ગંભીરનો માસ્ટરસ્ટ્રોક: સંજુ સેમસનનું ‘પુનરાગમન’ અને ભારતીય ક્રિકેટની નવી આશા
જ્યારે આખું વિશ્વ સંજુ સેમસનની પ્રતિભા પર સવાલ ઉઠાવી રહ્યું હતું, જ્યારે આંકડાશાસ્ત્રીઓ તેની નિષ્ફળતાના ડેટા રજૂ કરી રહ્યા હતા, ત્યારે ડ્રેસિંગ રૂમમાં એક વ્યક્તિ શાંતિથી તેના પર દાવ લગાવી રહ્યો હતો. તે વ્યક્તિ એટલે ભારતીય ટીમના મુખ્ય કોચ ગૌતમ ગંભીર. વેસ્ટ ઈન્ડિઝ સામેની કરો યા મરો જેવી મેચમાં સંજુ સેમસનની અણનમ 97 રનની ઈનિંગે માત્ર ભારતને સેમીફાઈનલમાં જ નથી પહોંચાડ્યું, પણ ગંભીરના તે અતૂટ વિશ્વાસ પર મહોર મારી દીધી છે કે સંજુ ભારતનો ‘શ્રેષ્ઠ કીપર-બેટ્સમેન’ છે. T20 વર્લ્ડ કપ 2026ની સફર ભારત માટે ઉતાર-ચઢાવવાળી રહી હતી. સાઉથ આફ્રિકા સામેની કારમી હાર બાદ ટીમ ઇન્ડિયા દબાણમાં હતી. વેસ્ટ ઈન્ડિઝે 195 રનનો વિશાળ સ્કોર ખડકી દીધો હતો. ઇડન ગાર્ડન્સના મેદાન પર જ્યારે અભિષેક શર્મા અને ઈશાન કિશન વહેલા આઉટ થઈ ગયા, ત્યારે સ્ટેડિયમમાં સન્નાટો છવાઈ ગયો હતો. 41 રનમાં 2 વિકેટ ગુમાવી ચૂકેલી ભારતીય ટીમને એક એવા ખેલાડીની જરૂર હતી જે ઇનિંગને સંભાળી પણ શકે અને સમય આવ્યે ગિયર પણ બદલી શકે.
સંજુ સેમસને બરાબર એ જ કર્યું. 50 બોલમાં 12 ચોગ્ગા અને 4 છગ્ગાની મદદથી રમેલી તેની 97 રનની ઈનિંગ કોઈ ચમત્કારથી ઓછી નહોતી. ખાસ વાત એ હતી કે આ રન બનાવવા માટે તેણે કોઈ આડેધડ શોટ્સ નહોતા માર્યા, પણ શુદ્ધ ક્રિકેટિંગ શોટ્સ રમીને વિન્ડીઝના બોલરોને લાચાર કરી દીધા હતા.
“21 ડક (ઝીરો) જશે તો પણ તને રમાડીશ”
ગૌતમ ગંભીર અને સંજુ સેમસનનો સંબંધ ઘણો જૂનો અને વિશ્વાસથી ભરેલો છે. સૂત્રોના જણાવ્યા અનુસાર, જ્યારે ન્યૂઝીલેન્ડ સામેની શ્રેણીમાં સંજુ ફ્લોપ રહ્યો હતો, ત્યારે તે ઘણો નિરાશ હતો. તે સમયે ગંભીરે તેને એક જ વાત કહી હતી: “જો તું સતત 21 મેચમાં શૂન્ય પર આઉટ થઈશ, તો પણ હું તારી સાથે ઊભો રહીશ.”
ગંભીરનું માનવું છે કે સંજુ જેવો ટેલેન્ટેડ ખેલાડી જો માનસિક રીતે મુક્ત હોય, તો તે એકલા હાથે મેચ જીતાડી શકે છે. વર્લ્ડ કપની શરૂઆતની મેચોમાં તેને બહાર બેસાડવો એ ટીમની રણનીતિ હતી જેથી તેના પરથી દબાણ ઓછું થાય. જ્યારે તેને ફરી તક મળી, ત્યારે ગંભીરે સ્પષ્ટ કર્યું હતું કે આ તક કોઈ પરીક્ષા નથી, પણ તેની ક્ષમતા સાબિત કરવાનું મેદાન છે.
વિરાટ કોહલીનો રેકોર્ડ તોડ્યો
સંજુની આ ઇનિંગ માત્ર રનની દ્રષ્ટિએ જ નહીં, પણ રેકોર્ડની દ્રષ્ટિએ પણ ઐતિહાસિક હતી. રન ચેઝ કરતી વખતે T20 વર્લ્ડ કપમાં અત્યાર સુધી ભારત તરફથી સર્વોચ્ચ સ્કોર વિરાટ કોહલીના નામે (82) હતો. સંજુએ 97 રન બનાવીને તે રેકોર્ડ પોતાના નામે કર્યો છે.
મેચના હાઈલાઈટ્સ:
સંજુ સેમસન: 97 (50 બોલ)
સૂર્યકુમાર યાદવ: 32 રનની મહત્વની ભાગીદારી
ભારતનો સ્કોર: 199/5 (19.2 ઓવરમાં)
પરિણામ: ભારત 5 વિકેટે વિજયી
છેલ્લા ઘણા સમયથી સોશિયલ મીડિયા પર સંજુ સેમસનની સાતત્યતા (Consistency) પર સવાલો ઉઠતા હતા. તેને ‘પ્રેક્ટિસ મેચનો હીરો’ કે ‘IPL પ્લેયર’ કહીને નકારી દેવામાં આવતો હતો. પરંતુ ઈડન ગાર્ડન્સની આ ઈનિંગ બાદ ગંભીરે પ્રેસ કોન્ફરન્સમાં કડક શબ્દોમાં કહ્યું, “લોકો આંકડા જુએ છે, હું ટેલેન્ટ જોઉં છું. સંજુ એ લેવલનો પ્લેયર છે જે જે દિવસે લયમાં હોય, ત્યારે મેદાનના ખૂણેખૂણામાં રન ફટકારી શકે છે. આજે તેણે બતાવ્યું કે શા માટે તે વર્લ્ડ ક્લાસ છે.”
સંજુએ પણ મેચ બાદ ભાવુક થઈને કહ્યું હતું કે, “ગૌતી ભાઈએ મારા પર જે વિશ્વાસ રાખ્યો, તે જ મારી તાકાત છે. જ્યારે તમારો કોચ તમને કહે કે તારે ડરવાની જરૂર નથી, ત્યારે તમારી બેટિંગમાં તે આત્મવિશ્વાસ દેખાઈ આવે છે.”
