનીએ એક વીડિયો પણ જાહેર કર્યો છે જેમાં ડિઝાઈન અને ફીચર્સને હાઈલાઈટ કરવામાં આવ્યો છે. આ વીડિયોમાં ડુઅલ કેમેરા સેટઅપને મુખ્ય રીતે દેખાડવામાં આવ્યો છે. ટીજરથી એ સ્પષ્ટ છે કે આ સ્માર્ટફોન ડુઅલ કેમેરાવાળો હશે, રિયર બેક પેનલ પર ટેક્સચર્ડ ડિઝાઈન હશે અને સાઈડમાં પાવર બટન હશે. આ સ્માર્ટફોનમાં ટચ સ્ક્રીનની સાથે બ્લેકબેરીનું ટ્રેડિશનલ QWERTY કીબોર્ડ પણ હશે જે ઘણા પહેલાથી બ્લેકબેરી ફોનની ઓળખ રહી છે. સ્પેસિફિકેશનની વાત કરીએ તો BlackBerry KEY 2માં 3.2 એસ્પેક્ટ રેશિયાની સાથે 4.5 ઈંચની ડિસ્પ્લે હશે. તેના સિવાય તેમાં ક્વૉલકોમ સ્નેપડ્રેગન 660 પ્રોસેસર અને 6જીબી રેમ આપવામાં આવશે. ઈન્ટરનલ મેમરી 64જીબીની હોઈ શકે છે અને માઈક્રો એસડી કાર્ડનો સપોર્ટ મળશે.