ગંભીરા દુર્ઘટનાના પીડિતોને ન્યાયમાં અવરોધ
આણંદ જિલ્લામાં આવેલા બંધન પાર્ટી પ્લોટ ખાતે કોંગ્રેસના નેતા રાહુલ ગાંધીના આગમન સમયે એક વિવાદાસ્પદ ઘટનાએ સૌનું ધ્યાન ખેંચ્યું. હાલમાં જ બનેલી ગંભીરા બ્રિજ દુર્ઘટનાના પીડિત પરિવારો રાહુલ ગાંધીને મળવા આવ્યા હતા, પરંતુ સુરક્ષા પ્રોટોકોલના આધાર પર તેમને પ્રવેશ ન આપતાં ભારે રોષ છવાઈ ગયો.
સુરક્ષાના કારણોસર પોલીસે અટકાવ્યા પીડિતોને
પીડિત પરિવારો દુઃખ વ્યક્ત કરવા અને ન્યાયની માંગ કરવા માટે પહોંચ્યા હતા, પરંતુ તેમની પાસે પ્રવેશકાર્ડ ન હોવાને કારણે પોલીસ દ્વારા તેમને અટકાવ્યા . અધિકારીઓએ જણાવ્યું હતું કે તેઓ માત્ર સરકારી સુરક્ષા પ્રોટોકોલ અનુસાર ફરજ બજાવી રહ્યા છે અને કાર્ડ વિના પ્રવેશ શક્ય નથી.
પોલીસ અને કોંગ્રેસ નેતાઓ વચ્ચે ઉગ્ર રકઝક
જેમજ પીડિતોને પ્રવેશથી રોકવામાં આવ્યા, તેમજ ઘટના સ્થળે ઉપસ્થિત કોંગ્રેસના સ્થાનિક નેતાઓએ આ નિર્ણયનો વિરોધ કર્યો. પીડિત પરિવારોના દુઃખને અવગણવામાં આવ્યું હોવાનું કહી નેતાઓએ પોલીસ સાથે ઉગ્ર વાદવિવાદ કર્યો. અંદાજે 30 મિનિટ સુધી આ વિવાદ ચાલુ રહ્યો.
અંતે મળ્યો રાહતનો શ્વાસ: રાહુલ ગાંધીએ કરી મુલાકાત
લગભગ અડધો કલાક ચાલેલા રકઝક બાદ, કોંગ્રેસના નેતાઓની જહેમત અને દબાવને લીધે આખરે પીડિત પરિવારોને અંદર જવા દેવામાં આવ્યા. રાહુલ ગાંધીએ દરેક સાથે મુલાકાત કરી, તેમની વ્યથા સાંભળી અને યોગ્ય ન્યાયની ખાતરી આપી.
9 જુલાઈ 2025ના રોજ, મહીસાગર નદી પર આવેલો ગંભીરા બ્રિજ ધરાશાયી થયો હતો, જે વડોદરા અને આણંદને જોડતો મહત્ત્વનો માર્ગ હતો. દુર્ઘટનાના સમયે અનેક વાહનો નીચે ખાબક્યા હતા, જેમાં 20 લોકોના મૃત્યુ થયા હતા અને અનેક ઘાયલ થયા હતા. આ ઘટનાએ સમગ્ર રાજ્યને હચમચાવી દીધું હતું અને જવાબદારી નક્કી કરવા માંગ ઉઠી રહી છે.
પીડિતોની સંઘર્ષયાત્રા અને રાજકીય સંવેદનશીલતા
આ સમગ્ર ઘટના તે તરફ ઈશારો કરે છે કે દુર્ઘટનાનો ભોગ બનેલાને કેવળ સહાનુભૂતિ નહીં, પરંતુ અસરકારક વ્યવસ્થાપન અને જવાબદારી જોઈએ છે. રાહુલ ગાંધી સાથે પીડિતોની મુલાકાત ચોક્કસ રીતે તે માટેનો એક પ્રયાસ છે, પરંતુ સુરક્ષા નામે થતા બ્યુરોક્રેટિક અવરોધો ઘણાં પ્રશ્નો ઊભા કરે છે.
