GANDHINAGAR: CM રૂપાણીએ રેલ્વે સ્ટેશનમાં બની રહેલી 5 સ્ટાર હોટલની કામગીરીની કરી સમીક્ષા

કોરોનાની મહામારી વચ્ચે સરકાર દ્વારા અન્ય વિકાસના કામો પણ પ્રગતિમાં રાખવામાં આવી રહ્યા છે. આજરોજ મુખ્યમંત્રી વિજય રૂપાણી એ ‘સ્ટેચ્યુ ઓફ યુનિટીને રેલ માર્ગે જોડતા કેવડીયા રેલ્વે સ્ટેશન અને પાટનગર ગાંધીનગરમાં નિર્માણાધિન હોટેલ પ્રોજેકટની પ્રગતિની સમીક્ષા કરી હતી. મુખ્યમંત્રી વિજય રૂપાણીએ નાયબ મુખ્યમંત્રી નીતિનભાઇ પટેલની ઉપસ્થિતીમાં એક બેઠકનું આયોજન કરવામાં આવ્યું હતું. જેની અંદર કેવડીયા રેલ્વે સ્ટેશન પ્રોજેકટ અને ગાંધીનગર કેપિટલ રેલ્વે સ્ટેશન પરિસરમાં નિર્માણાધિન હોટેલ પ્રોજેકટના કાર્યોની તલસ્પર્શી સમીક્ષા કરવામાં આવી હતી. સ્ટેચ્યુ ઓફ યુનિટી સુધી રેલ્વે માર્ગે પહોચવા વડોદરાથી કેવડીયા રેલ્વે લાઇન અને કેવડીયા ખાતે મોડેલ રેલ્વે સ્ટેશનની કામગીરી કરવામાં આવી રહી છે. આ રેલ્વે લાઇન પ્રોજેકટ માટે વડોદરા જિલ્લાના 14 અને નર્મદાના 18 મળી કુલ 32 ગામોની જમીન સંપાદનની કાર્યવાહી રાજ્ય સરકારે પૂર્ણ કરી છે.
મુખ્યમંત્રીએ રેલ્વે લાઇન રૂપાંતરણ તેમજ કેવડીયા રેલ્વે સ્ટેશનની બાંધકામ પ્રવૃત્તિ, પ્લેટફોર્મ સહિતની અન્ય સુવિધાઓ નિર્માણમાં રેલ્વે તંત્રને વધુ વેગ લાવી આ સમગ્ર પ્રોજેકટ નિશ્ચિત સમયમાં પૂર્ણ કરવા તાકીદ કરી છે. ગાંધીનગર કેપિટલ રેલ્વે સ્ટેશન પરિસરમાં ગરૂડ પ્રોજેકટ અંતર્ગત આકાર પામી રહેલી હોટલની બાંધકામ પ્રગતિનું પ્રેઝન્ટેશન આ બેઠકમાં કરવામાં આવ્યું હતું. આ હોટેલ પ્રોજેકટમાં સિવીલ વર્ક લગભગ પૂર્ણ થઇ ગયું છે અને હાલ ઇન્ટીરીયર અને ફરનીશીંગના કામ ચાલી રહ્યું છે.