મધ્યપ્રદેશના ભીંડ જિલ્લામાંથી એક ચોંકાવનારો કિસ્સો સામે આવ્યો છે. અહીં એક છોકરીએ તેના ભાઈ સાથે ઝઘડા બાદ મોબાઈલ ફોન ગળી લીધો. પેટમાં તીવ્ર દુખાવાને કારણે છોકરીને ભિંડ જિલ્લા હોસ્પિટલમાં દાખલ કરવામાં આવી. એક્સ-રેમાં છોકરીના પેટમાં મોબાઈલ ફોન હોવાની પુષ્ટિ થયા બાદ તેને ઓપરેશન માટે ગ્વાલિયર જિલ્લા હોસ્પિટલમાં રિફર કરવામાં આવી. અહીં 6 ડોક્ટરોની ટીમે 2 કલાકના ઓપરેશન બાદ છોકરીના પેટમાંથી મોબાઈલ ફોન બહાર કાઢ્યો. તબીબોનું કહેવું છે કે છોકરીના જીવને જોખમ પણ હોઈ શકતું હતું.
વાસ્તવમાં, વિચિત્ર કિસ્સો ભિંડ જિલ્લાના અમયન શહેરનો છે. અહીં 18 વર્ષની યુવતીનો તેના ભાઈ સાથે કોઈ વાતને લઈને ઝઘડો થયો હતો. ગુસ્સામાં આવીને તેણે મોબાઈલ ગળી લીધો. ચાઈના મેડ કીપેડ મોબાઈલ ગળી ગયાના થોડા સમય બાદ તેને પેટમાં અસહ્ય દુખાવો થવા લાગ્યો. પરિવારના સભ્યો ડરી ગયા અને તરત જ તેને ભીંડ જિલ્લા હોસ્પિટલમાં લઈ ગયા.
એક્સ-રેમાં મોબાઈલ દેખાયો
ડોક્ટરોને બધી જ વાત જણાવી એ પછી યુવતીનો એક્સ-રે કરવામાં આવ્યો. રિપોર્ટમાં તેના પેટમાં મોબાઈલ ફોન જોવા મળ્યો. મામલો ગંભીર જણાતાં યુવતીને ભીંડથી ગ્વાલિયર જયરોગ્ય હોસ્પિટલમાં રિફર કરવામાં આવી. અહીં આવીને થોડીક તપાસ કર્યા બાદ ડોક્ટરોને જાણવા મળ્યું કે મોબાઈલ ફોન બહાર કાઢવા માટે તેનું ઓપરેશન કરવું પડશે, નહીં તો તેનો જીવ જોખમમાં મુકાઈ શકે છે.
6 ડોક્ટરોની ટીમ, બે કલાક સુધી ઓપરેશન ચાલ્યું
જયરોગ્ય હોસ્પિટલના સર્જરી વિભાગના 6 ડોક્ટરોની ટીમ યુવતીના પેટમાંથી મોબાઈલ ફોન કાઢવાના ઓપરેશનમાં લાગી ગઈ. બે કલાક સુધી ચાલેલી ઓપન સર્જરી બાદ મોબાઈલ બહાર કાઢવામાં આવ્યો. જેએએચમાં આ પ્રકારનું ઓપરેશન પ્રથમ વખત થયું હતું. જયરોગ્ય હોસ્પિટલના સુપરિન્ટેન્ડેન્ટ ડૉ. આરકેએસ ધાકડે જણાવ્યું કે જો યુવતીને સમયસર હોસ્પિટલમાં લાવવામાં ન આવી હોત તો તેના જીવને જોખમ હતું.
