ગગનયાનનું ટેસ્ટ મિશન ડિસેમ્બરમાં લોન્ચ થશે: ISRO ચીફ
ભારતીય અવકાશ સંશોધન સંસ્થા (ઈસરો)ના વડા વી. નારાયણનએ જાહેરાત કરી છે કે ગગનયાનનું ટેસ્ટ મિશન આ વર્ષે ડિસેમ્બરમાં લોન્ચ કરવામાં આવશે. આ ઘોષણા દરમિયાન તાજેતરમાં અવકાશ યાત્રાથી પરત ફરેલા ભારતીય અવકાશયાત્રી શુભાંશુ શુક્લા અને કેન્દ્રીય મંત્રી ડો. જિતેન્દ્ર સિંહ પણ હાજર રહ્યા હતા.
10 વર્ષમાં ઐતિહાસિક પ્રગતિ
નારાયણનએ પ્રેસ કોન્ફરન્સમાં જણાવ્યું કે છેલ્લા 10 વર્ષમાં ઈસરોએ અભૂતપૂર્વ સિદ્ધિઓ હાંસલ કરી છે. 2015થી 2025 દરમિયાન પૂરા થયેલા મિશન, 2005થી 2015 વચ્ચે કરાયેલા મિશનો કરતાં લગભગ બમણા છે. માત્ર છેલ્લા છ મહિનામાં જ ત્રણ મોટા અને મહત્વપૂર્ણ મિશન પૂરા કરવામાં આવ્યા છે.
તેમણે કહ્યું કે એક્સિઓમ-4 મિશન ભારત માટે ખૂબ જ ગર્વનો વિષય છે, કારણ કે આ હેઠળ શુભાંશુ શુક્લા આંતરરાષ્ટ્રીય અવકાશ સ્ટેશન સુધી ગયા અને સુરક્ષિત પરત ફરનારા પહેલા ભારતીય બન્યા.
અમેરિકાનો ઉપગ્રહ લોન્ચ કરશે ભારત
ઈસરો પ્રમુખે આગળ જણાવ્યું કે 30 જુલાઈએ GSLV-F16 રોકેટ દ્વારા સૌથી મહત્વપૂર્ણ NASA-ISRO સિન્થેટિક એપર્ચર રડાર (NISAR) સફળતાપૂર્વક સ્થાપિત કરવામાં આવ્યો. આગામી 2-3 મહિનામાં ઈસરો અમેરિકાનો 6,500 કિલોગ્રામનો સંચાર ઉપગ્રહ પણ પોતાના પ્રક્ષેપણ વાહનથી લોન્ચ કરશે. આ ભારતની વધતી અવકાશ કુશળતાનું વધુ એક ઉદાહરણ હશે.
શુભાંશુ શુક્લાનો અનુભવ
અવકાશયાત્રી શુભાંશુ શુક્લાએ આ પ્રસંગે કહ્યું કે, “આ અનુભવ અદ્ભુત રહ્યો. ગમે તેટલી તાલીમ કરી લો પરંતુ અસલી ઉડાનનો અનુભવ બિલકુલ અલગ હોય છે.” તેમણે જણાવ્યું કે અવકાશમાં પહોંચ્યા બાદ શરીરમાં બદલાવ આવે છે અને ઝીરો ગ્રેવિટીમાં ઢળતા થોડો સમય લાગે છે.
શુક્લાએ બાળકોને સંદેશ આપ્યો કે જો તેમણે આ કરી બતાવ્યું છે તો ભારતનું દરેક બાળક પણ અવકાશયાત્રી બનવાનું સપનું પૂરું કરી શકે છે. તેમણે કહ્યું કે આ મિશન દેશના દરેક નાગરિકના સહયોગ અને ગર્વનું પ્રતીક છે.
#WATCH | Delhi | On Axiom-4 mission, Group Captain Shubhanshu Shukla says, “… This mission has been extremely successful. We have been able to achieve all of our technical objectives… Execution of such a mission gives a lot of knowledge that cannot be measured or… pic.twitter.com/merj19Utk9
— ANI (@ANI) August 21, 2025
વ્યૂહરચના હેઠળ કામ કરી રહ્યું છે ભારત
કેન્દ્રીય મંત્રી ડો. જિતેન્દ્ર સિંહે કહ્યું કે લોકો સવાલ કરે છે કે આટલી ઝડપી પ્રગતિ અત્યારે કેમ થઈ રહી છે જ્યારે દાયકાઓ સુધી આ શક્ય નહોતું. તેનું કારણ એ છે કે ભારત હવે સ્પષ્ટ વ્યૂહરચના અને સામૂહિક પરિયોજના હેઠળ કામ કરી રહ્યું છે. તેમણે કહ્યું કે આઝાદીના 75 વર્ષ પૂરા થવા પર અમે સંકલ્પ લીધો હતો કે એક ભારતીયને અવકાશમાં મોકલવામાં આવશે અને તે જ દિશામાં પગલાં ભરવામાં આવી રહ્યા છે.
